Shymkent qalasynyń ákimi Murat Áıtenov kommýnaldyq qyzmetterdiń jumysyn qatań synǵa alyp, tıisti basshylardan bul salada tártip ornatýdy talap etti.
Shymkent aýmaǵyna qoqys konteınerlerin ornatý boıynsha ótken jıynda qala basshysy turǵyndar tarapynan qoqysty jınaý jumystaryna degen narazylyǵy kóp ekenin aıtty.
«Qalany aralaý barysynda kommýnaldyq qyzmetter jumysynyń óte nashar júrgiziletinin kórip júrmin. Kóptegen qoqys alańshalaryna sanıtarlyq tazalaý jumystary júıeli túrde júrgizilmeıdi. Al aıaldamalar men kóshe boıyndaǵy qoqys jáshikteri únemi tolyp turady. Bul aýdan ákimdigi tarapynan baqylaýdyń joq ekenin ańǵartady»,-dedi qala ákimi.
Murat Áıtenov aýdan ákimderi men energetıka jáne kommýnaldyq sharýashylyq basqarmasy basshysynyń mindetin atqarýshy N.Jamankózge qoqys jáshikterin ornatý jumystary kesheýildep jatqandyǵy týraly eskertý berip, bos sózden naqty iske kóshýdi tapsyrdy. Sonymen qatar, ol jeke sektor aýmaǵynda arnaıy qoqys alańshasyn ornatý týraly tapsyrmasynyń tıisti deńgeıde oryndalmaǵanyn da atap ótti.
Jıyndy qorytyndylaǵan qala basshysy aldaǵy ýaqytta aıtylǵan synnan qandaı qorytyndy shyǵarylatynyn tikeleı ózi baqylaıtynyn eskertti.
Aıta keteıik, jalpy Shymkent qalasynda 488 qoqys alańshasynda 2039 qoqys konteıneri bar. Onyń 633 danasy jaramsyz bolsa, kóp qabatty turǵyn úılerdiń aýmaǵyna 762 konteınerdi qosymsha ornatý kerek. Aǵymdaǵy jyly satylyp alynatyn 1474 eko konteınerdi jaramsyzdaryn almastyrý jáne jetispeıtin jerlerge qosymsha ornatý qajettigi josparlandy.
Shymkent
