قازاقستان مەن چەرنوگوريا قۇرامالارى اراسىندا جولداستىق ويىن وتكىزۋ جونىندە رەسمي كەلىسىمگە قول قويىلدى، دەپ حابارلايدى Olympic.kz. بۇل تۋرالى قازاقستان فۋتبول فەدەراتسياسى رەسمي مالىمدەگەن.
قازاقستان فۋتبول فەدەراتسياسىنىڭ باس حاتشىسى ازامات ايتقوجين مەن چەرنوگوريا فۋتبول وداعىنىڭ باس حاتشىسى مومير دجۋردجەۆاتس جولداستىق ويىندى وتكىزۋ تۋرالى كەلىسىمدى بەكىتتى.
«جوسپارعا سايكەس ويىن 11 قاراشا كۇنى پودگوريتسادا وتەدى. جاقسى قارسىلاس تاڭدالدى دەپ ويلايمىن. چەرنوگوريا قۇراماسى ەۋروپالىق ولشەم بويىنشا تۇراقتى ويىن كورسەتىپ كەلەدى. جەكە ويىن مانەرى بار. ويىننىڭ وڭاي بولمايتىنى انىق.
ءارى قاراي قازاقستان قۇراماسى 15 قاراشا كۇنى ۋەفا ۇلتتار ليگاسىنىڭ اياسىندا البانيامەن كەزدەسەدى. وڭ شەشىم قابىلداندى دەپ ۇمىتتەنەمىز. چەرنوگوريا مەن البانيا جاقىن ورنالاسقان. ءبىزدىڭ كوماندا جولعا كەتەتىنىن كۇشتى ۇنەمدەيدى. باسقا قارسىلاستاردىڭ ۇسىنىسى بويىنشا جولداستىق ويىنعا ارنايى بارۋ كەرەك بولاتىن.
وكىنىشكە قاراي، پاندەميا جارىستى وتكىزۋ مەرزىمىن قىسقارتىپ تاستادى. ءار قادامدى ەسەپتەۋ قاجەت. الايدا، جولداستىق ويىنداردىڭ دا ماڭىزى زور. بۇعان دەيىن ەكى جولداستىق كەزدەسۋ وتپەي قالدى. ەلىمىزدەگى جانە الەمدەگى جاعداي رەتتەلىپ، ناقتى شارالار قولدانىلادى دەپ ۇمىتتەنەمىز.
قازاقستان قۇراماسىنىڭ ويىنشىلارى مەن جاتتىقتىرۋشىلار شتابى تولىقتاي دايىندىق جۇرگىزىپ، جولداستىق جانە رەسمي كەزدەسۋلەردە جاقسى ويىن كورسەتۋ ءۇشىن بار كۇش-جىگەرىن سالادى دەپ سەنىممەن ايتا الامىن»، - دەپ اتاپ ءوتتى قازاقستان فۋتبول فەدەراتسياسىنىڭ قۇراما كوماندالار دەپارتامەنتىنىڭ ديرەكتورى قايرات نۇرداۋلەتوۆ.
قازاقستان 1994 جىلى فيفا مەن افك-عا، 2002 جىلى ۋەفا-عا مۇشە بولىپ كىردى. الەم، ازيا جانە ەۋروپا چەمپيوناتتارىنىڭ فينالدىق كەزەڭىنە ءوتىپ كورمەگەن. وتكەن ماۋسىمدا ۇلتتار ليگاسى دەپ اتالاتىن جاڭا تۋرنيردە دە ءوزى قارايلاس قۇرامالاردىڭ اراسىنان گرۋزيانى العا جىبەرىپ الدى.
قازىرگى ماقساتى – ۇلتتار ليگاسىنان ۇزدىك شىعۋ. ول ءۇشىن ليتۆا، بەلارۋس جانە البانيا قۇرامالارىنان باسىم ءتۇسۋى كەرەك. قازىرگى كەزدە ۇلتتىق قۇرامانى چەحيالىق باپكەر ميحال بيلەك جاتتىقتىرادى.
"ادىرنا" ۇلتتىق پورتالى
