Qazaqstan men Chernogorııa fýtbolshylary joldastyq kezdesý ótkizedi

3020
Adyrna.kz Telegram

Qazaqstan men Chernogorııa quramalary arasynda joldastyq oıyn ótkizý jóninde resmı kelisimge qol qoıyldy, dep habarlaıdy Olympic.kz. Bul týraly Qazaqstan fýtbol federaııasy resmı málimdegen. 

Qazaqstan fýtbol federaııasynyń Bas hatshysy Azamat Aıtqojın men Chernogorııa fýtbol odaǵynyń bas hatshysy Momır Djýrdjeva joldastyq oıyndy ótkizý týraly kelisimdi bekitti.

«Josparǵa sáıkes oıyn 11 qarasha kúni Podgorıada ótedi. Jaqsy qarsylas tańdaldy dep oılaımyn. Chernogorııa quramasy eýropalyq ólshem boıynsha turaqty oıyn kórsetip keledi. Jeke oıyn máneri bar. Oıynnyń ońaı bolmaıtyny anyq.

Ári qaraı Qazaqstan quramasy 15 qarasha kúni ÝEFA Ulttar Lıgasynyń aıasynda Albanııamen kezdesedi. Oń sheshim qabyldandy dep úmittenemiz. Chernogorııa men Albanııa jaqyn ornalasqan. Bizdiń komanda jolǵa ketetinin kúshti únemdeıdi. Basqa qarsylastardyń usynysy boıynsha joldastyq oıynǵa arnaıy barý kerek bolatyn.

Ókinishke qaraı, pandemııa jarysty ótkizý merzimin qysqartyp tastady. Ár qadamdy esepteý qajet. Alaıda, joldastyq oıyndardyń da mańyzy zor. Buǵan deıin eki joldastyq kezdesý ótpeı qaldy. Elimizdegi jáne álemdegi jaǵdaı rettelip, naqty sharalar qoldanylady dep úmittenemiz.

Qazaqstan quramasynyń oıynshylary men jattyqtyrýshylar shtaby tolyqtaı daıyndyq júrgizip, joldastyq jáne resmı kezdesýlerde jaqsy oıyn kórsetý úshin bar kúsh-jigerin salady dep senimmen aıta alamyn», - dep atap ótti Qazaqstan fýtbol federaııasynyń qurama komandalar departamentiniń dırektory Qaırat Nurdáýletov.

Qazaqstan 1994 jyly FIFA men AFK-ǵa,   2002 jyly ÝEFA-ǵa múshe bolyp kirdi. Álem, Azııa jáne Eýropa chempıonattarynyń fınaldyq kezeńine ótip kórmegen. Ótken maýsymda Ulttar lıgasy dep atalatyn jańa týrnırde de ózi qaraılas quramalardyń arasynan Grýzııany alǵa jiberip aldy.

Qazirgi maqsaty – Ulttar lıgasynan úzdik shyǵý. Ol úshin Lıtva, Belarýs jáne Albanııa quramalarynan basym túsýi kerek. Qazirgi kezde ulttyq quramany chehııalyq bapker Mıhal Bılek jattyqtyrady.

"Adyrna" ulttyq portaly

Pikirler