بەلگىلى كاسىپكەر، «سەن» پارتياسىنىڭ جەتەكشىسى احمەتبەك نۇرسيلا ءوزىنىڭ You Tube ارناسى ارقىلى «سق-فارماتسيانىڭ» جابىلۋىن تالاپ ەتىپ، قازاقستاندىقتارعا ۇندەۋ جاسادى. ول شىعارىلىمىنىڭ اتىن «دات پەن بىرلىك» دەپ اتاپ، ەل باسىنا تۇسكەن ناۋبەتتىڭ شەشۋ جولىن ۇسىنىپ، وسى جولدا ميتينگ ۇيىمداستىرۋعا دايىن ەكەنىن ايتتى.
«سق-فارماتسيا» جابىلسىن. ءدارى-دارمەك حالىققا ەشقانداي دەلدالسىز تىكەلەي كەلسىن. حالىق ءبىر ادىلەتسىزدىكتى، ءبىر باسسىزدىقتى انىقتاپ، سونى شەشۋدى حالىق بولىپ تالاپ ەتەلىك.
"ەگەر مەديتسينالىق مەكەمەلەر رەسمي ديستريبيۋتورلاردان (دەلدالدىق كومپانيا – اۆت.) تىكەلەي ءدارى-دارمەكتى الىپ، دارىلەردىڭ باعاسىن پورتالدا اشىق كورسەتەتىن بولسا، ونى حالىق ينتەرنەت ارقىلى باقىلاۋ مۇمكىندىگىنە يە بولىپ، ول جەمقورلىقتى جويۋعا بولۋشى ەدى. ءدارى-دارمەكتى شەتەلدەن اكەلۋ ءۇشىن «سامۇرىق-قازىنا» قۇرعان «سك-فارماتسيا» جشس كەرەك ەمەس. كەلىسەسىز عوي. وسىنداي پوستتاردى جازىپ، وسى باننەردى اۆاتارلارىڭىزعا سالىپ، قازىرگى وزەكتى وسى پروبلەمانى بىرلىگىمىزدى كورسەتىپ، بىرگە شەشۋدى تالاپ ەتەيىكشى. تىم بولماسا ەل ەكەنىمىزدى وسىلاي كورسەتەيىك. بۇل ماسەلەنى شەشكەننەن كەيىن، ءدال وسى جولمەن كەلەسى ماسەلەلەردى شەشەتىن بولامىز.
ءبىر اپتادا بيلىك تاراپىنان ەشقانداي ءىس-ارەكەت بولماسا، الەۋمەتتىك جەلى ارقىلى بيلىككە تالاپ قويىپ، حات جازىپ، قول جيناپ، بەلسەندىلەر بيلىككە تاپسىراتىن بولامىز. قولدايمىن دەپ قول قويۋ ءۇشىن سىزگە ءبىر-اق مينۋت ۋاقىت جەتىپ جاتىر. سول كەزدە 10 مىڭ، 100 مىڭ قول جينالاتىن بولسا، بيلىك نازار اۋدارادى. ەگەر بيلىككە تاپسىرىلعان حاتقا ءبىر اپتا ىشىندە جاۋاپ بولماسا، ءار قالادان ءدال وسى ماسەلە بويىنشا «سەن، الاش» پارتياسىنىڭ بەلسەندىلەرى بەيبىت ميتينگتەر ۇيىمداستىرادى. سوعان بارىپ قاتىناسۋعا ءبىر-اق ساعات ۋاقىتىڭىزدى ارناساڭىز – ءسىز ەلىمىزدە ازاماتتىق قوعام جاساۋعا قوسقان ۇلەسىڭىز بولار ەدى.
ەگەر بەيبىت ميتينگتەردە ەشتەڭە شىقپاسا، «دات» شاراسىن ءارى قاراي جالعاستىرامىز. اتا-بابامىز بيلىكتىڭ شەشىمىنە نارازى بولعاندا ايتاتىن دات ءداستۇرىنى ارى قاراي جالعاستىرامىز.
نارازىلىق كورسەتۋدىڭ ءبىرىنشى قادامى – بەلگىلەنگەن ۋاقىتتا حالىق بارلىق جۇمىستارىن تاستاپ، ءبىر ساعاتقا توقتاتادى.
ەگەر ماسەلە شەشىلمەسە، وندا وسى شارا ءبىر كۇنگە سوزىلادى. دات ايتۋ تەك قانا بەيبىت جولمەن بولادى. ارانداتۋشىلىققا حالىق بولىپ جول بەرگىزبەۋگە بولادى.
ەرمۇرات باپي اعامىزدىڭ «دات» گازەتى حالىققا كەرەمەت قىزمەت جاسادى. جاساپ تا جاتىر. ەندى سونى الەۋمەتتىك جەلى ارقىلى تاعى دا ءبىر بەلەسكە كوتەرىپ، دامىتۋعا بولادى، اعايىن.
حالىقتىڭ تاعدىرى، حالىقتىڭ بولاشاعى، حالىقتىڭ كۇشى – تەك قانا بەرەكە-بىرلىكتە! بىرلىكپەن قاراپايىم قيمىلدار جاسايىق...", - دەيدى احمەتبەك نۇرسيلا.
جاسۇلان ءناۋرىزالى،
"ادىرنا" ۇلتتىق پورتالى
