1981 جىلدىڭ سارشا تامىزى روبەرت پەن ليننەت فەدەرەرلەردىڭ وتباسىن قۋانىشقا بولەدى. بۇل قۋانىشتىڭ باستى سەبەپكەرى – رودجەر ەسىمدى ءسابيدىڭ دۇنيەگە كەلۋى بولاتىن. ءيا! رودجەر! ءسىز بەن ءبىز بىلەتىن الەمدىك تەننيستىڭ جارقىن جۇلدىزى – رودجەر فەدەررەر...
بالعىن كەزەڭ
«مەن شىن مانىندە 10, 14 نەمەسە 16 جاسىمدا اسقان دارىندى بولعان جوقپىن، قاتارداعى كوپ بالانىڭ ءبىرى بولدىم. تەك 1998 جىلى جاسوسپىرىمدەر اراسىنداعى ۋيمبلدون ءتۋرنيرىن جەڭگەننەن كەيىن عانا، مەندە ءبىر سەنىمدىلىك پايدا بولدى»، - دەيدى رودجەر فەدەررەر. ءيا، راسىمەن دە فارماتسەۆتەر وتباسىندا دۇنيەگە كەلگەن ءسابي ەرەكشە دارىنىمەن بايقالا قويماعان. مادەني وشاقتارعا تولى بازەلدە ەسەيگەن وسكىن وزگە دە جەتكىنشەكتەر سەكىلدى كوركەمونەرگە، قيمىل-قوزعالىستى تالاپ ەتەتىن بادمينتون، ۇستەل تەننيسى، فۋتبول سىندى سپورت تۇرلەرىنە قىزىققان. الايدا اناسى لينەتت فەدەررەردىڭ «Ciba Klybeck» تەننيس كلۋبىندا بالالار جاتتىقتىرۋشىسى بولۋى، جارقىن جۇلدىزدىڭ العاش راكەتكانى قولىنا الىپ، ۇلكەن تەننيسپەن اۋەستەنۋىنە اسەر ەتكەن.
تەنتەك تالانت
ارينە، سپورت جانكۇيەرلەرى تەننيس كورتىنداعى سىپايى، سالماقتى جۇلدىزدى جازباي تانىتىنى انىق. الايدا بالاڭ رودجەر ەموتسيونالدىق تۇراقسىزدىعىمەن، قىزۋقاندىلىعىمەن كوزگە ءتۇسىپ، سوعان ساي جازاسىن العان كەزدەرى دە از بولماعان. ءتىپتى، سول مىنەزى ءۇشىن بىرنەشە مارتە جاتتىعۋدان قۋىلىپ، دارەتحانا دا تازالاعان. ونىڭ ارىپتەسى يۆ اللەگرو: «بىردە بيل قالاسىنداعى تەننيس الاڭى شۋىلدى ازايتاتىن جابۋمەن قورشالىپ، بارلىعىمىزعا جابۋدى قۇرتىپ الماۋ تۋرالى قاتاڭ ەسكەرتۋ جاسالدى. ونداي جاعداي ورىن العان كۇندە، بۇلدىرگەن ادام ءبىر اپتا دارەتحانا تازايلاتىنى دا ايتىلدى. الايدا جاتتىعۋلاردىڭ بىرىندە سوققىنى وتكىزىپ العانىنا بۇلدانعان رودجەر، راكەتكانى لاقتىرىپ قىمبات جابۋعا ساڭىلاۋ سالدى. ءتارتىپ بويىنشا ءبىر اپتا دارەتحانا تازالادى»،- دەيدى.
ەكيۋبلانعا جول
سپورتشىنىڭ تەننيسكە اۋەستىگى ءومىرىنىڭ دە باسقا ارناعا اۋىسىنا اسەر ەتكەن. تۋرنيرلەرگە تۇراقتى تۇردە قاتىسۋ ونىڭ ساباعىنا كەدەرگى كەلتىرگەنمەن، اعىلشىن، فرانتسۋز، نەمىس تىلدەرىندە ەركىن سويلەۋىنە مۇمكىندىك تۋدىرعان. ءتىل ۇيرەنۋ بارىسىندا رودجەرگە قيىن سوققانى فرانتسۋز ءتىلى. ول ونى ەكيۋبلانداعى تەننيس ورتالىعىندا جۇرگەندە ۇيرەنگەن. الايدا ول وسى ۋاقىتتاردا ورتا جانە دوستار ماسەلەسىندە قيىنشىقتارعا تاپ بولعانى جايىندا: «شۆەيتساريالىق نەمىس بولعانىم ءۇشىن ءبارى كۇلەتىن. ماعان سوقتىعۋعا دايىن تۇراتىن. مەن ءجيى جىلاپ، ۇيگە قايتقىم كەلەتىن»، - دەپ ەسكە الادى. كوپتەگەن ماماندار سپورتشىنىڭ ەكيۋبلانعا ساپارىن ءساتتى بولعان دەپ ەسەپتەيدى. سەبەبى ول مۇندا فرانتسۋز تىلىمەن قوسا، سابىرلى، قاجىرلى بولۋدى ۇيرەنگەن.
سيدنەيدەگى تانىستىق
ايگىلى تەننيس مايتالمانىنىڭ سۇيىكتىسى ميروسلاۆا ۆاۆرينەتس تە سپورتتىڭ اۋىلىنان الىس ەمەس. ەكەۋىنىڭ تانىستىعى 2000 جىلعى سيدنەيدەگى وليمپيادا ويىندارىندا باستالعان. سول جىلدارى ەكەۋى دە تەننيستەن شۆەيتساريا قۇراماسىنىڭ نامىسىن قورعاعان. ميروسلاۆانىڭ سپورتتاعى عۇمىرى 2002 جىلى اياعىنان العان جاراقاتىنا بايلانىستى قىسقا بولدى. قوس سپورتشى العاشقى تانىستىقتان كەيىن ارادا 9 جىل وتكەندە وتباسىن قۇرىپ، سول جىلى ميلا روۋز، شارلين ريۆا ەسىمدى ەگىز قىزداردى 2014 جىلى لەو جانە لەونارتا ەسىمدى ەگىز ۇل بالالاردى دۇنيەگە اكەلگەن.
اتىمتاي رودجەر
قايىرىمدىلىق ىستەرىمەن اينالىسۋدى ماقسات ەتكەن «شۆەيتساريالىق ماەسترو» 2003 جىلى جەكە قور قۇرعان. سول ۋاقىتتان بەرى اتالعان قوردان افريكاداعى بالالاردىڭ ءبىلىم الۋىنا، سپورتپەن شۇعىلدانۋىنا قارجى ءبولىنىپ تۇرادى. الەمدىك پاندەميا باستالعالى رودجەر قورى افريكاداعى 64 000 مىڭ بالاعا، از قامتىلعان وتباسىلارعا كومەك بەردى. سونىمەن قاتار شۆەيتسارياداعى جاعدايى تومەن وتباسىلارعا 1 ميلليون فرانك بولگەن.
اعىن ايدىن،
«ادىرنا» ۇلتتىق پورتالى.
