ءتىل ءۇشىن توبەلەس

3106
Adyrna.kz Telegram

ءتىل، جەر ءۇشىن توبەلەس الەمنىڭ بارلىق پارلامەنتىندە بولىپ تۇرادى. ءتىپتى جاعا جىرتىسىپ، جۇدىرىق جۇمسايتىنداردىڭ ارەكەتىن اقىرعى قادام دەپ ءتۇسىنۋ كەرەك.

كەشەلى-بەرى ۋكراينانىڭ كونستيتۋتسيالىق پارلامەنتى «مەملەكەتتىك ءتىل رەتىندە ۋكراين ءتىلىنىڭ قولدانىسىن قامتاماسىز ەتۋ تۋرالى» زاڭنىڭ قانشالىقتى دۇرىس ەكەندىگىن قايتادان قاراپ جاتىر. ۋكراينانىڭ جوعارى راداسىنداعى رەسەيگە بۇيرەگى قاتتى بۇراتىن «وپپوزيتسيالىق پلاتفورما» پارتياسى  كونستيتۋتسيالىق سوتقا شاعىم تۇسىرگەن. ولاردىڭ ويىنشا،

«ەكس-پرەزيدەنت پەتر پوروشەنكونىڭ كەزىندە قابىلدانعان بۇل زاڭدى قايتادان  قاراۋ كەرەك. ويتكەنى بۇل زاڭ ۋكرايناداعى ورىس ۇلتى مەن سانى جاعىنان ازشىلىق سانالاتىن ەلدەگى ەتنوستىڭ مۇددەسىن كوزدەمەيدى». رەسەيشىل توپتاردىڭ ويىنشا، «ەلدەگى حالىقتىڭ 54 پايىزى ورىس تىلىندە

تۇراقتى سويلەيدى جانە ونى كۇندەلىكتى ومىردە قولدانادى».

ال ۋكراينانىڭ قورعانىس جانە ۇلتتىق قاۋىپسىزدىك كەڭەسىنىڭ حاتشىسى الەكسەي دانيلوۆ ەلدە ەكىنشى مەملەكەتتىك ءتىل اعىلشىن ءتىلى بولۋى قاجەت» دەپ وتىر.  رەسەيشىل «وپپوزيتسيالىق پلاتفورما» توبى «بۇل دەموكراتيالىق قۇندىلىقتارعا مۇلدە قايشى كەلەدى. ورىس تىلىندە سويلەيتىن 54 پايىز حالىقتىڭ مۇددەسى ەسكەرىلۋى كەرەك» دەپ ايتقانىنان قايتار ەمەس.

ەلدى كىم باسقارسا، ساياسات سولاي قاراي بۇرىلادى. ەكس-پرەزيدەنت پەتر پوروشەنكونىڭ كەزىندە ۋكراينانىڭ №1 قاس جاۋى رەسەي جانە ونىڭ باسشىسى پۋتين سانالدى. ال بۇگىن...

ۋكراينادا تىلگە قاتىستى كەيبىر ماسەلەلەر ەندى قايتا كوتەرىلىپ جاتىر. وعان استىرتىن سۋ بۇركىپ وتىرعان باسقا ەمەس،  رەسمي ماسكەۋ. قازىرگى پرەزيدەنت ۆلاۆديمير زەلەنسكيدىڭ ءتىل ساياساتىنداعى سولقىلداقتىعى دا بۇعان سەبەپ بولىپ وتىرعان سياقتى.

ء–تىل تۋرالى زاڭنىڭ جوباسىنا 2 مىڭعا جۋىق وزگەرىستەر ەنگىزىلدى. قابىلدانعان بۇل زاڭنىڭ سالدارى قالاي بولادى، ونى بولجاۋ قيىن»،- دەگەن بولاتىن ول پرەزيدەنتتىك سايلاۋعا تۇسەر الدىندا. ال رەسەيگە قاشقان ەكس-پرەزيدەنت ۆيكتور يانۋكوۆيچتىڭ تۇسىندا قابىلدانعان «ءتىل تۋرالى» زاڭدا ورىسشا سويلەيتىن ازاماتتارعا كەڭ مۇمكىندىك بەرىلگەن. ءتىپتى «ايماقتىق ءتىل تۋرالى» زاڭ دا قابىلدانعان. قازىر دە تىلگە قاتىستى «ۇلتتىق ازشىلىق تۋرالى» زاڭ جوباسىن قابىلداۋ تۋرالى ماسەلە قايتا كوتەرىلۋدە.

جالپى جوعارى رادادا ءتىل ماسەلەسىنە قاتىستى  ماسەلە وقتىن-وقتىن كوتەرىلىپ تۇر. ويتكەنى قازىرگى رادا پەتر پوروشەنكونىڭ كەزىندەگىدەي ەمەس. مۇندا ءپۋتيننىڭ پوزيتسياسىنا، ورىس تىلىنە بۇيرەگى بۇراتىن توپتار بارشىلىق.

بۇگىنگى بولىپ جاتقان تىلگە قاتىستى پروتسەستەرگە قاتىستى بۇرىنعى پرەزيدەنت پەتر پوروشەنكو «تىلمەن كۇرەسىپ جۇرگەندەر ۋكراينانىڭ قاۋىپسىزدىگىنە قاتەر توندىرەدى. ولار  – اگرەسسور رەسەيدىڭ ايتاعىنا ەرىپ جۇرگەندەر. ءبىز كەزىندە قابىلدانعان زاڭدا ەلدەگى بارلىق تۇرعىنداردىڭ مۇددەسىن ەسكەردىك. تەك قانا ماسكەۋدىڭ كوزقاراسىن قابىلدامادىق»،- دەدى.

وسىدان ەكى كۇن بۇرىن جۇرگىزگەن كيەۆتەگى حالىقارالىق ينستيتۋتتىڭ ساۋالناماسىنا سەنسەك، ەلدىگى حالىقتىڭ 55 پايىزى «بولاشاقتا بارلىق سالادا مەملەكەتتىك ءتىل ۋكريان ءتىلى بولارىنا كامىل سەنەدى. 29, 8 پايىزى ەكىنشى مەملەكەتتىك ءتىل ورىس ءتىلى بولۋى كەرەك» دەپ سانايدى. سونىمەن قاتار، «27 پايىزى بۇل تاۋەلسىز مەملەكەتكە قاۋىپ توندىرەدى»، - دەگەن پىكىردە. ءبىر قىزىعى، ساۋالناماعا جاۋاپ بەرگەندەردىڭ 48, 8 پايىزى «ورىس ءتىلىن تاريحي مۇرا رەتىندە ساقتاپ قالىپ، دامىتۋ كەرەك» دەپ جاۋاپ بەرگەن.

ءسويتىپ، جوعارى راداداعى «وپپوزيتسيالىق پلاتفورما» توبىنىڭ 51 دەپۋتاتىنىڭ ورىس تىلىنە قاتىستى شاعىمى  الداعى ەكى كۇندە كونستيتۋتسيالىق سوتتا قارالماق.

كەشە ۋكراينانىڭ ساياسي توك شوۋىن جۇرگىزۋشى وستاپ دروزدوۆ ەلدەگى ورىس تىلىندە سويلەيتىن تۇرعىنداردى «ءبىر كلەتكالى ادامدار» دەپ اتادى. دروزدوۆتىڭ ويىنشا، «ەلدىڭ ءاربىر تۇرعىنى تەك قانا ۋكراين تىلىندە سويلەۋى كەرەك. ورىس تىلىندە  سويلەۋ مىندەتتى ەمەس. ورىس ءتىلىن ەكىنشى مەملەكەت ءتىل ەتۋ ەلگە تونگەن ۇلكەن قاۋىپ»- دەدى.

... بۇل – ۋكراينا. ال قازاقتىڭ بۇگىنگى ورىسقۇل بيلىگى ۋكراين شەنەۋنىكتەرى سياقتى باتىل ەمەس. قازاق ءتىلى تۋرالى ماسەلە كوتەرمەيدى، انا تىلىندە ەركىن سويلەي دە المايدى. پاتريوتتىعى جوق. ءبىزدىڭ اتا زاڭدا مەملەكەتتىك ءتىل ءسوز جۇزىندە عانا قالىپ تۇر. قازاق بيلىگىندە وتىرعاندار انا تىلىندە سويلەۋگە مۇددەلى ەمەس. ءتىل ءۇشىن «توبەلەس» جوق. ەڭ قيىنى دا سول...

ەركىن قالدان،

«ادىرنا» ۇلتتىق پورتالى

پىكىرلەر