شىمكەنت: كاسىپكەرلەر پالاتاسى جانىنداعى وڭىرلىك كەڭەس سايلاۋىنا قۇجات تاپسىرۋ باستالدى

3942
Adyrna.kz Telegram

بۇگىن شىمكەنت قالاسى اكىمدىگىندە شىمكەنت قالاسى كاسىپكەرلەر پالاتاسىنىڭ ديرەكتورى نۇرلان قابىشتاەۆتىڭ قاتىسۋىمەن وڭىرلىك كاسىپكەرلەر پالاتالارى جانىنداعى وڭىرلىك كەڭەسكە مۇشەلەردى سايلاۋ بويىنشا بريفينگ ءوتتى.

ءباسپاسوز ماجىلىسىندە ن.قابىشتاەۆ وڭىرلىك كەڭەسكە كانديداتتاردان ءوتىنىش قابىلداۋ بۇگىن 7 شىلدەدە باستالعانىن جەتكىزىپ، وعان قوسا اتالعان كەڭەستىڭ ءرولى تۋرالى ءسوز قوزعادى.

– «اتامەكەن» كاسىپكەرلىك پالاتاسىندا وڭىرلىك كەڭەس دەگەن ورگان بار. ول – ءار ءوڭىردىڭ كاسىپكەرلىك احۋالىن باقىلاپ، كاسىپكەرلىك پالاتاسىنىڭ ماسەلەلەرىن كوتەرەتىن مەكەمە. ءبىزدىڭ وڭىرلىك كەڭەستە 30 كاسىپكەر بار ەدى. ونىڭ قۇرامىن تارقاتقانبىز. وسىعان وراي سايلاۋ وتپەك. بۇگىننەن باستاپ 15 شىلدەگە دەيىن قۇجاتتار قابىلدانادى. كانديداتتار 16–19 شىلدە ارالىعىندا ۇگىت-ناسيحات جۇمىستارىن جۇرگىزەدى (قارجى بولىنبەگەن), ال داۋىس بەرۋ ونلاين رەجيمدە 20–22 شىلدە ارالىعىندا وتەدى. جاڭا وڭىرلىك كەڭەستىڭ قۇرامى 3 تامىز كۇنى جاريالانادى. بۇل كەڭەستىڭ ءرولى وتە ماڭىزدى. كەڭەس مۇشەلەرى ءوز ماسەلەلەرىن كوتەرۋمەن قاتار، بيلىك پەن بيزنەس اراسىنداعى التىن كوپىر ءرولىن اتقارادى. ياعني، بۇگىنگى ەپيدەميولوگيالىق احۋالعا بايلانىستى شەكتەۋ شارالارى كەزىندە دۇنيەجۇزىلىك تاجىريبەگە سۇيەنىپ، ەكى تاراپقا دا زيانى تيمەيتىن شەشىمدەر مەن انتيكريزيستى جولداردى تابۋىمىز كەرەك. بيزنەس جۇمىس ىستەسە، ول – قوسىمشا سالىق، قوسىمشا جالاقى، ال جۇمىس ورنى – الەۋمەتتىك جاعدايدىڭ ماڭىزدى ينديكاتورى»، – دەدى كاسىپكەرلەر پالاتاسىنىڭ ديرەكتورى.

وڭىرلىك كەڭەس مۇشەلىگىنە ۇمىتكەر كەلەسى تالاپتارعا سايكەس كەلۋى ءتيىس:
قازاقستان رەسپۋبليكاسىنىڭ ازاماتى بولۋ;
ءوڭىردىڭ الەۋمەتتىك-قوعامدىق ومىرىنە بەلسەندى قاتىسۋشى بولۋ;
كاسىپكەرلەر اراسىندا پىكىر كوشباسشىلارىنىڭ ءبىرى بولۋ;
وڭىردە جاريا تۇلعا بولۋ;
كاسىپكەرلەر اراسىندا جانە قوعامدا وڭ بەدەلگە يە بولۋ;
بيزنەسىنىڭ تاريحى وڭ بولۋى;
الەۋمەتتىك جاۋاپتى كاسىپكەر بولۋ;
وبلىستىق، قالالىق ءماسليحاتتاردىڭ دەپۋتاتى بولۋى قۇپتالادى;
زاڭمەن بەلگىلەنگەن تارتىپتە وتەلمەگەن نەمەسە الىنباعان سوتتىلىعىنىڭ بولماۋى.

ايتا كەتەيىك، قۇجاتتاردى وفلاين نىساندا شىمكەنت قالاسى كاسىپكەرلەر پالاتاسىنا (شىمكەنت ق.، «سولتۇستىك-شىعىس» ى/ا، ەرىمبەتوۆ كوشەسى، 304 گ، «زاڭعار» بيزنەس ورتالىعى، 2-قابات) نەمەسە ونلاين نىساندا vote.atameken.kz سايتى ارقىلى جىبەرە الادى. سونداي-اق 1432 Call-ورتالىعىنان الۋعا بولادى. شىمكەنت قالاسى كاسىپكەرلەر پالاتاسىنىڭ بايلانىس تەلەفوندارى: 8 /7252/ 39-49-77, 8 707 107 00 13.

شىمكەنت

پىكىرلەر