ونىڭ سوزىنشە، قىزمەتىنەن كەتۋ جايلى شەشىمدى ول ءبىر كۇندە قابىلداماعان. ال الداعى ۋاقىتتا اعارتۋشىلىق، شىعارماشىلىق قىزمەتپەن الاڭسىز اينالىسىپ، ەلىنە قىزمەت ەتۋدى جالعاستىرۋدى جوسپارلاپ وتىر.
"شىمكەنت قالاسى اكىمدىگىنەن جۇمىستان شىقتىم. اكىمنىڭ ءبىرىنشى ورىنباسارى لاۋازىمىنا سوناۋ كوۆيد ءورشىپ تۇرعان داعدارىس كەزىندە، 2020 جىلعى شىلدە ايىندا كەلىپ ەدىم. ەكى جارىم جىلعا جۋىق جۇمىس ىستەپپىن. ودان بەرى نەبىر قىزىق، نەبىر قيىنشىلىق ءوتتى. ونىڭ ىشىندە ارينە قاڭتاردىڭ ورىنى ەرەك. بۇل شەشىم ءبىر كۇندە تۋعان جوق. ءبىرازدان بەرى ءپىسىپ جەتىلدى. بىرگە قىزمەتتەس بولعان ارىپتەستەر مەن ۇجىمعا بەك راقمەت! ازىرشە اعارتۋشىلىق پەن شىعارماشىلىققا دەن قويماقپىن. اسىلى، مەملەكەتتىك قىزمەتتەن تىس ءجۇرىپ تە مەملەكەتكە قىزمەت ەتۋگە بولادى", - دەپ جازدى شىڭعىس مۇقان.
ورايى كەلگەندە ايتا كەتەيىك، شىڭعىس مۇقان شىمكەنت اكىمىنىڭ ءبىرىنشى ورىنباسارى لاۋازىمىنا 2020 جىلعى 29 شىلدەدە تاعايىندالدى. ەڭبەك جولىن "جاس الاش" گازەتىندە ءتىلشى بولىپ باستاعان. ءار جىلدارى ەنەرگەتيكا جانە مينەرالدى رەسۋرستار مينيسترلىگىنىڭ ءباسپاسوز حاتشىسى، "جايىق-پرەسس" جشس-ءىنىڭ باس ديرەكتورى، باتىس قازاقستان وبلىسى اكىمى اپپاراتى باسشىسىنىڭ ورىنباسارى، پرەزيدەنتى اكىمشىلىگىنىڭ ىشكى ساياسات ءبولىمىنىڭ سەكتور مەڭگەرۋشىسى، اتىراۋ وبلىسى اكىمىنىڭ ورىنباسارى، KazPetroDrilling اق-نىڭ كورپوراتيۆتىك دامۋ بويىنشا ۆيتسە-پرەزيدەنتى، "مازمۇنداما" قوعامدىق قورىنىڭ توراعاسى قىزمەتتەرىن اتقارعان.
شىڭعىس مۇقانعا جاڭا بەلەستى ەڭسەرۋ مەن ەلىنە قىزمەت ەتۋ جولىندا تولايىم تابىس تىلەيمىز! ابىرويى اسقاق، مەرەيى ۇستەم بولسىن!
"ادىرنا" ۇلتتىق پورتالى
