2026 جىلعى 19 اقپاندا قازاقستان رەسپۋبليكاسى ورتالىق سايلاۋ كوميسسياسى (وسك) جانىنداعى مۇگەدەكتىگى بار ادامداردىڭ سايلاۋ قۇقىقتارىن قامتاماسىز ەتۋ جونىندەگى جۇمىس توبىنىڭ وتىرىسى ءوتتى. جيىندا سايلاۋ ۋچاسكەلەرىن قولجەتىمدى ەتۋ بويىنشا بىرقاتار شارالار مەن پيلوتتىق جوبالار تالقىلاندى.
وسك حابارلاۋىنشا، ەلەكتورالدىق ناۋقاندار كەزىندە ۋچاسكەلەردى ءبىرىنشى قاباتتا ورنالاستىرۋ، پاندۋستار، كوتەرگىش قۇرىلعىلار، تاكتيلدى باعىتتاعىشتار، شاقىرۋ باتىرمالارى جانە اۆتوكولىكتەرگە ارنالعان ارنايى تۇراق ورىندارىمەن جابدىقتاۋ ارقىلى مۇگەدەكتىگى بار ازاماتتار ءۇشىن قاجەتتى ينفراقۇرىلىم قامتاماسىز ەتىلۋدە.
اۋماقتىق كوميسسيالار مالىمەتىنە سايكەس، ۋچاسكەلەردە مۇگەدەكتىگى بار ادامدارعا ارنالعان بۇرىشتار ۇلكەنەيتكىشتەر، قۇلاققاپتار، ارنايى داۋىس بەرۋ كابينالارى جانە اقپاراتتىق ماتەريالدارمەن جابدىقتالعان. سونىمەن قاتار، كورۋ قابىلەتى بۇزىلعاندارعا اۋديواقپارات، ەستۋ قابىلەتى تومەن ازاماتتارعا سۋردواۋدارمامەن بەينەماتەريالدار، كرەسلو-اربامەن جۇرەتىندەرگە بەيىمدەلگەن اقپاراتتىق ماتەريالدار ۇسىنىلادى.
رەفەرەندۋمعا ارنالعان شاقىرۋ قاعازدارى QR-كودپەن ازىرلەنىپ، ۇيلەردى ارالاۋ بارىسىندا ازاماتتاردىڭ ارنايى قىزمەتتەرگە قاجەتتىلىگى ناقتىلاناتىن بولادى. بيۋللەتەندەردە برايل قارپىمەن ترافارەتتەر، اۋديوبيۋللەتەندەر بارلىق سايلاۋ ۋچاسكەلەرىندە قولجەتىمدى بولادى. سونىمەن قاتار كونستيتۋتسيا جوباسىنىڭ اۋديونۇسقاسى دا ورنالاستىرىلاتىن بولادى.
جيىندا سونداي-اق بارلىق دەڭگەيدەگى رەفەرەندۋم كوميسسيالارىنىڭ مۇشەلەرى ءۇشىن مۇگەدەكتىگى بار ادامداردىڭ سايلاۋ قۇقىقتارىن قامتاماسىز ەتۋ ماسەلەلەرى بويىنشا بەينەكۋرس ۇيىمداستىرىلعانى حابارلاندى.
اقتوبە جانە پاۆلودار وبلىستارىنىڭ تاجىريبەسى بويىنشا ۋچاسكەلەردە ەلەكتروندىق ۇلكەيتكىشتەر، يندۋكتسيالىق ىلمەكتەر، جارىقتىق جانە دىبىستىق اقپاراتتاندىرعىشتار، سونداي-اق برايل قارپىمەن كورسەتىلگەن ۋچاسكە سىزبالارى قولدانىلۋدا. بۇل تاجىريبەلەردى باسقا وڭىرلەردە ەنگىزۋ جۇمىستارى جەرگىلىكتى اتقارۋشى ورگاندارمەن بىرلەسىپ پىسىقتالۋدا.
