ەكى وكپەدەن قىسقان قاتەرلى دەرت حالىققا وڭاي تيمەۋدە. توتەننەن جابىسقان اۋرۋدىڭ نە ەكەنىن ۇقپاعان جۇرت دارىگەرلەردەن، قالا بەردى بيلىكتەن ءۇمىت كۇتۋدە. حالىق دارىگەرلەردەن ءۇمىت كۇتسە، دارىگەرلەر كىمنەن كومەك كۇتەرىن بىلمەي دال. "ەت ساسىسا تۇز سەبەسىڭ، تۇز ساسىسا نە سەبەسىڭ"?
اتى-ءجونىن اتاماۋدى سۇراعان دارىگەر الماتىداعى اۋرۋحانالارداعى مۇشكىل جاعدايدى بايانداپ بەردى. اتى ءجونىن جاسىرعان دارىگەردىڭ جاعدايىن ءبىز دە تۇسىندىك. جاڭادان كەلگەن دەنساۋلىق ءمينيسترى وسى ىندەتكە بايلانىستى جاعىمسىز اقپارات بەرگەن دارىگەرلەردى جۇمىستان قۋاتىنىن جانە زاڭعا تارتاتىنىن ايتىپ قورقىتقانىن كەشەدەن بەرى الەم جەلى جازىپ جاتىر.
ء"بىز دارىگەرلەر نە ىستەرىمىزدى بىلمەي وتىرمىز. اۋىرىپ جاتقان ادامدار وتە كوپ. ون جەتى جاستاعى بالالارعا دەيىن پنەۆمونيا بولىپ جاتىر. بۇل نە سۇمدىق؟ ۇكىمەت ەشتەڭەگە دايىن ەمەس. حالىققا وبال بولدى. قولدان كەلەر قايران جوق. وكپەنىڭ قابىنۋىمەن (پنەۆمونيا) اۋىرعان ادامدار كوروناۆيرۋسقا تەست تاپسىرسا كوپشىلىگىنەن اۋرۋ بەلگىسى شىعىپ جاتىر. ون ادام كەلدى، سونىڭ جەتەۋى كوروناۆيرۋس. وسى اپتا اۋرۋ ەندى قوزا باستاعاندا كەلگەن اۋرۋلاردىڭ ءبارىن قابىلدادىق. ناۋقاستاردىڭ كوپتىگىنەن كابينەتىمىزدى تازالاپ ۇلگەرە الماي جاتىرمىز. ناتيجەسىندە مەديتسينا قىزمەتكەرلەرىنىڭ جەتپىس پايىزى ۆيرۋس جۇقتىردى. سوندا دا جۇمىس ىستەپ جاتىر. اۋرۋ حالىقتى اجالمەن بەتپە بەت تاستاپ كەتپەيدى عوي. اۋرۋحانادا ورىن جوقتىعى سەبەبىنەن قاشىقتىقتان ەمدەۋگە كوشتىك. ءبىز ناۋقاستارعا جازىپ بەرگەن دارىلەر اۋرۋحانا تۇرماق، اپتەكالاردا جوق . سوڭعى ەكى اپتادا اپتەكادا، اۋرۋحانادا ءدارى جوق. ىشكى قان تامىرلارىنا جىبەرەتىن سيستەمالار مەن ۋكولدار ول دا جوق. كۇندىزگى ستاتسيونارلار ىستەمەيدى. جەدەل جاردەم ناۋقاستاردى ۋچاستكەلىك دارىگەرلەرگە ۇيدەن ەمدەڭدەر دەيدى. ءبىزدىڭ ۇستىمىزدە ۆيرۋسقا قارسى قورعانىش كيىمدەرىمىز دە جوق. ناۋقاس ادامدارعا ۋكول مەن سيستەما سالاتىن مەدبيكەنى وزدەرىڭ تاپ دەگەننەن باسقا امالىمىز جوق.
- دارىگەرلەردىڭ وسى قاتەرلى ىندەتكە بايلانىستى جالاقىسىن وسىرەمىز دەپ ەدى؟
- ەشقانداي قوسىمشا اقشا العان جوقپىز. سول بۇرىنعى جالاقىمىزبەن جۇمىس ىستەپ جاتىرمىز. بىزگە قازىر اقشا ماڭىزدى ەمەس، حالىقتى امان الىپ قالۋ كەرەك بولىپ تۇر. نە دارىگەر جەتىسپەيدى، نە ءدارى جوق. حالىق قالاي امان قالادى ەكەن؟
مىنە، ايتارىم كوپ ەدى، بىراق وسىدان اق جاعدايدىڭ قانداي ەكەنىن تۇسىنگەن شىعارسىز دەگەن دارىگەردىڭ سوزىنەن كەيىن شىنىمەن ويلانىپ قالدىق. اجالمەن كۇندەلىكتى بەتپە بەت كەلىپ جۇرگەن اق حالاتتى ابزال جانداردىڭ رۋحى سىنباسا ەكەن. راسىمەن دە نە ەمدەۋشىسى جوق، نە ءدارىسى جوق حالىق قايتەدى؟
اتى جامان ىندەتكە بولىنگەن ميلليارد دوللارلار ول ەندى بولەك اڭگىمە. حالىقتىڭ ەمەس، بيلىكتىڭ سالعىرتتىعىنان (ەگەر ول سالعىرتتىق دەگەن ولشەمگە كەلسە) قانشاما ادام ءدال قازىرگى ساتتە اجال ارانىندا جاتسا، قانشاسى بۇل دۇنيەمەن قوشتاستى. اكىم مەن مينيستر ارالاعاندا تولىپ تۇراتىن اپتەكالاردان كوروناۆيرۋستىڭ ءدارىسىن قويىپ، باستىڭ ءدارىسىن تاپپايسىڭ.
وڭعار قابدەن،
"ادىرنا" ۇلتتىق پورتالى
