Dáriger joq. Dári joq. Halyq qaıtpek?

18614
Adyrna.kz Telegram

Eki ókpeden qysqan qaterli dert halyqqa ońaı tımeýde. Tótennen jabysqan aýrýdyń ne ekenin uqpaǵan jurt dárigerlerden, qala berdi bılikten úmit kútýde. Halyq dárigerlerden úmit kútse, dárigerler kimnen kómek kúterin bilmeı dal. "Et sasysa tuz sebesiń, tuz sasysa ne sebesiń"?

Aty-jónin atamaýdy suraǵan dáriger Almatydaǵy aýrýhanalardaǵy múshkil jaǵdaıdy baıandap berdi. Aty jónin jasyrǵan dárigerdiń jaǵdaıyn biz de túsindik. Jańadan kelgen Densaýlyq mınıstri osy indetke baılanysty jaǵymsyz aqparat bergen dárigerlerdi jumystan qýatynyn jáne zańǵa tartatynyn aıtyp qorqytqanyn kesheden beri álem jeli jazyp jatyr.

"Biz dárigerler ne isterimizdi bilmeı otyrmyz. Aýyryp jatqan adamdar óte kóp. On jeti jastaǵy balalarǵa deıin pnevmonııa bolyp jatyr. Bul ne sumdyq? Úkimet eshteńege daıyn emes. Halyqqa obal boldy. Qoldan keler qaıran joq. Ókpeniń qabynýymen (pnevmonııa) aýyrǵan adamdar koronavırýsqa test tapsyrsa kópshiliginen aýrý belgisi shyǵyp jatyr. On adam keldi, sonyń jeteýi koronavırýs. Osy apta aýrý endi qoza bastaǵanda kelgen aýrýlardyń bárin qabyldadyq. Naýqastardyń kóptiginen kabınetimizdi tazalap úlgere almaı jatyrmyz. Nátıjesinde medıına qyzmetkerleriniń jetpis paıyzy vırýs juqtyrdy. Sonda da jumys istep jatyr. Aýrý halyqty ajalmen betpe bet tastap ketpeıdi ǵoı. Aýrýhanada oryn joqtyǵy sebebinen qashyqtyqtan emdeýge kóshtik. Biz naýqastarǵa jazyp bergen dáriler aýrýhana turmaq, aptekalarda joq . Sońǵy eki aptada aptekada, aýrýhanada dári joq. Ishki qan tamyrlaryna jiberetin sıstemalar men ýkoldar ol da joq. Kúndizgi staıonarlar istemeıdi. Jedel járdem naýqastardy ýchastkelik dárigerlerge úıden emdeńder deıdi. Bizdiń ústimizde vırýsqa qarsy qorǵanysh kıimderimiz de joq. Naýqas adamdarǵa ýkol men sıstema salatyn medbıkeni ózderiń tap degennen basqa amalymyz joq.

- Dárigerlerdiń osy qaterli indetke baılanysty jalaqysyn ósiremiz dep edi? 

- Eshqandaı qosymsha aqsha alǵan joqpyz. Sol burynǵy jalaqymyzben jumys istep jatyrmyz. Bizge qazir aqsha mańyzdy emes, halyqty aman alyp qalý kerek bolyp tur. Ne dáriger jetispeıdi, ne dári joq. Halyq qalaı aman qalady eken?

Mine, aıtarym kóp edi, biraq osydan aq jaǵdaıdyń qandaı ekenin túsingen shyǵarsyz degen dárigerdiń sózinen keıin shynymen oılanyp qaldyq. Ajalmen kúndelikti betpe bet kelip júrgen aq halatty abzal jandardyń rýhy synbasa eken. Rasymen de ne emdeýshisi joq, ne dárisi joq halyq qaıtedi?

Aty jaman indetke bólingen mıllıard dollarlar ol endi bólek áńgime. Halyqtyń emes, bıliktiń salǵyrttyǵynan (eger ol salǵyrttyq degen ólshemge kelse) qanshama adam dál qazirgi sátte ajal aranynda jatsa, qanshasy bul dúnıemen qoshtasty. Ákim men mınıstr aralaǵanda tolyp turatyn aptekalardan koronavırýstyń dárisin qoıyp, bastyń dárisin tappaısyń.

Ońǵar Qabden,

"Adyrna" ulttyq portaly

 

Pikirler