سوڭعى كەزدە الەۋمەتتىك جەلىلەردە تۇركىستاندا بەلگىسىز دەرتتەن ادام ءولىمى كوبەيگەنى جايلى اقپارات كەزىپ كەتتى. بەلگىسىز ىندەت دەيتىنى تۇماۋ ما، پنەۆمونيا ما، كوروناۆيرۋس پا ءوزىمىز بىلمەيمىز دەگەن تۇرعىندار اۋرۋحانالاردا ورىن جوق، دارىگەرلەر قارامايدى، ءدارى-دارمەك تاپشى دەپ مالىمدەگەن بولاتىن. بۇگىن "ادىرنا" ۇلتتىق پورتالىنىڭ تىلشىسىنە تۇركىستان وبلىستىق قوعامدىق دەنساۋلىق باسقارماسى رەسمي جاۋاپ بەردى. بۇل اقپاراتتاردىڭ قاۋەسەت، شىنجدىققا جاناسپايتىندىعىن ايتقان دەنساۋلىق باسقارماسى جۇرتتى جەل سوزگە سەنبەۋگە شاقىردى.
"قازىرگى تاڭدا تۇركىستان قالالىق ورتالىق اۋرۋحاناسىندا پنەۆمونيامەن 291 ادام ەم قابىلداۋدا. 298 ناۋقاس جازىلىپ شىقتى.
الەۋمەتتىك جەلىلەردە اۋرۋحانا جابىلدى جانە ورىن جوق دەپ تاراعان اقپارات جالعان. تۇركىستان قالالىق ورتالىق اۋرۋحاناسىندا قوسىمشا 220 توسەك ورىندىق پروۆيزورلىق ستاتسيونار قىزمەت كورسەتۋدە. 54 دارىگەر، 109 ورتا بۋىن جانە 59 كىشى بۋىن قىزمەتكەرلەرى كۇنى-ءتۇنى ناۋقاستارعا ەمدىك شارالارىن ايانباي كورسەتىپ كەلەدى. ناۋقاستاردى ەمدەۋگە قوسىمشا وڭىردەگى مەديتسينالىق ۇيىمداردان 3 رەانيموتولوگ-دارىگەر، 1 ەپيدەميولوگ جانە مەيىربيكەلەر مەن تازالىقشىلار جۇمىلدىرىلعان.
اۋرۋحانالارعا ءدارى-دارمەك قورى اي سايىن ءبولىنىپ وتىرادى. قازىرگى جاعدايدا ءبىر ايعا بولىنگەن ءدارى-دارمەك تاۋسىلعاندىقتان، قوردان قوسىمشا ءدارى-دارمەكتەر جەتكىزىلگەن. ناۋقاستارعا ءدارى-دارمەك جەتكىلىكتى. تۇرعىنداردان سابىر ساقتاپ، ەڭ باستىسى كارانتين رەجيمىن قاداعالاۋلارىن سۇرانامىز" دەيدى تۇركىستان وبلىستىق قوعامدىق دەنساۋلىق باسقارماسىنىڭ ءباسپاسوز قىزمەتى.
تۇركىستان وبلىسى قوعامدىق دەنساۋلىق باسقارماسى باسشىسىنىڭ ورىنباسارى نۇرحان نارىمبەتوۆا بولسا بۇل اۋرۋدىڭ تىنىس الۋ جولىنان قيىندىق كورىپ جۇرگەن ناۋقاستارعا وڭاي سوقپايتىنىن ايتتى.
"ادىرنا" ۇلتتىق پورتالى
