نەفەدوۆا حانىم پاتەرىن نەشە تەڭگەگە جەكەشەلەندىردى؟!

2577

ەكىباستۇز قالاسى قالا اكىمىنىڭ ورىنباسارى ناتاليا نەفەدوۆا ءۇشىن كادىمگىدەي مايشەلپەك بولىپ تۇر.
نەگە دەسەڭىز، بۇل جەردە بۇل حانىمنىڭ «اق دەگەنى – العىس، قارا دەگەنى – قارعىس»، قولاستىنداعى ءبولىم باسشىلارىنىڭ ءبارى ءلاببايلاپ ايتقانىن ىستەيدى.
مايشەلپەك دەۋىمىزدىڭ ءبىر سەبەبى – مەملەكەتتىك قىزمەتتەگى اسا ءبىر كۇردەلى سالا – الەۋمەتتىك سالانى باسقارىپ وتىرعانىنا قاراماستان، ناتاليا ۆلاديميروۆنا قانىش ساتباەۆ اتىنداعى ەكىباستۇز ينجەنەرلىك-تەحنيكالىق ينستيتۋتتان جالاقى الىپ وتىر.
وسىدان ءبىرشاما ۋاقىت بۇرىن قازاق ءتىلدى سايتتاردىڭ بىرىندە نەفەدوۆا حانىمنىڭ قالالىق ءماسليحات دەپۋتاتتارىنا ءوز ءسوزىن وتكىزە الاتىندىعى تىلگە تيەك ەتىلگەنىن كوزىمىز شالعان. ەكىباستۇز ينجەنەرلىك-تەحنيكالىق ينستيتۋتى قالالىق ءماسليحات دەپۋتاتى داليدا سيۆاراكشا حانىمنىڭ اكەسى اشقان جانە دەپۋتات حانىمنىڭ ءوزى دە ەڭبەك ەتىپ جاتقان ءبىلىم ورنى بولعانىن ەسكەرسەك، وندا بۇل جەردەن دە تاعى ءبىر دەپۋتاتپەن دوستىقتىڭ ۇشىعى اڭعارىلاتىنداي...
مىنە، كوروناۆيرۋستىڭ شاحتەرلار قالاسىندا نە سەبەپتى تارالىپ جاتقانىنىڭ ءبىر سىرىن وسىدان دا بايقاۋعا بولادى، شاماسى، نەفەدوۆا حانىمنىڭ كوروناۆيرۋستىڭ الدىن الۋمەن اينالىسۋعا ساباقتان قولى تيمەيتىن بولسا كەرەك...
جالاقى دەگەن جاي عوي، ودان دا سوراقى جايتتى كوپشىلىك نازارىنا ۇسىنباسقا امال جوق: بيىل كوكتەمدە نەفەدوۆا حانىم لاۋازىمدىق ابىروي-بەدەلىن پايدالانىپ ەكىباستۇزدا ەكى بولمەلى پاتەردى جەكەشەلەندىرىپ الدى. دالىرەك ايتساق، اۋەزوۆ كوشەسى، 79 مەكەنجايىنان، ياعني، ەكىباستۇزدىڭ ورتالىعىنداعى جاقسى ۇيدەن.
وزدەرىڭىز بىلەسىزدەر، ادەتتە جوق-جىتىك، ناقتى مۇقتاج جاندارعا شەت جاقتان، ءوڭ-ءتۇسى جوق، تالىق-تۇلىق ۇيلەردەن بەرىلەدى. ال اكىمنىڭ ورىنباسارى جوق-جىتىكتى بىلاي ىسىرىپ، جاقسىسىن ءوزى الدى. ەكىباستۇزعا كەلگەنىنە ەكى-ءۇش جىل عانا بولعانىنا قاراماستان!
ءبىراز ۋاقىت بۇرىن وسى حانىمنىڭ كوپ بالالى انالاردىڭ بالا تابۋىن جاقتىرتپاعانى جايلى دا ءسوز شىققان. جاقتىرتپايتىن ءجونى بار. ولار ءۇي سۇراۋىن قويماسا، مەمقىزمەتكەردىڭ وزىنە پاتەر تيمەس ەدى عوي.
قر «تۇرعىن ءۇي قاتىناستارى تۋرالى» زاڭىنا جۇگىنسەك، مەملەكەتتiك قىزمەتشiلەر مەن بيۋدجەتتiك ۇيىمداردىڭ، مەملەكەتتىك كاسىپورىنداردىڭ جۇمىسكەرلەرi, عارىشكەرلىككە كانديداتتار، عارىشكەرلەر، مەملەكەتتiك سايلانبالى قىزمەت اتقاراتىن ادامدار، ەگەر ولار مەملەكەتتiك قىزمەتتە، مەملەكەتتىك كاسىپورىندا نەمەسە بيۋدجەتتiك ۇيىمداردا (مەملەكەتتiك سايلانبالى قىزمەتتە بولۋ مەرزiمiن قوسا العاندا) كەمiندە ون جىل (جيىنتىعىندا) جۇمىس iستەسە، سونداي-اق، ەگەر ەڭبەك قاتىناستارى مىناداي نەگىزدەر بويىنشا:
1) ۇيىمنىڭ تاراتىلۋى، قىزمەتكەرلەر سانىنىڭ نەمەسە شتاتىنىڭ قىسقارتىلۋى بويىنشا;
2) ودان ءارi جۇمىس iستەۋگە كەدەرگi كەلتiرەتiن سىرقاتىنا بايلانىستى;
3) زەينەتكەرلىككە شىعۋىنا بايلانىستى توقتاتىلسا، جۇمىس iستەگەن مەرزiمiنە قاراماستان، وزدەرi تۇراتىن قىزمەتتىك تۇرعىنجايلارعا تەڭەستىرىلگەن تۇرعىنجايلاردى قالدىق قۇنى بويىنشا جەكەشەلەندiرە الادى.
ءبىر قاراعاندا، نەفەدوۆا حانىمنىڭ پاتەردى جەكەشەلەندىرۋىندە تۇرعان دانەڭە جوق سياقتى. بىراق ونىڭ ەكى بولمەلى پاتەردى قانداي نەگىزدە العانى تۇسىنىكسىز. جانە ەكىباستۇزعا كەلگەنىنە ەكى-ءۇش-اق جىل بولعانىنا قاراماستان... سونىمەن قاتار، تۇرعىن ءۇي كوميسسياسى نازارىنا ونىڭ پاتەر ءۇشىن قانداي سوما تولەيتىنى، ياعني، پاتەر قۇنى ۇسىنىلماعان. ياعني، مۇندا دا جاسىرىن بىردەڭە بار. نەفەدوۆانىڭ بيلىك باسىندا وتىرعان كەزىندە پاتەر قۇنىن قولدان قۇلدىراتىپ الماعانىن قايدان بىلەمىز؟
زاڭنىڭ 13 بابىنا سايكەس، مەملەكەتتiك تۇرعىن ءۇي قورىنان تۇرعىن ءۇيدi جالداۋشى كامەلەتكە تولعان وتباسى مۇشەلەرiنiڭ كەلiسiمiمەن جانە كامەلەتكە تولماعانداردىڭ قۇقىقتارىن ەسكەرە وتىرىپ، تۇرعىن ءۇيدi وسى زاڭدا كوزدەلگەن شارتتارمەن جانە قازاقستان رەسپۋبليكاسىنىڭ ۇكىمەتى ايقىندايتىن تارتiپپەن قالدىق قۇنى بويىنشا جەكەشەلەندiرۋگە قۇقىلى. ەكىباستۇز قالالىق قارجى ءبولىمى ورتالىقتا ورنالاسقان تاماشا پاتەردىڭ قالدىق قۇنىن قانشاعا باعالادى ەكەن؟!
ءبىزدىڭ پايىمىمىزشا، اكىمنىڭ ورىنباسارى ادىلەت ورگانىندا پاتەرىن ءالى تىركەمەگەن بولار. سەبەبى وعان قازىر ءوزىنىڭ پاتەر العانىن جۇرت كوزىنە ءتۇسىرۋ قيسىنسىز. كىلتيپان شىعىپ قالسا قايتەدى؟ تاقىرىپ ابدەن ۇمىت بولىپ، ەل جادىنان وشكەن سوڭ، ون جىل وتكەن سوڭ دا راسىمدەسە بولماي ما؟! مۇنى ەندى قۇزىرلى ورگاندار قۇزىرەتىنە تاپسىردىق...

اسۋان تايجان،

پاۆلودار وبلىسى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى