Nefedova hanym páterin neshe teńgege jekeshelendirdi?!

5311
Adyrna.kz Telegram

Ekibastuz qalasy qala ákiminiń orynbasary Natalıa Nefedova úshin kádimgideı maıshelpek bolyp tur.
Nege deseńiz, bul jerde bul hanymnyń «aq degeni – alǵys, qara degeni – qarǵys», qolastyndaǵy bólim basshylarynyń bári lábbaılap aıtqanyn isteıdi.
Maıshelpek deýimizdiń bir sebebi – memlekettik qyzmettegi asa bir kúrdeli sala – áleýmettik salany basqaryp otyrǵanyna qaramastan, Natalıa Vladımırovna Qanysh Sátbaev atyndaǵy Ekibastuz ınjenerlik-tehnıkalyq ınstıtýttan jalaqy alyp otyr.
Osydan birshama ýaqyt buryn qazaq tildi saıttardyń birinde Nefedova hanymnyń qalalyq máslıhat depýtattaryna óz sózin ótkize alatyndyǵy tilge tıek etilgenin kózimiz shalǵan. Ekibastuz ınjenerlik-tehnıkalyq ınstıtýty qalalyq máslıhat depýtaty Dalıda Sıvaraksha hanymnyń ákesi ashqan jáne depýtat hanymnyń ózi de eńbek etip jatqan bilim orny bolǵanyn eskersek, onda bul jerden de taǵy bir depýtatpen dostyqtyń ushyǵy ańǵarylatyndaı...
Mine, koronavırýstyń shahterlar qalasynda ne sebepti taralyp jatqanynyń bir syryn osydan da baıqaýǵa bolady, shamasy, Nefedova hanymnyń koronavırýstyń aldyn alýmen aınalysýǵa sabaqtan qoly tımeıtin bolsa kerek...
Jalaqy degen jaı ǵoı, odan da soraqy jaıtty kópshilik nazaryna usynbasqa amal joq: bıyl kóktemde Nefedova hanym laýazymdyq abyroı-bedelin paıdalanyp Ekibastuzda eki bólmeli páterdi jekeshelendirip aldy. Dálirek aıtsaq, Áýezov kóshesi, 79 mekenjaıynan, ıaǵnı, Ekibastuzdyń ortalyǵyndaǵy jaqsy úıden.
Ózderińiz bilesizder, ádette joq-jitik, naqty muqtaj jandarǵa shet jaqtan, óń-túsi joq, talyq-tulyq úılerden beriledi. Al ákimniń orynbasary joq-jitikti bylaı ysyryp, jaqsysyn ózi aldy. Ekibastuzǵa kelgenine eki-úsh jyl ǵana bolǵanyna qaramastan!
Biraz ýaqyt buryn osy hanymnyń kóp balaly analardyń bala tabýyn jaqtyrtpaǵany jaıly da sóz shyqqan. Jaqtyrtpaıtyn jóni bar. Olar úı suraýyn qoımasa, memqyzmetkerdiń ózine páter tımes edi ǵoı.
QR «Turǵyn úı qatynastary týraly» Zańyna júginsek, memlekettik qyzmetshiler men bıýdjettik uıymdardyń, memlekettik kásiporyndardyń jumyskerleri, ǵaryshkerlikke kandıdattar, ǵaryshkerler, memlekettik saılanbaly qyzmet atqaratyn adamdar, eger olar memlekettik qyzmette, memlekettik kásiporynda nemese bıýdjettik uıymdarda (memlekettik saılanbaly qyzmette bolý merzimin qosa alǵanda) keminde on jyl (jıyntyǵynda) jumys istese, sondaı-aq, eger eńbek qatynastary mynadaı negizder boıynsha:
1) uıymnyń taratylýy, qyzmetkerler sanynyń nemese shtatynyń qysqartylýy boıynsha;
2) odan ári jumys isteýge kedergi keltiretin syrqatyna baılanysty;
3) zeınetkerlikke shyǵýyna baılanysty toqtatylsa, jumys istegen merzimine qaramastan, ózderi turatyn qyzmettik turǵynjaılarǵa teńestirilgen turǵynjaılardy qaldyq quny boıynsha jekeshelendire alady.
Bir qaraǵanda, Nefedova hanymnyń páterdi jekeshelendirýinde turǵan dáneńe joq sııaqty. Biraq onyń eki bólmeli páterdi qandaı negizde alǵany túsiniksiz. Jáne Ekibastuzǵa kelgenine eki-úsh-aq jyl bolǵanyna qaramastan... Sonymen qatar, turǵyn úı komıssııasy nazaryna onyń páter úshin qandaı soma tóleıtini, ıaǵnı, páter quny usynylmaǵan. Iaǵnı, munda da jasyryn birdeńe bar. Nefedovanyń bılik basynda otyrǵan kezinde páter qunyn qoldan quldyratyp almaǵanyn qaıdan bilemiz?
Zańnyń 13 babyna sáıkes, memlekettik turǵyn úı qorynan turǵyn úıdi jaldaýshy kámeletke tolǵan otbasy músheleriniń kelisimimen jáne kámeletke tolmaǵandardyń quqyqtaryn eskere otyryp, turǵyn úıdi osy Zańda kózdelgen sharttarmen jáne Qazaqstan Respýblıkasynyń Úkimeti aıqyndaıtyn tártippen qaldyq quny boıynsha jekeshelendirýge quqyly. Ekibastuz qalalyq qarjy bólimi ortalyqta ornalasqan tamasha páterdiń qaldyq qunyn qanshaǵa baǵalady eken?!
Bizdiń paıymymyzsha, ákimniń orynbasary ádilet organynda páterin áli tirkemegen bolar. Sebebi oǵan qazir óziniń páter alǵanyn jurt kózine túsirý qısynsyz. Kiltıpan shyǵyp qalsa qaıtedi? Taqyryp ábden umyt bolyp, el jadynan óshken soń, on jyl ótken soń da rásimdese bolmaı ma?! Muny endi quzyrly organdar quzyretine tapsyrdyq...

Asýan Taıjan,

Pavlodar oblysy.

"Adyrna" ulttyq portaly

Pikirler