ءدىن ماسەلەلەرى وزەكتىلىگىن جويعان جوق

1537

ءدىن ماسەلەلەرى بويىنشا حالىقتىڭ عانا ەمەس،  اقپاراتتىق-ءتۇسىندىرۋ توپتارى مۇشەلەرىن قايتا دايارلاۋ جانە بىلىكتىلىگىن جەتىلدىرۋ جۇمىستارى ۇزدىكسىز جۇرگىزىلۋى كەرەك ەكەنى ءدىننىڭ اتىن جامىلىپ، ەلدە سوعىس وتىن تۇتاتقان سيرياداعى جاعداي تاعى دا دالەلدەدى. سوندىقتان بۇعان دەيىن ايرىقشا كوڭىل اۋدارىلماي كەلگەن بۇل جۇمىس سوڭعى جىلدارى بەلسەندى تۇردە قولعا الىنۋدا. ودان قازىر قازاقستان دا سىرت قالعان جوق.  حالىقتىڭ نىسانالى توپتارى اراسىندا ءدىن ماسەلەلەرى بويىنشا اقپاراتتىق-ءتۇسىندىرۋ جۇمىستارى مۇشەلەرىنىڭ قۇزىرەتتىلىگى مەن الەۋەتىن ارتتىرۋ جانە پروفيلاكتيكالىق جۇمىستا يننوۆاتسيالىق تاسىلدەردى ەنگىزۋ بويىنشا الەۋمەتتىك جوبا سونىڭ كورىنىسى دەۋگە بولادى. ماسەلەن، اقپارات جانە قوعامدىق دامۋ مينيسترلىگىنىڭ ءدىن ىستەرى كوميتەتىنىڭ مالىمەتىنە قاراعاندا ءدىني ەكسترەميزم مەن تەرروريزمنىڭ الدىن الۋ، حالىقتىڭ ءدىني ساۋاتتىلىعىن ارتتىرۋ بويىنشا  رەسپۋبليكا كولەمىندە 200-دەن استام اقپاراتتىق-ءتۇسىندىرۋ توپتارى بار ەكەن.

بريتان ەكونوميكا جانە بەيبىتشىلىك ينستيتۋتى جىل سايىن جاريالايتىن «Global Terrorism Index» رەيتينگىندە قازاقستان 2019 جىلى 160  ەلدىڭ ىشىندە ءوز كورسەتكىشىن 10 پۋنكتكە جاقسارتىپ 85-ساتىدان كورىندى. دەگەنمەن، بۇعان توقمەيىلسۋگە ءالى ەرتە. اتقارىلاتىن جۇمىس جەتكىلىكتى. ونى تەرروريزم قاۋىپىنىڭ تومەندىگى جاعىنان بىلتىر رەسەيدەن (37) عانا
ىلگەرى بولعانىمەن، قىرعىزستان (87), ءازىربايجان (103), وزبەكستان (135) ەلدەرىنىڭ الەمدىك رەيتينگتەگى كورسەتكىشى بىزدەن ىلگەرى ەكەنىنەن-اق بايقاۋعا بولادى.

«قازاقستان رەسپۋبليكاسىنداعى لاڭكەستىك جانە ەكسترەميزم ماسەلەلەرىن زەرتتەۋ ورتالىعى» قوعامدىق قورىنىڭ جەتەكشىسى كاكىمجان بيشمانوۆتىڭ ايتۋىنشا،  قر اقپارات جانە قوعامدىق دامۋ مينيسترلىگىنىڭ ءدىن ىستەرى كوميتەتى قولداۋىمەن ناۋرىز ايىندا باستالعان بۇل جوبا قاراشاعا دەيىن سوزىلادى.  «ازاماتتىق باستامالاردى قولداۋ ورتالىعى» كەاق  «ءدىن ماسەلەلەرى بويىنشا اقپاراتتىق-ءتۇسىندىرۋ توپتارىنىڭ مۇشەلەرىن دايارلاۋ جانە قايتا دايارلاۋ بويىنشا جۇمىستاردى ۇيىمداستىرۋ» گرانتى اياسىندا جۇزەگە اسىرىلاتىن جوبانىڭ مىندەتتەرى ايقىن.

ءبىرىنشى، ەلىمىزدىڭ 17 وڭىرىندە ءدىن ماسەلەلەرى جونىندە وڭىرلىك اقپاراتتىق-ءتۇسىندىرۋ توپتارى (اتت) مۇشەلەرى ءۇشىن كوشپەلى وقىتۋ كۋرستارى ۇيىمداستىرىلىپ، اتاۋلى جۇمىستى وتكىزۋ بويىنشا يننوۆاتسيالىق ادىستەر قولدانىلادى.

ەكىنشى، اتاۋلى توپتارىمەن جۇمىس ىستەۋ ءۇشىن ءدىن ماسەلەلەرى جونىندەگى وڭىرلىك اتت مۇشەلەرى ءۇشىن تيپتىك دارىستەر ماتەريالدار جيناعى مەن وقىتۋ ءۇشىن ادىستەمەلىك بازا جاسالىنادى.

ءۇشىنشى، ءاربىر اتاۋلى توپتىڭ ەرەكشەلىكتەرىن ەسكەرە وتىرىپ، شەشەندىك شەبەرلىك پەن كوپشىلىك الدىندا ءسوز سويلەۋ بويىنشا وڭىرلىك اتت مۇشەلەرى ءۇشىن ادىستەمەلىك ۇسىنىمدار ازىرلەنەدى.

ءتورتىنشى، ءدىن ماسەلەلەرى بويىنشا وڭىرلىك اتت مۇشەلەرى ءۇشىن ءدىن سالاسىنداعى وزەكتى ماسەلەلەر بويىنشا دارىستىك بەينەماتەريالدار دايىندالادى.

قوسىمشا اقپارات الۋ ءۇشىن كەلەسى بايلانىس تۇرلەرى ارقىلى حابارلاسۋعا بولادى: +7 701 715 01 96 نەمەسە bkm25@mail.ru.  سونىمەن قاتار ءبىزدىڭ رەسمي سايتىمىزدا www.antiterr.kz جانە #qogamgov, #cisc2020 حەشتەگى ارقىلى.

ەرلىك ەرجانۇلى

پىكىرلەر
رەداكتسيا تاڭداۋى