كوروناۆيرۋستان قايتىس بولعان ادامدى جەرلەپ جاتقان ماماندار.
تەلەارنانىڭ حابارلاۋىنشا، الماتى وبلىسى ىلە اۋدانى قاراوي اۋىلىندا كوروناۆيرۋستان قايتىس بولعاندار زيراتىندا 30 ءمايىت جەرلەنگەن. تەلەارنا بۇعان دالەل رەتىندە دروننان تۇسىرىلگەن ۆيدەونى كورسەتەدى. ۆيدەودا جولدىڭ ەكى جاعىنا جەرلەنگەن قابىرلەر كورىنەدى. (بىرىندە - مۇسىلمانشىلىق عۇرىپپەن، ەكىنشىسىندە حريستياندىق عۇرىپپەن جەرلەنگەن). ال رەسمي دەرەك بويىنشا، الماتى قالاسىندا 10 ادام كوروناۆيرۋستان قايتىس بولعان. الماتى وبلىسىندا كوروناۆيرۋسقا بايلانىستى ادام ءولىمى تىركەلمەگەن.
الماتى قالاسىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى تەلەارناعا جىبەرگەن رەسمي جاۋاپتا بۇل زيراتقا الماتى قالاسىنان 6 ادام جەرلەنگەنىن ايتقان.
دەپارتامەنت وكىلدەرى "كوروناۆيرۋس انىقتالعان ناۋقاستاردىڭ بارلىعىنا COVID-19 دياگنوزى قويىلادى، بىراق ولاردىڭ اراسىندا كوروناۆيرۋستان ەمەس، سوزىلمالى اۋرۋلاردان قايتىس بولعان سىرقاتتار دا بولادى. ءولىم-ءجىتىمنىڭ سەبەبىن تالداۋ كوميسسيانىڭ قورىتىندىسى بويىنشا، ءولىمنىڭ نەگىزگى سەبەپتەرى مەن دياگنوزى انىقتالادى. سول سەبەپتى قايتىس بولعانداردىڭ رەسمي سانى مەن جەرلەنگەندەردىڭ سانى سايكەس كەلمەۋى مۇمكىن" دەپ ايتقان.
وسى زيراتتا جەرلەنگەن 21 جاستاعى ايەلدىڭ تۋىستارىنىڭ ايتۋىنشا، كوروناۆيرۋس جۇققانى تۋرالى اقپاراتتى ايەل قايتىس بولعاننان كەيىن جاقىندارىنا ءبىر-اق حابارلاعان. اۋرۋحانادا ايەلدى كۇتكەن جاقىندارى دا وقشاۋلانباعان. قايتىس بولعاننان كەيىنگى تۇجىرىم قۇجاتىندا ايەلگە كوروناۆيرۋستان دا باسقا بىرنەشە دياگنوز قويىلعان. تۋىستارى رەسمي تۇجىرىمعا سەنبەي وتىر.
قازاقستان دەنساۋلىق ساقتاۋ مينيسترلىگى بۇعان دەيىن ايماقتاردا كوروناۆيرۋس جۇققان ادامداردىڭ ءولىمىن زەرتتەۋ بويىنشا ارنايى كوميسسيا قۇرىلىپ، ناۋقاستاردىڭ ءولىمىنىڭ سەبەبىن انىقتايدى دەپ حابارلاعان. ەگەر كوميسسيا ناۋقاس كوروناۆيرۋستان ەمەس، باسقا اۋرۋ تۇرىنەن قايتىس بولدى دەپ قورىتىندى شىعارسا، وندا ناۋقاس ءولىمى كوروناۆيرۋسقا بايلانىستى رەسمي ستاتيستيكاعا ەنگىزىلمەيدى.
دەگەنمەن رەسمي ورىندار ازىرگە رەسمي ستاتيستيكاعا ەنگىزىلمەگەن قانشا وقيعا بارىن ايتپادى. 20 مامىر كۇنگى ونلاين-بريفينگ كەزىندە قازاقستاننىڭ باس سانيتار دارىگەرى ايجان ەسماعامبەتوۆا "كارانتين شارالارى اياقتالعاننان كەيىن بارلىق دەرەك قورىن زەرتتەيمىز، سول كەزدە بارلىق كورسەتكىشتەن جاريالانادى" دەپ ايتقان بولاتىن.
الەمدە ءار مەملەكەت كوروناۆيرۋستان قايتىس بولعانداردى ارقالاي سانايدى. ءساۋىر ايىنىڭ ورتاسىندا دۇنيەجۇزىلىك دەنساۋلىق ساقتاۋ ۇيىمى كوروناۆيرۋستان قايتىس بولعانداردى قالاي ەسەپتەۋ قاجەتتىگى تۋرالى نۇسقاۋلىق شىعارعان.
"ازاتتىق" راديوسى
