BAQ: Koronavırýstan qaıtys bolǵandar zıratynda jerlengen máıitter sany resmı derekten úsh ese kóp

4330
Adyrna.kz Telegram

Koronavırýstan qaıtys bolǵan adamdy jerlep jatqan mamandar.

Telearnanyń habarlaýynsha, Almaty oblysy Ile aýdany Qaraoı aýylynda koronavırýstan qaıtys bolǵandar zıratynda 30 máıit jerlengen. Telearna buǵan dálel retinde dronnan túsirilgen vıdeony kórsetedi. Vıdeoda joldyń eki jaǵyna jerlengen qabirler kórinedi. (Birinde - musylmanshylyq ǵuryppen, ekinshisinde hrıstıandyq ǵuryppen jerlengen). Al resmı derek boıynsha, Almaty qalasynda 10 adam koronavırýstan qaıtys bolǵan. Almaty oblysynda koronavırýsqa baılanysty adam ólimi tirkelmegen.

Koronavırýstan qaıtys bolǵan adamdar jerlengen zırat. "31 arna" baǵdarlamasynan alynǵan skrınshot.
Koronavırýstan qaıtys bolǵan adamdar jerlengen zırat. "31 arna" baǵdarlamasynan alynǵan skrınshot.

Almaty qalasynyń taýarlar men kórsetiletin qyzmetterdiń sapasy men qaýipsizdigin baqylaý departamenti telearnaǵa jibergen resmı jaýapta bul zıratqa Almaty qalasynan 6 adam jerlengenin aıtqan.

Departament ókilderi "koronavırýs anyqtalǵan naýqastardyń barlyǵyna COVID-19 dıagnozy qoıylady, biraq olardyń arasynda koronavırýstan emes, sozylmaly aýrýlardan qaıtys bolǵan syrqattar da bolady. Ólim-jitimniń sebebin taldaý komıssııanyń qorytyndysy boıynsha, ólimniń negizgi sebepteri men dıagnozy anyqtalady. Sol sebepti qaıtys bolǵandardyń resmı sany men jerlengenderdiń sany sáıkes kelmeýi múmkin" dep aıtqan.

Osy zıratta jerlengen 21 jastaǵy áıeldiń týystarynyń aıtýynsha, koronavırýs juqqany týraly aqparatty áıel qaıtys bolǵannan keıin jaqyndaryna bir-aq habarlaǵan. Aýrýhanada áıeldi kútken jaqyndary da oqshaýlanbaǵan. Qaıtys bolǵannan keıingi tujyrym qujatynda áıelge koronavırýstan da basqa birneshe dıagnoz qoıylǵan. Týystary resmı tujyrymǵa senbeı otyr.

Qazaqstan densaýlyq saqtaý mınıstrligi buǵan deıin aımaqtarda koronavırýs juqqan adamdardyń ólimin zertteý boıynsha arnaıy komıssııa qurylyp, naýqastardyń óliminiń sebebin anyqtaıdy dep habarlaǵan. Eger komıssııa naýqas koronavırýstan emes, basqa aýrý túrinen qaıtys boldy dep qorytyndy shyǵarsa, onda naýqas ólimi koronavırýsqa baılanysty resmı statıstıkaǵa engizilmeıdi.

Degenmen resmı oryndar ázirge resmı statıstıkaǵa engizilmegen qansha oqıǵa baryn aıtpady. 20 mamyr kúngi onlaın-brıfıng kezinde Qazaqstannyń bas sanıtar dárigeri Aıjan Esmaǵambetova "karantın sharalary aıaqtalǵannan keıin barlyq derek qoryn zertteımiz, sol kezde barlyq kórsetkishten jarııalanady" dep aıtqan bolatyn.

Álemde ár memleket koronavırýstan qaıtys bolǵandardy árqalaı sanaıdy. Sáýir aıynyń ortasynda Dúnıejúzilik densaýlyq saqtaý uıymy koronavırýstan qaıtys bolǵandardy qalaı esepteý qajettigi týraly nusqaýlyq shyǵarǵan.

"Azattyq" radıosy

Pikirler