ماقتاارال: وزبەكستان وتەماقى تولەي مە؟

3949
Adyrna.kz Telegram

تۇندە ماماما مəسكەۋدىڭ ساعاتىمەن 23-30-دا زۆوندادىم. بۇل كەزدە قازاقستاندا تۇنگى 2-30. مامامنىڭ ۇيىقتاماي جاتقانىن بىلەم عوي. مامام عانا ەمەس، ءبىزدىڭ جەتىساي ءوڭىرىنىڭ كوپ ادامى سوڭعى كۇندەرى قورقىنىشتان ۇيىقتامايدى.
حالىقتى ايدىڭ-كۇننىڭ امانىندا وسىنداي əبىگەرگە ساپ قويعان وزبەكستانعا ءبىزدىڭ بيلىك تالابىن قويا الا ما؟
اناۋ سۋ باسىپ، ۇيىنەن، قانشا مالىنان، مالقورا، شوپقوراسىنان، تاپشان، اس ۇيىنەن، گاراجىنان، ءۇي ىشىندەگى قانشا جيحازىنان ايىرىلعان قازاعىنىڭ قۇقىعىن قورعاي الا ما؟
بىرەۋ ءۇيدى كرەديتكە سالعان شىعار؟ جاڭا ۇيىنە ءبىر اي بۇرىن عانا كىرگەن شىعار؟ قۋانىپ، جيحازدىڭ ءبəرىن جاڭادان العان شىعار؟
بىرەۋ بالالارىن قۋانتايىن دەپ ۇلكەن تەلەديداردى كرەديتكە العان شىعار؟ بىرەۋ حولوديلنيكتى كرەديتكە العان شىعار؟
بىرەۋ ىشپەي-جەمەي قىزىنىڭ جاساۋىنا سوڭعى ۇلگىدەگى سپالنىي گارنيتۋر اپارعان شىعار؟
بىرەۋ كوزىنىڭ مايىن تاۋسىپ، بيىل جاڭادان كورپە-توسەك تىككەن شىعار؟
بەلى قايىسىپ، بالا-شاعاسىمەن كۇن استىندا قاربىز-قاۋىن، قيار، قىزاناق ەكتى. كارتوشكاسى تۇينەپ، ەندى جەيىن دەپ جاتقاندا سۋ ءبəرىن شايدى دا كەتتى.
"جاڭا كارتوشكانى قۋىرىپ جەگەن ءدəمدى عوي" دەپ ءوزىمىز بالا كەزىمىزدە كارتوشكانى قازىپ الاتىن كەزدى كۇتەتىنبىز. سونىڭ ءوزى بىزگە قۋانىش سىيلايتىن. تالاي بالانىڭ ۇيقىسى، قۋانىشى ۇرلاندى.
وۋ، سونىڭ وتەۋىن ساردوبا سۋ قويماسىن سالاردا شەكارا مəسەلەسىن ەسكەرمەگەن وزبەكستاننان سۇراي الاسىڭدار ما؟ سەندەردىڭ جالپاقشەشەي مىنەزدەرىڭ ءبىزدى تويدىردى، شارشادىق، جالىقتىق.
وسى كۇنگە دەيىن سۋ بەرمەي جەتىساي، ماقتارال ءوڭىرىن قاقساتقان وزبەك بيلىگى تىنىش جاتقان اۋىل حالقىنىڭ باسىنا ءولىم قاۋپىن توندىرگەنى ءۇشىن (قۇدايعا شۇكىر ادام شىعىنى جوق) جاۋاپ بەرۋگە ءتيىس! بۇل - تابيعي اپات ەمەس، بۇل وزبەكتەردىڭ سۋ قويماسىن دۇرىس سالماۋدىڭ سالدارى. ەگەر ءبىز سۋ قويماسىن دۇرىس سالماساق، وزبەكستان قانشاما تالابىن قويار ەدى.
بىلتىر اۋىلدا انامنىڭ قاسىندا بولدىم. سۋ جوق. قىزاناقتى كراننىڭ سۋىمەن، ياعني، اۋىز سۋمەن وسىردىك. قانداي دا وسىمدىك ارىقتىڭ سۋىمەن جاقسى وسەدى. ءبىز ەمەس، اۋىلداعى بارلىق ءۇيدىڭ كۇيى سول. ءوزى قالت-قۇلت ەتىپ، وزبەكستان سۋ بەرمەسە دە، قىزاناق، قيارىن بىردەڭە ەتىپ، ءوسىرىپ، جەپ وتىرعان، ونسىز دا بەينەتى اۋىر اۋىلدىڭ حالقىن سورلاتتى-اۋ.
وزبەكستاننان سول سۋدى الىپ بەرۋگە جاراماعان بيلىكتەن نە كۇتۋىم كەرەك؟
قازاقستان - وزبەكتەردىڭ رەسەيگە شىعاتىن جولى، قانشا تاۋارىن ءبىزدىڭ جولمەن اپارادى. جولىمىز اۋىر-اۋىر كاماز-داردان شۇرىق-تەسىك بولماي ما؟
وۋ، كەۋدەلەرىڭدە جان بار ما؟
سول سۋدى "مىنە، ءبىز سەندەرگە مىنانداي كومەك جاساپ جاتىرمىز" دەپ تالابىڭدى قويىپ تۇرىپ الۋىڭا بولار ەدى عوي. بىراق سەندەر شارۋانى قايتەسىڭدەر؟ كۇنگە قاقتالعان كۇن ادامى سەندەر ءۇشىن سوڭعى كەزەكتە عوي.
مەن مəسكەۋدە ىلعي "قازاقستاننانمىن" دەپ كەۋدە كەرە ايتام. ءوزىمدى قازاقستاننىڭ قورعاۋىنداعى ادامداي سەزىنەم، جوق، سەزىنگىم كەلەدى.
شارۋاسىن قورعاي المايتىن بيلىك شەتتە جۇرگەن ماعان قايدان قورعان بولسىن؟!
جوق، مەن وزىمە سەنەم!
ءسىز دە تەك قانا وزىڭىزگە سەنىڭىز.
قوعالى اۋىلىنىڭ جىگىتتەرى ەكى-ءۇش كۇننەن بەرى تۇندە دە ۇيىقتاماي سۋدى بوگەپ جاتىر ەكەن. اۋىلىن، وزدەرىن سۋ تاسقىنىنان قورعاۋ ءۇشىن. دۇرىس جىگىتتەر. سەندەر بەيبىت كۇننىڭ باتىرىسىڭدار! سۋمەن الىسقانشا ءبىرىڭ ماقتا، ءبىرىڭ قاۋىن-قاربىز ەگىپ، شارشاپ، ەندى دەمالام دەپ ەدىڭدەر...
قۇداي جەتىسايىم مەن ماقتارالىما جار بولسىن!

اياگۇل مانتايدىڭ فەيسبۋك پاراقشاسىنان

پىكىرلەر