Túnde mamama Məskeýdiń saǵatymen 23-30-da zvondadym. Bul kezde Qazaqstanda túngi 2-30. Mamamnyń uıyqtamaı jatqanyn bilem ǵoı. Mamam ǵana emes, bizdiń Jetisaı óńiriniń kóp adamy sońǵy kúnderi qorqynyshtan uıyqtamaıdy.
Halyqty aıdyń-kúnniń amanynda osyndaı əbigerge sap qoıǵan Ózbekstanǵa bizdiń bılik talabyn qoıa ala ma?
Anaý sý basyp, úıinen, qansha malynan, malqora, shópqorasynan, tapshan, as úıinen, garajynan, úı ishindegi qansha jıhazynan aıyrylǵan qazaǵynyń quqyǵyn qorǵaı ala ma?
Bireý úıdi kredıtke salǵan shyǵar? Jańa úıine bir aı buryn ǵana kirgen shyǵar? Qýanyp, jıhazdyń bərin jańadan alǵan shyǵar?
Bireý balalaryn qýantaıyn dep úlken teledıdardy kredıtke alǵan shyǵar? Bireý holodılnıkti kredıtke alǵan shyǵar?
Bireý ishpeı-jemeı qyzynyń jasaýyna sońǵy úlgidegi spalnyı garnıtýr aparǵan shyǵar?
Bireý kóziniń maıyn taýsyp, bıyl jańadan kórpe-tósek tikken shyǵar?
Beli qaıysyp, bala-shaǵasymen kún astynda qarbyz-qaýyn, qııar, qyzanaq ekti. Kartoshkasy túınep, endi jeıin dep jatqanda sý bərin shaıdy da ketti.
"Jańa kartoshkany qýyryp jegen dəmdi ǵoı" dep ózimiz bala kezimizde kartoshkany qazyp alatyn kezdi kútetinbiz. Sonyń ózi bizge qýanysh syılaıtyn. Talaı balanyń uıqysy, qýanyshy urlandy.
Oý, sonyń óteýin Sardoba sý qoımasyn salarda shekara məselesin eskermegen Ózbekstannan suraı alasyńdar ma? Senderdiń jalpaqshesheı minezderiń bizdi toıdyrdy, sharshadyq, jalyqtyq.
Osy kúnge deıin sý bermeı Jetisaı, Maqtaral óńirin qaqsatqan ózbek bıligi tynysh jatqan aýyl halqynyń basyna ólim qaýpin tóndirgeni úshin (Qudaıǵa shúkir adam shyǵyny joq) jaýap berýge tıis! Bul - tabıǵı apat emes, bul ózbekterdiń sý qoımasyn durys salmaýdyń saldary. Eger biz sý qoımasyn durys salmasaq, Ózbekstan qanshama talabyn qoıar edi.
Byltyr aýylda anamnyń qasynda boldym. Sý joq. Qyzanaqty krannyń sýymen, ıaǵnı, aýyz sýmen ósirdik. Qandaı da ósimdik aryqtyń sýymen jaqsy ósedi. Biz emes, aýyldaǵy barlyq úıdiń kúıi sol. Ózi qalt-qult etip, Ózbekstan sý bermese de, qyzanaq, qııaryn birdeńe etip, ósirip, jep otyrǵan, onsyz da beıneti aýyr aýyldyń halqyn sorlatty-aý.
Ózbekstannan sol sýdy alyp berýge jaramaǵan bılikten ne kútýim kerek?
Qazaqstan - ózbekterdiń Reseıge shyǵatyn joly, qansha taýaryn bizdiń jolmen aparady. Jolymyz aýyr-aýyr KamAZ-dardan shuryq-tesik bolmaı ma?
Oý, keýdelerińde jan bar ma?
Sol sýdy "mine, biz senderge mynandaı kómek jasap jatyrmyz" dep talabyńdy qoıyp turyp alýyńa bolar edi ǵoı. Biraq sender sharýany qaıtesińder? Kúnge qaqtalǵan kún adamy sender úshin sońǵy kezekte ǵoı.
Men Məskeýde ylǵı "Qazaqstannanmyn" dep keýde kere aıtam. Ózimdi Qazaqstannyń qorǵaýyndaǵy adamdaı sezinem, joq, sezingim keledi.
Sharýasyn qorǵaı almaıtyn bılik shette júrgen maǵan qaıdan qorǵan bolsyn?!
Joq, men ózime senem!
Siz de tek qana ózińizge senińiz.
Qoǵaly aýylynyń jigitteri eki-úsh kúnnen beri túnde de uıyqtamaı sýdy bógep jatyr eken. Aýylyn, ózderin sý tasqynynan qorǵaý úshin. Durys jigitter. Sender beıbit kúnniń batyrysyńdar! Sýmen alysqansha biriń maqta, biriń qaýyn-qarbyz egip, sharshap, endi demalam dep edińder...
Qudaı Jetisaıym men Maqtaralyma jar bolsyn!
Aıagúl Mantaıdyń Feısbýk paraqshasynan
