سوڭعى كۇندەرى "جۇلدىزدار" توڭىرەگىندە داۋ-داماي ءورشىپ تۇر. انەبىر ءانشىنىڭ لوتەرەيا "افەراسى" شىدامنىڭ شەگىن ءۇزىپ جىبەردى-اۋ دەيمىن. بۇگىن ءبىر ارنادا ولاردى جۇلدىز ەمەس، شەگىرتكەگە تەڭەپ جاتتى. جالپى، ولاردى "جۇلدىزعا" تەڭەۋ دۇرىس پا؟ ول تەڭەۋ قايدان شىقتى؟ وسىدان بەس-التى جىل بۇرىن وسى ماسەلەگە بايلانىستى دابىل قاققان ەدىك. تىڭدار قۇلاق بولمادى. وقي وتىرىڭىزدار!
"جۇلدىزداردىڭ" يتتەرىنIڭ ىلىققانىن كورەمىز ءالى...
-بۇلبۇل ءانشى بيبىگۇل تولەگەنوۆا ءوزىن "جۇلدىز " ەمەسپىن دەپ ەسەپتەءيدى، -دەدى ماعان بۇگىن ءبىر اعامىز، -اتاعى جەر جارعان روزا رىمباەۆا دا ، ەلىنىڭ ەركەسى ماقپال ءجۇنىسوۆا دا سولاي دەپ وتىر. سوندا قالعاندارىنا "جۇلدىز" دەگەن اتاۋدى كىم جاپسىرىپ قويعان؟ وزدەرى مە؟
-قايدان بىلەيىن،-دەپ يىعىمدى قيقاڭ ەتكىزدىم.شىنىمەن دە بۇل ماسەلەنى ويلانعان جوق ەكەنمىن. اعام ءوز ساۋالىنا ءوزى جاۋاپ بەردى.
-ونى ويلاپ تاپقان، بولسىن،بولماسىن اركىمگە جاپسىرا بەرەتىن سەندەر-جۋرناليستەر عوي. قاپتاپ كەتكەن "جۇلدىزدى" باعدارلامالاردى كىم جاساپ جاتىر ەكەن؟ سەنبەسەڭ اتاۋلارىن قاراشى! "جۇلدىزبەن جۇزدەسۋ", "جۇلدىزبەن تىلدەسۋ " "جۇلدىزبەن ...ۋ" بولىپ كەتە بەرەدى. اتى سولاي بولسا وعان قاتىسقان ادام دا جۇلدىز بولىپ شىقپاي ما؟ گازەت، جۋرنالدىڭ اتاۋى دا سولاي. ەندى جۇرىڭدەر ولاردىڭ ت...ن، س...ندەرىن اڭدىپ.
"سوڭعى سوزدەرىڭىز ارتىقتاۋ، اعا! " دەگىم كەلىپ ءتىلىمدى تىستەي قويدىم. وعان دا جەتىپ قالعان ەكەنبىز عوي. اجەتحانانىڭ ىشىنەن رەپورتاج جۇرگىزبەسەك تە ءوزىمىز ويلاپ تاپقان "جۇلدىزداردىڭ" ءىش كيىمىنiڭ تۇسىنە دەيىن ءبىلىپ وتىراتىن بولدىق. سەنبەيسىز بە؟ كەشەلى، بۇگىنگى "جۇلدىزدى " جاڭالىقتاردى قاراي سالىڭىز. انەبىر ءانشى قىزىمىز الدەبىر اتاق الىپ، ۇلاناسىر توي جاساپتى. جاساي بەرسىن -اۋ، ەندى تويدان تۇسكەن اقشانى سۋرەتكە ءتۇسىرىپ، "وسىنشا كورىمدىك الدىم" دەپ ماقتانۋدا . "تۇك كورمەگەندەي" دەيسىڭ ەندى مۇندايدا . ۇيات -اي! "ويباي انەبىر ءانشى توبەتىنە قالىڭدىق ىزدەپ جاتىر" دەپ جار سالدى بۇگىن تاعى بىرەۋ. ءبىزدى توبەتكە قانشىق تاۋىپ بەرەدى دەي مە ەكەن؟ اعام دۇرىس ايتادى. ەرتەڭ ءبىز سول "جۇلدىزداردىڭ" يتتەرىنىڭ ىلىققانىن دا كورسەتىپ جاتساق تاڭ قالماڭىز! ويتكەنى ول دا "جۇلدىزدى" جاڭالىق قوي.
ارمان سقابىلۇلى
فوتو اشىق ينتەرنەت كوزىنەن
