شىمكەنت: 7 وشاقتان كارانتين الىندى

2461
Adyrna.kz Telegram

بۇل تۋرالى شىمكەنت قالالىق دەنساۋلىق ساقتاۋ باسقارماسى حابارلادى. سالا ماماندارىنىڭ ايتۋىنشا، قالا اۋماعىندا 1174 ازامات مونيتورينگتىك باقىلاۋعا الىنعان. ونىڭ ىشىندە: ستاتسيوناردا – 826, ءۇي كارانتينىندە – 348.
ىندەتكە بايلانىستى مەگاپوليستە 71 وشاق تىركەلىپ، بۇگىندە ونىڭ 7-ىنەن كارانتين الىنعان. وقشاۋلانعان نۇكتەلەرگە ءۇش جۇزگە جۋىق پوليتسيا قىزمەتكەرى مەن 559 ۇلتتىق ۇلان ساربازى جۇمىلدىرىلعان.
ايتا كەتەيىك، تۇرعىنداردىڭ ءومىرى مەن قاۋىپسىزدىگىن، دەنساۋلىعىن ساقتاۋ ءۇشىن 4 ساۋىردەن شىمكەنتكە كارانتين ەنگىزىلدى. جەرگىلىكتى بيلىك پەن مەديتسينا ماماندارى جانە پوليتسەيلەر مەن اسكەريلەر كۇشەيتىلگەن رەجيمدە جۇمىس ىستەۋگە كوشتى.
18 بلوك-بەكەت ورناتىلىپ، جەكە كولىكتەر مەن ازاماتتاردىڭ قوزعالىسىنا شەكتەۋ قويىلدى. ماسكالىق رەجيم ەنگىزىلىپ، بىرقاتار مەكەمەلەر مەن ۇيىمداردىڭ قىزمەتى توقتاتىلدى.
ازىق-تۇلىك پەن ءدارى-دارمەك ساتاتىن وبەكتىلەردەن وزگە ورىنداردىڭ جۇمىسى ۋاقىتشا شەكتەلدى. ءبىلىم مەكەمەلەرى قاشىقتىقتان وقىتۋعا كوشىپ، بانكتەر ونلاين رەجيمدە قىزمەت كورسەتۋگە كىرىستى. قوعامدىق كولىكتەردىڭ قىزمەتى توقتاتىلىپ، قالا اۋماعىن دەزينفەكتسيالاۋ جۇمىستارى كۇشەيتىلدى
ءبىر سوزبەن ايتقاندا تۇرعىنداردىڭ قاۋىپسىزدىگى ءۇشىن اۋقىمدى جۇمىستار قولعا الىندى.

2020 جىلعى 24 ساۋىردەگى جاعداي بويىنشا شىمكەنتتە ىندەت جۇقتىرعان 139 جاعداي تىركەلدى.
18 ناۋقاس اۋرۋىنان ايىعىپ ۇيىنە شىعارىلدى. وكىنىشىكە وراي، 4 ازامات كوز جۇمدى. قايتىس بولعانداردىڭ ۇشەۋى تۇركىستان وبلىسىنىڭ، بىرەۋى شىمكەنت قالاسىنىڭ تۇرعىنى.

شىمكەنت 

 

 

پىكىرلەر