شىمكەنتتەگى 213 ءبىلىم بەرۋ ۇيىمى (مەكتەپتەر، كوللەدجدەر، جوو) تولىعىمەن قاشىقتان وقىتۋ فورماتىنا كوشتى.
قالاداعى 172 مەكتەپتە وقيتىن 222 مىڭنان استام وقۋشىلار تولىعىمەن قاشىقتان ءبىلىم بەرۋ جۇيەسىمەن قامتىلعان. ونىڭ ىشىندە ينكليۋزيۆتى ءبىلىم بەرىلەتىن وقۋشىلار سانى - 836. «WhatsApp» مەسسەندجەرى ارقىلى وڭالتۋ ساباقتارى 1143 وقۋشىعا جۇرگىزىلۋدە، ول 86,5%-دى قۇرايدى. 125 وقۋشى دەنساۋلىعىنا بايلانىستى اتا-انالارىنىڭ وتىنىشتەرى نەگىزىندە ساباقتان بوساتىلعان.
ماسەلەن، وقۋشىلاردىڭ 96,7 پايىزى ەلەكتروندى قۇرىلعىلارمەن (كومپيۋتەر، نوۋتبۋك، پلانشەت، سمارتفون) ەلەكتروندى قۇرىلعىمەن قامتىلعان بولسا، قالعان 3,3 پايىزىنىڭ ياعني، 7424 وقۋشىنىڭ تەلەارنا ارقىلى ءبىلىم الۋعا مۇمكىندىگى بار. ايتا كەتەيىك، كومپيۋتەردى قاجەت ەتەتىن وقۋشىلارعا مەكتەپتەردەگى 10192 كومپيۋتەر ۋاقىتشا بەرىلگەن.
مەكتەپتەردەگى 17253 مۇعالىم ەلەكتروندى قۇرىلعىلار مەن ينتەرنەت جەلىسىمەن قامتاماسىز ەتىلگەن. اعىمداعى جىلعى 6 ساۋىردەن باستاپ بارلىق مەكتەپ وقۋشىلارى قاشىقتان وقىتۋ فورماتىندا ءبىلىم الۋدا.
شىمكەنت قالاسىنىڭ وقۋشىلارى «Bilimland.kz»، «دارىن ونلاين» سىندى ينتەرنەت پلاتفورمالاردا ءبىلىم الۋ بويىنشا رەسپۋبليكادا ءى ورىندا بولسا، ۇستازدارى ءىى ورىندا. سونىمەن قاتار، بالالار «Zoom»، «Google class»، «Edu page» باعدارلامالارى ارقىلى دا ساباقتارىن وقىپ-ۇيرەنۋدە.
قالالىق ءبىلىم باسقارماسى جانىنان قۇرىلعان «Call ورتالىققا» بۇگىنگە دەيىن تۇسكەن 422 سۇراقتىڭ باسىم بولىگى قاشىقتان ءبىلىم الۋعا قاتىستى بولعاندىقتان ماماندار ساۋالداردى تالداپ، جۇمىس ساپاسىن جاقسارتۋ ماقساتىندا ءتيىستى شارالاردى اتقارۋدا.
– جوعارعى وقۋ ورىندارى مەن تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى قاشىقتىقتان وقىپ جاتىر. ءبىلىم باسقارماسى تاراپىنان جۇمىس ساپاسىن جاقسارتۋ ماقساتىندا ءتيىستى شارالار ءوز جالعاسىن تابۋدا، دەپ حابارلادى قالالىق ءبىلىم باسقارماسىنىڭ باسشىسى ج.تاجيەۆا.
شىمكەنت
