Shymkenttegi 213 bilim berý uıymy (mektepter, kolledjder, JOO) tolyǵymen qashyqtan oqytý formatyna kóshti.
Qaladaǵy 172 mektepte oqıtyn 222 myńnan astam oqýshylar tolyǵymen qashyqtan bilim berý júıesimen qamtylǵan. Onyń ishinde ınklıýzıvti bilim beriletin oqýshylar sany - 836. «WhatsApp» messendjeri arqyly ońaltý sabaqtary 1143 oqýshyǵa júrgizilýde, ol 86,5%-dy quraıdy. 125 oqýshy densaýlyǵyna baılanysty ata-analarynyń ótinishteri negizinde sabaqtan bosatylǵan.
Máselen, oqýshylardyń 96,7 paıyzy elektrondy qurylǵylarmen (kompıýter, noýtbýk, planshet, smartfon) elektrondy qurylǵymen qamtylǵan bolsa, qalǵan 3,3 paıyzynyń ıaǵnı, 7424 oqýshynyń telearna arqyly bilim alýǵa múmkindigi bar. Aıta keteıik, kompıýterdi qajet etetin oqýshylarǵa mektepterdegi 10192 kompıýter ýaqytsha berilgen.
Mektepterdegi 17253 muǵalim elektrondy qurylǵylar men ınternet jelisimen qamtamasyz etilgen. Aǵymdaǵy jylǵy 6 sáýirden bastap barlyq mektep oqýshylary qashyqtan oqytý formatynda bilim alýda.
Shymkent qalasynyń oqýshylary «Bilimland.kz», «Daryn onlaın» syndy ınternet platformalarda bilim alý boıynsha respýblıkada I orynda bolsa, ustazdary II orynda. Sonymen qatar, balalar «Zoom», «Google class», «Edu page» baǵdarlamalary arqyly da sabaqtaryn oqyp-úırenýde.
Qalalyq bilim basqarmasy janynan qurylǵan «Call ortalyqqa» búginge deıin túsken 422 suraqtyń basym bóligi qashyqtan bilim alýǵa qatysty bolǵandyqtan mamandar saýaldardy taldap, jumys sapasyn jaqsartý maqsatynda tıisti sharalardy atqarýda.
– Joǵarǵy oqý oryndary men tehnıkalyq jáne kásiptik bilim berý uıymdarynyń stýdentteri qashyqtyqtan oqyp jatyr. Bilim basqarmasy tarapynan jumys sapasyn jaqsartý maqsatynda tıisti sharalar óz jalǵasyn tabýda, dep habarlady qalalyq bilim basqarmasynyń basshysy J.Tajıeva.
Shymkent
