شىمكەنت قالاسىنىڭ اكىمى مۇرات ايتەنوۆ وتكەن اپتادا جىلىجاي يەلەرىمەن كەزدەسىپ، وندىرگەن ونىمدەرىن ساۋدا ورىندارىندا تىكەلەي شىعارۋعا كەلىسكەن بولاتىن.
بۇگىننەن باستاپ كاسىپكەرلەرگە «قازىبەك» بازارىنان ارنايى ورىن بەرىلىپ، جىلىجايدان جينالعان كوكونىستەر ساۋداعا قويىلدى.
قالا اكىمىنىڭ باستاماسىمەن «شاريپوۆ»، «يلياۆ» ، «تازا ءونىم»، «زاۋرە» جانە «كولەسنيكوۆ» شارۋا قوجالىقتارى قىزاناقتىڭ كەلىسىن 350 تەڭگەدەن، ال قياردى 250 تەڭگەدەن ساتىپ جاتىر.
مەملەكەتتىك جەكە مەنشىك ارىپتەستىك اياسىندا «Taza onim» شارۋا قوجالىعى 9 گەكتار جەرگە جىلىجاي سالىپ جاتىر. ونىڭ 3 گەكتارى ءبىتىپ، شارۋالار 370 توننا ءونىم الىپ ۇلگەرگەن.
قوجالىق قۇرىلتايشىسى ارمان باحىتۇلىنىڭ ايتۋىنشا، كەشەندە قياردىڭ «تريستان»، «تانتو»، «مەۆا» سورتتارى ەگىلگەن. ديحان ەندى ءوزى وندىرگەن كوكونىستى جەرگىلىكتى نارىقتا دەلدالسىز ساتىپ جاتىر.
الداعى ۋاقىتتا شارۋالاردىڭ ونىمدەرىن قالاداعى ءىرى ساۋدا ورىندارىنا دا تىكەلەي جەتكىزىپ بەرۋ ماسەلەسى دە قاراستىرىلىپ جاتىر ەكەن.
بۇل وتاندىق ءونىمىنىڭ ساتىلۋ قۇنىن رەتتەپ، جەرگىلىكتى حالىقتىڭ كوكونىستى دەلدالسىز ساتىپ الۋىنا مۇمكىندىك بەردى، دەيدى شارۋا.
ايتا كەتەيىك، شىمكەنتتە اۋماعى 183 گەكتار جىلىجاي بار. ونىڭ 53 گەكتارى – ونەركاسىپتىك. قالادا جابىق جىلىجاي كەشەندەردىڭ كولەمىن ارتتىرۋ ماقساتىندا «وڭتۇستىك» كولىكتىك لوگيستيكالىق ايماعىنان 136 گەكتار جەر قاراستىرىلىپ، 100 گەكتار اۋماققا ونەركاسىپتىك كەشەن سالىنباق. جوبا جۇزەگە اسسا مىڭداعان جاڭا جۇمىس ورنى اشىلىپ، جۇرت جىل ون ەكى اي كوكونىسپەن قامتىلاتىن بولادى.
شىمكەنت
