Shymkent qalasynyń ákimi Murat Áıtenov ótken aptada jylyjaı ıelerimen kezdesip, óndirgen ónimderin saýda oryndarynda tikeleı shyǵarýǵa kelisken bolatyn.
Búginnen bastap kásipkerlerge «Qazybek» bazarynan arnaıy oryn berilip, jylyjaıdan jınalǵan kókónister saýdaǵa qoıyldy.
Qala ákiminiń bastamasymen «Sharıpov», «Ilıav» , «Taza ónim», «Záýre» jáne «Kolesnıkov» sharýa qojalyqtary qyzanaqtyń kelisin 350 teńgeden, al qııardy 250 teńgeden satyp jatyr.
Memlekettik jeke menshik áriptestik aıasynda «Taza onim» sharýa qojalyǵy 9 gektar jerge jylyjaı salyp jatyr. Onyń 3 gektary bitip, sharýalar 370 tonna ónim alyp úlgergen.
Qojalyq quryltaıshysy Arman Bahytulynyń aıtýynsha, keshende qııardyń «Trıstan», «Tanto», «Meva» sorttary egilgen. Dıhan endi ózi óndirgen kókónisti jergilikti naryqta deldalsyz satyp jatyr.
Aldaǵy ýaqytta sharýalardyń ónimderin qaladaǵy iri saýda oryndaryna da tikeleı jetkizip berý máselesi de qarastyrylyp jatyr eken.
Bul Otandyq óniminiń satylý qunyn rettep, jergilikti halyqtyń kókónisti deldalsyz satyp alýyna múmkindik berdi, deıdi sharýa.
Aıta keteıik, Shymkentte aýmaǵy 183 gektar jylyjaı bar. Onyń 53 gektary – ónerkásiptik. Qalada Jabyq jylyjaı keshenderdiń kólemin arttyrý maqsatynda «Ońtústik» kóliktik logıstıkalyq aımaǵynan 136 gektar jer qarastyrylyp, 100 gektar aýmaqqa ónerkásiptik keshen salynbaq. Joba júzege assa myńdaǵan jańa jumys orny ashylyp, jurt jyl on eki aı kókónispen qamtylatyn bolady.
Shymkent
