2020 جىلى قازاقستاندا 200 000 تەڭگە كوپ اقشا ەمەس. ءبىلىمدى ءارى بىلىكتى مۇعالىم 200 000 تەڭگە ايلىق الۋ ءۇشىن 2 جەردە جۇمىس ىستەۋگە مىندەتتى ەمەس. مۇعالىم مەكتەپتە بالا وقىتۋ ءۇشىن ءوزىنىڭ جانە بالا-شاعاسىنىڭ اۋزىنان جىرىپ كرەديتكە نوۋتبۋك پەن پرينتەر الۋعا مىندەتتى ەمەس. مۇعالىم سايلاۋدا بيلىكتىڭ سولداتى بولۋعا مىندەتتى ەمەس. مۇعالىم نۇر وتاننىڭ نەمەسە باسقا پارتيانىڭ مۇشەسى بولۋعا مىندەتتى ەمەس. مۇعالىم ەشكىم وقىمايتىن گازەت-جۋرنالعا جازىلۋعا مىندەتتى ەمەس. مۇعالىم مەكتەپتىڭ رەمونتىن جاساۋعا مىندەتتى ەمەس. مۇعالىم ماسكا تىگۋگە مىندەتتى ەمەس. قر بيلىگىنىڭ (ەكس-پرەزيدەنت، قازىرگى پرەزيدەنت، پرەمەر-مينيستر، مينيسترلەر كابينەتى، ءبىلىم جانە عىلىم مينيسترلىگى، قر پارلامەنتىنىڭ قوس پالاتاسى، سوت بيلىگى) ءبىلىم سالاسىنداعى 30 جىلعا سوزىلىپ كەلە جاتقان ساۋاتسىز، جۇيەسىز ءارى ادىلەتسىز ساياساتىنىڭ "جەمىسىن" تاتۋعا مۇعالىمدەر دە، وقۋشىلار دا لايىق ەمەس. مۇعالىم –قۇل ەمەس. مۇعالىم قۇلدىق جاعدايدا جۇمىس ىستەگەنىنە قارسى شىققانى ءۇشىن، ونى اشىق ايتقانى ءۇشىن حالىق جاۋى ەمەس. مۇعالىم "كەدەيمىن" دەگەن ءسوزى ءۇشىن كامەرا الدىندا دا، مەكتەپ ديرەكتورىنىڭ الدىندا دا، اكىمنىڭ الدىندا دا، ءمينيستردىڭ الدىندا دا، پرەزيدەنتتىڭ الدىندا دا باسىن ءيىپ كەشىرىم سۇراۋعا مىندەتتى ەمەس. ال وسىنداي ايانىشتى ءارى قورعانسىز كۇيگە تۇسپەس ءۇشىن ءار مۇعالىم ءوز ار-وجدانى مەن قۇقىعى ءۇشىن ءوز مەكتەبىندە كۇرەسۋى ءتيىس. مۇعالىمنىڭ ستاتۋسىن كوتەرەتىن باسقا ءتيىمدى جول جوق.
شالقار نۇرسەيىتوۆ
