2020 jyly Qazaqstanda 200 000 teńge kóp aqsha emes. Bilimdi ári bilikti muǵalim 200 000 teńge aılyq alý úshin 2 jerde jumys isteýge mindetti emes. Muǵalim mektepte bala oqytý úshin óziniń jáne bala-shaǵasynyń aýzynan jyryp kredıtke noýtbýk pen prınter alýǵa mindetti emes. Muǵalim saılaýda bıliktiń soldaty bolýǵa mindetti emes. Muǵalim Nur Otannyń nemese basqa partııanyń múshesi bolýǵa mindetti emes. Muǵalim eshkim oqymaıtyn gazet-jýrnalǵa jazylýǵa mindetti emes. Muǵalim mekteptiń remontyn jasaýǵa mindetti emes. Muǵalim maska tigýge mindetti emes. QR bıliginiń (eks-prezıdent, qazirgi prezıdent, premer-mınıstr, mınıstrler kabıneti, Bilim jáne ǵylym mınıstrligi, QR parlamentiniń qos palatasy, sot bıligi) bilim salasyndaǵy 30 jylǵa sozylyp kele jatqan saýatsyz, júıesiz ári ádiletsiz saıasatynyń "jemisin" tatýǵa muǵalimder de, oqýshylar da laıyq emes. Muǵalim –qul emes. Muǵalim quldyq jaǵdaıda jumys istegenine qarsy shyqqany úshin, ony ashyq aıtqany úshin halyq jaýy emes. Muǵalim "kedeımin" degen sózi úshin kamera aldynda da, mektep dırektorynyń aldynda da, ákimniń aldynda da, mınıstrdiń aldynda da, prezıdenttiń aldynda da basyn ıip keshirim suraýǵa mindetti emes. Al osyndaı aıanyshty ári qorǵansyz kúıge túspes úshin ár muǵalim óz ar-ojdany men quqyǵy úshin óz mektebinde kúresýi tıis. Muǵalimniń statýsyn kóteretin basqa tıimdi jol joq.
Shalqar Nurseıitov
