قۇرمەتتى دوستار!!!
ارداقتى اعايىن!!!
ءبىر جىلدان بەرى ءار وڭىردە "اقجۇنىس" ەرىكتى انالار ۇيىمى جۇمىس ىستەپ ءجۇرمىز. قالاي قۇرىلدىق، قانداي ماقساتتا قۇرىلدىق - كوزىقاراقتى وقىرمان حاباردار.
كەي ادامدار: "انالار سۇراي بەرمەي، تىرشىلىك قىلماي ما؟" دەيدى...
ءنان باستاعان بيلىكتەگىلەر انالاردى "ماسىلدار" دەدى. (وزدەرىنىڭ ارامتاماق ۇرىلار ەكەنىن ۇمىتىپ كەتەدى..🤗)
ەڭ الدىمەن، جۇمىسسىزدىق جايلاعان قوعامدا ءومىر ءسۇرىپ جاتقانىمىزدى ۇمىتپايىق... ءوندىرىس جوق، اۋىل شارۋاشىلىعى جوق، بيزنەس ەكىنىڭ ءبىرى الىپ كەتەتىن دۇنيە ەمەس... ادامدار، اسىرەسە سول سىزدەر "ماسىل" دەيتىن انالار 90-شى جىلدارى الا دوربا اوقالاپ، بۇكىل قوعامدى داعدارىستان الىپ شىقتى... ەسەسىنە كوبى دەنساۋلىعىن جوعالتتى، وتباسىن جوعالتتى... بويىنداعى قۇداي بەرگەن قابىلەتىن "مونەتيزاتسيا" جاساۋعا ول كىسىلەر دايىن بولماي قالدى، بۇگىن دە دايىن ەمەس... تەك ازعانتاي بولشەگى عانا بويىنداعى دارىنىن "اقشاعا" اينالدىرا بىلگەندەرى عانا، شاعىن بيزنەسىن دوڭگەلەتىپ اكەتكەنى بولماسا، حالىقتىڭ باسىم بولىگى دالادا قالعاندار.
مۇنى مويىندايىق.
"انالار سۇراي بەرمەي، تىرشىلىك قىلماي ما؟" دەيسىزدەر...
بۇگىنگى كۇندە تىرشىلىگى بارلاردىڭ ءوزى تىرشىلىك قىلا الماي، ۇيگە قامالىپ وتىر عوي...
سۇراعاندى، سۇراعانداردى مەن دە قۇپتامايمىن.
الايدا، ءوز نەسىبەمنەن باس تارتپايمىن. "بەرگەننىڭ قولىنان، بەرمەگەننىڭ جولىنان" دەمەكشى... قازاق جەرىندە قازاق بوپ تۋعانىم ءۇشىن وسى جەردىڭ بايلىعىنان مەنىڭ دە قۇداي بەرگەن نەسىبەم بار، ءسىزدىڭ دە، ونىڭ دا نەسىبەسى بار دەپ ەسەپتەيمىن.
"تىرشىلىك قىلماي ما؟" دەپ اقىل ايتۋ وڭاي. اتى بار، زاتى بار، ساۋاتى بار، 20 جىلدىق تاجىريبەسى بار، ەكى ديپلومى بار مەنىڭ ءوزىمدى بۇل جۇيە "بورت سىرتىنا" لاقتىرىپ تاستاعان... مەنى قويشى... ول باسقا گاپ...😊
4-7-10 بالالى انالارعا تىرشىلىك قىل دەپ ايتا المايسىز، ولاردىڭ تىرشىلىگى دە، بار جۇمىسى دا سول بالالاردىڭ تاماعىن دايىنداپ، كىرىن جۋىپ، ءبىرىن بالاباقشاعا، ءبىرىن مەكتەپكە دايىنداۋمەن وتەدى. ولاردىڭ مەملەكەتكە قوسقان ۇلەسى - دەموگرافيانى كوتەرگەنى. سول ءۇشىن العىس ايتۋىمىز كەرەك. سول ءۇشىن ولارعا ۇكىمەت تە، ءبىز دە كومەكتەسۋىمىز كەرەك...
ال مۇگەدەك انالارعا، مۇگەدەك بالا باعىپ وتىرعان انالارعا، بىرنەشە بالامەن جەسىر قالعان، پاتەر جالداپ تۇراتىن انالارعا قانداي تىرشىلىك قىل دەيسىز؟..
ارينە، شاماسى كەلگەنشە ءبارى تىرشىلىك قىلۋعا تىرىسادى، ءبىرى ەدەن جۋادى، ءبىرى كافەدە ىدىس جۋادى ت.ب. سول تىرشىلىكتەرى دە توقتاپ، كيسلورودسىز قالىپ وتىرعاندار قانشاما! ولار تۇگىل، ءبىزدىڭ ءوزىمىزدىڭ جۇمىسىمىز توقتادى... تۇراقتى جۇمىسى، تۇراقتى تابىسى بولعانداردىڭ ايتەۋىر، ازىن-اۋلاق جيعان قورى بار، باسىندا باسپاناسى بار دەگەندەي... سوندىقتان اقىلدى دا ويلانىپ ايتۋ كەرەك سياقتى... كومەكتەسە الاسىز با، كومەكتەسىڭىز. كومەكتەسە المايسىز با، تابالاماڭىز. قاي قازاق قايىرشى بولايىن دەپ بولدى دەيسىز. ءبارىنىڭ باسىندا جۇمىسسىزدىق، كۇيزەلىس، ۇرىس-جانجال... راس، قازاق قايىر سۇراۋعا نامىستاناتىن.... بۇگىندە كوشەدە الاقان جايىپ قايىر سۇرايتىن، اراق ءىشىپ بومج بولاتىن حالگە جەتتى.... كىم كىنالى؟... نە كىنالى؟... ءبىرىنشى - جۇيە، ەكىنشى - ارينە، وزدەرى... الايدا ادامنىڭ ءبارىن قۇداي بىردەي عىپ جاراتپاعان عوي... بارىنە بىردەي سانا-سەزىم، بارىنە بىردەي اقىل-پاراسات، بارىنە بىردەي كۇش-جىگەر، بارىنە بىردەي بارماقتاي باق بەرمەيدى... ارقايسىسىمىزدىڭ ومىردەن الار ەنشىمىز ارقالاي... قۇدايدىڭ بەرگەنىنە قاراي...
ال كوپبالالى وتباسىلارعا، جەتىم-جەسىرلەرگە كومەكتەسۋ كەرەك... "جەتىمىن جىلاتپاعان ەل ەدىك" دەيمىز عوي.... مەن ءبىر نارسەگە قارسىمىن: بالالاردىڭ اۋزىنا ءسوز سالىپ، ولاردى "سۇراۋعا" ۇيرەتپەۋ كەرەك، "سۇرانشاقتىق" پسيحولوگياسىنىڭ ۇرىعىن سەپپەۋ كەرەك، كەرىسىنشە، بالانىڭ بويىنداعى نامىستى قايراۋ كەرەك... بۇعان اتا-انا جاۋاپتى...
ءبىزدىڭ "اقجۇنىس" انالار چاتتارىندا انالارعا "قايىر" سۇراۋدى ايتىپ ۇيرەتەتىن سياقتى جيىرىلاتىندار بار.
جوق. ءبىرىنشى كۇننەن باستاپ ءبىز ءوز چاتتارىمىزدا مىڭداعان انالاردىڭ از-ماز ساۋاتىن اشۋعا، ءوز قۇقىعىن قورعاۋعا، ازاماتتىق كوزقاراسىن اشىق ايتا بىلۋگە، سونىمەن بىرگە مادەنيەتتىلىككە، قۇقىقتىق ساۋاتتىلىققا، قارجىلىق ساۋاتتىلىققا جەتەلەپ، ۇيرەتۋگە تىرىستىق. بۇگىندە ءار وبلىس، اۋدان بويىنشا ونداعان چاتتاردا وتىرعان جۇزدەگەن اقجۇنىس انالار سول باعىتتا وزدەرىن قالىپتاستىرىپ كەلەدى. ازاماتتىق پوزيتسياسىن بىلدىرەتىن جەردە بىلدىرەدى، ايتاتىن جەردە ايتادى، جازاتىن جەردە جازادى، تالاپ ەتەتىن جەردە - تالاپ ەتەدى.
كەيدە جەلىلەردەن كەيبىر انالاردىڭ، ايەلدەردىڭ بەيبەركەتسىزدىگىن، شايپاۋ مىنەزدەرىن، قوعامدىق ورىندارداعى تۇرپايى مىنەزدەرىن كورگەندە، جاعامىزدى ۇستايمىز...
كوپشىلىك انالارعا ءسال دە بولسا، ءسوزىم وتەدى عوي دەپ، بۇگىن اقجۇنىس انالار چاتىنداعى انالارعا دا، باسقا چاتتارداعى انالارعا دا، وسىنداعى كەيبىر انالارعا دا، - بىلتىر ءجيى ايتاتىن ءسوزىمىزدى بيىل تاعى ءبىر قايتالاۋعا تۋرا كەلدى...
ءبىرىنشى كەزەكتە بويىمىزداعى قازاق قىزىنا ءتان، قازاق ايەلىنە ءتان نامىسىمىزدى، ار-ۇياتىمىزدى، جىگەرىمىزدى جوعالتپايىق. جاعدايىمىزدى ايتساق تا، جۇرتقا جاريالاماي، جەكەگە ايتۋعا تىرىسايىق.
ەكىنشى: بالالارىڭىزدى "سۇراتىپ" ۆيدەوعا تۇسىرمەڭىزدەر... ءتىپتى، وزدەرىڭىز دە بىرەۋدەن كومەك سۇراۋعا ءماجبۇر بولساڭىزدار، بارىنشا بالالارعا بىلدىرمەي، كورسەتپەي سۇراۋعا تىرىسىڭىزدار، كومەكتى اپارىپ بەرگەندە دە، بارىنشا بالالارعا بىلدىرمەۋگە تىرىسىڭىزدار. كىشكەنتايلار "اپا، كىم بەردى، قايدان الدىڭ؟" دەپ سۇراسا، "بالاڭا ءپىسىرىپ بەر دەپ، قۇداي بەردى" دەڭىز...🤔 ەرەسەكتەرگە "اتاڭ بەرىپ جىبەرىپتى، اپاڭ بەرىپ جىبەرىپتى سەندەرگە" دەي سالىڭىز....بالاعا پايدالى، وزىڭىزگە زيانسىز وتىرىك ايتۋعا بولادى...🤗
قىسقاسى، ايتقىم كەلگەن نارسە - بالانىڭ بويىنداعى نامىسى ولمەسىن، ءوز قىلىقتارىڭىزبەن بالاڭىزدىڭ بويىنداعى سول ەڭ قۇندى قاسيەتتى ولتىرمەڭىزدەر. ولاردىڭ بويىندا "سۇرانشاقتانۋ" پسيحولوگياسىن قالىپتاستىرمايىق. بالانى جىلاتىپ، بالانىڭ اۋزىنا ءسوز سالىپ "سۇراتىپ" ۆيدەو تۇسىرمەڭىزدەر. وتىنەمىن!!!..
ارينە، تومەن تۇرمىسۆڭىزدى كورسەتىپ، بالالارىڭىزدىڭ ويناپ جۇرگەن ۆيدەوسىن ءتۇسىرىپ جولداۋعا بولادى...
زامان بۇلاي تۇرا بەرمەس. وزگەرەر. ولاردىڭ بولاشاعىن ويلايىق. نامىسشىل، ەڭبەكقور ەتىپ وسىرەيىك.
ايتقىم كەلگەنى وسى. ارقايسىسىڭىز وزدەرىڭىز تارازىلاپ، ساراپتارسىزدار.
قاتە ايتسام، ءوز ءسوزىم وزىمدىكى...
ساۋلە ابىلداحانقىزى
