قر پارلامەن سەناتىنىڭ دەپۋتاتى مۇرات باقتيارۇلى قاشىقتان وقىتۋعا قاتىستى ءوز پىكىرىن ءبىلدىردى، - دەپ حابارلايدى "ادىرنا" ۇلتتىق پورتالىنىڭ ءتىلشىسى. ول facebook جەلىسىندەگى جازباسىندا توعىزىنشى جانە ون ءبىرىنشى سىنىپتاردا وقيتىندار عانا قاشىقتان وقىتىلىپ، قالعان وقۋشىلارعا دەمالىس بەرىلسە دەگەن ۇسىنىس ايتتى.
"ەلىمىزدەگى قارانتين جاعدايىنا بايلانىستى ورتا مەكتەپتەردىڭ وقۋشىلارىن ءتورتىنشى توقساندا قاشىقتىقتان وقىتۋعا قاتىستى اتا- انالار اراسىندا ءار ءتۇرلى پىكىرلەر بار. ول ورىندى دا. باستى ماسەلە وسىنداي وقىتۋدىڭ تيىمدىلىگى قانداي بولادى، ەلدەگى 7600 مەكتەپتە وقيتىن 3 ملن استام وقۋشىلاردى تولىق قامتي الادى ما، اسىرەسە شالعاي ورنالاسقان اۋىلدارداعى ينتەرنەتى تۇگىل كومپيۋتەرى جوق وقۋشىلار قالاي وقيدى؟ جالپى ينتەرنەتتىڭ مۇمكىندىگى جەتەدى مە؟ ءتيىستى مينيسترلىك بۇل باعىتتا جۇمىس جاساپ جاتىر، بىراق قوعاممەن بىلىكتى ماماندارمەن اقىلداستى ما ؟ مۇنىڭ تاعى ءبىر جولى بار ەدى. ول 9 - شى جانە ءبىتىرۋشى 11 سىنىپتاردا وقيتىن وقۋشىلاردى عانا قاشىقتىقتان وقىتىپ، قالعان سىنىپتار وقۋشىلارىنا كانيكۋل بەرىپ، ولاردىڭ ساباعىن تامىزدىڭ 1 نەن باستاعان اناعۇرلىم ءتيىمدى بولعان بولار ەدى. ءوز پىكىرىم", - دەيدى مۇرات باقتيارۇلى.
"ادىرنا" ۇلتتىق پورتالى
فوتو: اشىق دەرەككوز
