ەۋروپالىق كوميسسيا ورمۇز بۇعازىنىڭ ىقتيمال جابىلۋىنا بايلانىستى ەنەرگەتيكالىق داعدارىستىڭ الدىن الۋ ءۇشىن شۇعىل شارالار جوسپارىن دايىندادى، دەپ حابارلايدى "ادىرنا" ۇلتتىق پورتالى.
بۇل ماسەلە ەۋروكوميسسيا پرەزيدەنتى ۋرسۋلا فون دەر ليايەن قاتىسۋىمەن وتكەن تاياۋ شىعىستاعى جاعدايعا ارنالعان پىكىرتالاستا قارالدى.
جوسپار كەلەسى اپتادا كيپردە وتەتىن ەۋروپالىق كەڭەستىڭ بەيرەسمي وتىرىسىندا مەملەكەت باسشىلارىنا ۇسىنىلادى. سونداي-اق 22 ساۋىردە بۇل تاقىرىپ بويىنشا رەسمي جاريالاۋ جوسپارلانىپ وتىر.
قۇجاتتىڭ نەگىزگى باعىتتارىنىڭ ءبىرى – ەنەرگيا باعاسىنىڭ قىمباتتاۋىنان زارداپ شەگۋى مۇمكىن وسال ءۇي شارۋاشىلىقتارى مەن نارىق سەكتورلارىن قورعاۋ.
سونىمەن قاتار ەنەرگيا تۇتىنۋىن ازايتۋ جانە ۇنەمدەۋ ساياساتى دا باستى نازارعا الىنعان. ۋرسۋلا فون دەر ليايەن پىكىرىنشە، پايدالانىلماعان ەنەرگيا – ەڭ ارزان ەنەرگيا، سوندىقتان تۇتىنۋدى قىسقارتۋ ماڭىزدى.
ونىڭ ايتۋىنشا، قازىرگى تاياۋ شىعىستاعى جاعداي قازبا وتىنعا تاۋەلدىلىكتى ازايتىپ، جاسىل ەنەرگياعا كوشۋ قاجەتتىگىن ايقىن كورسەتىپ وتىر.
ساراپشىلار مۇناي مەن گاز باعاسىنىڭ كۇرت ءوسۋى جاھاندىق نارىققا قىسىم تۇسىرگەنىن ايتادى. باعانىڭ قىمباتتاۋىنا اقش پەن ءيزرايلدىڭ يرانعا قاتىستى ارەكەتتەرىنەن كەيىنگى گەوساياسي شيەلەنىس اسەر ەتكەنى، ورمۇز بۇعازىنىڭ جابىلۋ قاۋپى جاعدايدى ۋشىقتىرعانى حابارلاندى.
