اقش پرەزيدەنتى دونالد ترامپ جاساندى ينتەللەكت كومەگىمەن جاسالعان، ءوزىن يسا پايعامبار بەينەسىنە ۇقساتىپ كورسەتكەن سۋرەتتى ءوشىرىپ، قوعامدا قىزۋ تالقىلاۋعا سەبەپ بولدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
اتالعان جاريالانىم Truth Social پلاتفورماسىندا پايدا بولعان. بۇل جاعداي ترامپ پەن ريم پاپاسى لەۆ XIV اراسىنداعى پىكىرتالاس اياسىندا ورىن العانى حابارلاندى.
باق مالىمەتىنشە، سۋرەتتە ترامپ اق مانتيا كيىپ، ءوزىن ەمشى رەتىندە بەينەلەگەن. الايدا ول ءوزىن يسا پايعامبارعا ۇقساتتى دەگەن پىكىرلەردى جوققا شىعارىپ، مۇنى «جالعان اقپارات» دەپ اتادى.
«دارىگەر رەتىندە ادامداردىڭ ساۋىعىپ كەتۋىنە كومەكتەسۋىم كەرەك، جانە مەن شىنىمەن دە كومەكتەسىپ ءجۇرمىن»، — دەدى دونالد ترامپ جۋرناليستەرگە.
اتالعان سۋرەت اسىرەسە ءدىني كونسەرۆاتورلار اراسىندا سىنعا ۇشىراپ، قوعامدا ءتۇرلى پىكىر تۋعىزدى. ساراپشىلاردىڭ ايتۋىنشا، بۇل جاعداي ترامپتىڭ ءدىني ەلەكتوراتىمەن قارىم-قاتىناسىنا اسەر ەتۋى مۇمكىن.
