بقو اكىمىنەن دە، "نۇر وتاننان" دا پايدا بولمادى

2267

رەداكتسيامىزعا حات كەلدى. ءار حاتتىڭ ارتىندا ادام تاعدىرى تۇرعانىن تۇسىنسەك، بۇل حاتتىڭ دا ارقالاعان جۇگى اۋىر ەكەن. اۆتورلاردىڭ ايتۋىنشا كورونوۆيرۋسقا بايلانىستى گەرمانياداعى جۇمىستارىنان ەلگە ورالعاندا ورالداعى اۋەجايدان ءتۇسىرىپ الىپ، كارانتينگە جاتقىزىپتى. قازىر بارار جەر، باسار تاۋىمىز جوق دەپ وتىر. سوندىقتان، بيلىكتەن كومەك بولماسا، حالىقتان كومەك بولار دەپ ارىز حاتتى جاريالاعاندى ءجون دەپ تاپتىق.

"ادىرنا" ۇلتتىق پورتالى

مەن  بازارباەۆا مارال جانە سەيتجانوۆا اقەركە 18 ناۋرىز كۇنى “Air-Astana” ۇشاعىمەن “فرانكفۋرت-ۋرالسك”، “ ۋرالسك – نۇر-سۇلتان”، “نۇر-سۇلتان – الماتى” باعىتىندا ەلگە ورالىپ، ءوز ۇيىمىزگە جەتۋ كەرەك بولعانبىز. الايدا، ورال قالاسىنا جەتكەندە  ەلىمىزدەگى توتەنشە جاعدايعا بايلانىستى 50-گە جۋىق مەملەكەتتىك قىزمەتكەرلەر (دارىگەرلەر، پوليتسيا،اۋە جەلىسىنىڭ قىزمەتكەرلەرى ت.ب) كۇتىپ الىپ، ءبىزدى رەيستەن قالدىرىپ، كارانتينگە جاتقىزدى.  ارنايى ورتالىققا ورنالاستىرار ساتتە بەكىتىلگەن مەرزىمگە دەيىن بيلەت اقىسى قايتارىلاتىنىن ايتتى. سونداي-اق، تىركەلگەن مەكەن-جاي بويىنشا ۇيىمىزگە جەتكىزۋگە ۋادە بەردى.

دەگەنمەن، جاعاداي ءبىز كۇتكەندەي بولا قويمادى. مەديتسينالىق تەكسەرۋ ۋاقىتىلى جۇرگىزىلمەدى. كورونوۆيرۋسقا بايلانىستى انىقتاما ورتالىعى (1406), وبلىستىق تۋبديسپانتسەردىڭ باس دارىگەرى يمانعاليەۆ م.ب.مىرزالارعا حابارلاسىپ ءجۇرىپ تەكسەرىستەن وتتىك. اناليز ناتەجيەسىنىڭ ءوزىن باسشىلىققا قايتا-قايتا حابارلاسىپ ءجۇرىپ، ونىنشى كۇنى ارەڭ الدىق. ال، بۇگىن (13-ءشى كۇنى) انىقتاما قاعازىن بەرىپ، مەكەمەنى بوساتۋىمىزدى تالاپ ەتىپ  وتىر. سەبەبىن ادام سانىنىڭ كوپتىگىمەن عانا تۇسىندىرۋدە. سوڭعى اقشامىزعا ۇشاققا بيلەت الىپ كەلگەن بىزدەر قايدا بارارىمىزدى دا بىلمەيمىز.

ءوز جاعدايىمىز وزىمىزگە ءمالىم بولعاسىن ورتالىققا ورنالاسقان العاشقى كۇننەن باستاپ قالا باسشىلىعىمەن، نۇر وتان پارتياسىنىڭ جاۋاپتى قىزمەتكەرلەرىمەن، بيلەت اقىسىن قايتارۋدى ۋادە ەتكەن  “Air-Astana” اۋە جەلىسىمەن، بقو، الماتى جانە نۇر-سۇلتان قالالارىنىڭ ارنايى شتاب وكىلدەرىمەن حابارلاسىپ باعۋدامىز. سوندا دا ماردىمدى جاۋاپ الىپ وتىرعانىمىز شامالى. العاش بولىپ ورال قالالىق نۇر وتان پارتياسى باسشىنىڭ ورىنباسارى  گۇلناز ماعجانقىزىمەن بايلانىسقا شىقتىق. ول كىسىنىڭ العاشقى جاۋابى “بۇل جاعدايدى نازاردان تىس قالدىرمايمىز، مىندەتتى تۇردە ماسەلەنىڭ شەشىمىن تابۋعا كومەك قولىن سوزامىز” –دەپ ءۇمىت بەرگەندەي ەدى... ارتىنان اكىمنىڭ ورىنباسارىنان ء“بىز ەشتەڭەمەن كومەكتەسە المايمىز”، وبلىس اكىمىنەن ء“بىز كومەكتەسە المايمىز، ءوز ماسەلەلەرىن وزدەرى شەشسىن” – دەگەن جاۋاپ العانىن جەتكىزدى. بۇل جاۋاپ ەندى پايدا بولعان ءۇمىت ۇشقىنىن قايتا ءسوندىردى. #bizbirgemiz #uidebol دەپ تورتكىل دۇنيەگە جار سالىپ وتىرعان حەشتەگتەر وتىرىك بەتپەردە بولعانى ما؟

كەلەسى كەزەكتە بقو توتەنشە جاعدايعا بايلانىستى قۇرىلعان ارنايى شتابقا حابارلاستىق. بىزگە جاۋاپ بەرگەن اسلان ەسىمدى جىگىت “سۇراقتى قاراستىرىپ، قايتا حابارلاسامىن” – دەپ تۇتقانى قويعانىمەن، از ۋاقىتتان سوڭ “بىزدە بۇل سۇراققا جاۋاپ قاراستىرىلماعان، تۋىسقاندارىڭىز اقشالاي كومەكتەسسىن، كارتوچكالارىڭىزعا اۋدارىپ جيناعان اقشامەن كارانتين بىتكەنشە وسىندا پاتەر جالداپ تۇرىڭىزدار، قالا اشىلعان سوڭ قالاي، قايدا باراتىندارىڭىزدى وزدەرىڭىز بىلەسىزدەر” دەپ دۇرسە قويا بەردى. كارانتينگە بايلانىستى جۇمىستاردىڭ ءبارى توقتاتىلدى، بۇل جاعداي كەلەسى ايعا دەيىن جالعاسسا اقشانى قايدان الامىز دەپ وتىرعان تۋعان-تۋىس بىزگە قالاي كومەك بەرەدى؟ ءبىر رەت كومەكتەستى دەلىك، ونىڭ ءوزى قانشا كۇنگە جەتەدى؟

ال، بۇگىن مەكەمەنى بوساتۋدى سۇراعان كارانتين ورتالىعىنىڭ باسشىلىعىنا جاعدايدى قانشا تۇسىندىرسەك تە ء“بىز بىلمەيمىز، قايدا باراسىزدار، ول سىزدەردىڭ ماسەلەلەرىڭىز” – دەپ، جاۋاپكەرشىلىكتەن قاشىپ وتىر. امالىمىزدىڭ جوقتىعىنان كتك ارناسىنىڭ تىلشىلەرىمەن بايلانىسقا شىقتىق. جاۋاپتى مەكەمە باسشىسىنا وسىنى جەتكىزىپ، “ەگەر ءبىزدى قۋىپ شىعاتىن بولساڭىزدار،ارنا تىلشىلەرىنە ءمان-جايدى بايانداۋعا ءماجبۇرمىز” دەگەننەن كەيىن عانا “جاقسى، ءبىز سىزدەردى ەستىدىك، قالا باسشىلىعىمەن حابارلاسىپ ماسەلەنى شەشۋگە تىرىسامىز” دەگەن جاۋاپقا قول جەتكىزدىك. كوپ ۇزاماي تۇراتىن پاتەر تابىلدى، دەگەنمەن “الايداسى” بار. كۇن-كورىس، ازىق-تۇلىك وزىمىزدەن بولۋ كەرەك ەكەن. بۇل جاعدايدىڭ قانشا ۋاقىتقا سوزىلارى بەلگىسىز. بوتەن قالادا، جۇمىسسىز ءبىزدىڭ قالتامىزداعى تيىن قانشا كۇنگە جەتەتىنىن ويلاۋ ءتىپتى قورقىنىشتى. سودان تۇيگەنىمىز، قاراپايىم حالىقتىڭ جاعداي نە بولارى ماڭىزدى ەمەس، كوگىلدىر ەكراننان كورىنەر ابىروي عانا ماڭىزعا يە ەكەن عوي شەندىلەر ءۇشىن... بۇل ءبىزدىڭ عانا ەمەس، ءدال قازىرگى ۋاقىتتا مىڭداعان وتانداسىمىزدىڭ ارپالىسىپ وتىرعان ماسەلەسى. وكىنىشتىسى دە سول، شەشىمى تابىلا قويۋى كوپ نۇكتەگە جاسىرۋلى قۇپيا...

پىكىرلەر
رەداكتسيا تاڭداۋى