باسقارما باسشىسى شەگە دە شىعارا الماي وتىرعانىمىزدى ايتتى

2366

بۇل جامبىل وبلىسى اكىمدىگىنىڭ وبلىستىق جەر پايدالانۋ جانە قورعالۋىن باقىلاۋ باسقارماسىنىڭ باسشىسى ابىلقايىر تامابەكتىڭ پىكىرى. پرەزيدەنتتىك جاستار كادر رەزەرۆىنىڭ وكىلى رەتىندە قاڭتار ايىندا باسقارما باسشىسى بولىپ تاعايىندالعان ول ەلىمىزدەگى «اتتەگەن-اي» دەيتىن كەمشىلىكتەرىمىزدى جازدى. سونداي-اق ول ءوزىنىڭ facebook.com پاراقشاسىندا تەندەر الۋشى ازاماتتارعا ءوزىنىڭ ۇسىنىس تىلەگىن بىلدىرگەن ەكەن. ادەتتە لاۋازىمدى ازاماتتار سىن ايتپاق تۇگىلى، «قىزمەتتەن ايرىلىپ قالمايىن» دەپ باسىن بۇعىپ وتىرۋشى ەدى. الايدا ابىلقايىر تامابەكتىڭ ەلىمىزدىڭ جاعدايىنا بەي-جاي قاراماي، ءوز ويىن ورتاعا سالۋى وڭ وزگەرىستىڭ باسى دەپ ەسەپتەيمىز.

«قاراپايىم شەگە شىعاراتىن تسەح جوق، بارلىعى يمپورت. قايران، وسى كۇنگە دەيىن يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى (گپير) اياسىندا بۇگىن اشىلىپ، ەرتەسىنە جابىلىپ قالعان زاۋىتتارعا بولىنگەن ميللياردتاعان اقشالار-اي؟! وتكەن نارسە ءوتتى، ءتۇبى ءار نارسەنىڭ سۇراۋى بولادى. اللا قالاسا بۇل كەزەڭ دە وتەر. بىراق، الدىڭعى كەزەڭدەر بىزگە ساباق بولىپ، وسى جولى قورىتىندى شىعارايىقشى. #bizbirgemiz دەپ جاي عانا ۇرانداتىپ، كوزبوياۋشىلىق جاساماي، شىنىمەن بىرىگەيىكشى!
وسى ورايدا مەنىڭ ۇسىنىسىم نەمەسە ءوتىنىش-تىلەگىم بار.
1. «تەندەر» بەرۋشىلەر مەن الۋشىلارعا:
بارشامىزعا بەلگىلى قولدانىستاعى زاڭناما بويىنشا مەملەكەتتىك ساتىپ الۋلارعا قاتىسۋشىلار اشىق كونكۋرس ارقىلى باعانى كەمى 30%-عا (كەيدە 50-60%-عا دەيىن) تۇسىرەتىن. توتەنشە جاعدايدىڭ جاريالانۋىنا بايلانىستى 250 مىڭعا جۋىق ادامدى جۇمىسپەن قامتۋعا باعىتتالعان جۇمىسپەن قامتۋدىڭ جول كارتاسى بويىنشا بولىنەتىن قاراجات مەملەكەتتىك ساتىپ الۋلار ارقىلى (اعىمداعى جانە كۇردەلى جوندەۋلەر بويىنشا) ءبىر كوزدەن بەرىلەتىندىكتەن، الەۋەتتى جەتكىزۋشى بولىنگەن قاراجاتتى 100% الادى. تەندەر بەرۋشىلەر كورىنگەن كوك اتتىعا بەرمەسى بەلگىلى عوي، تەندەردى بەرەر كەزدە انانى-مىنانى سۇراماي، بولىنگەن اقشانى تالان-تاراجعا سالماي، تەندەردى الۋشىلارعا اينالايىن ءوتىنىش، قارجىنى 100% الىپ جاتسىڭ، بۇعان دەيىنگىدەي تومەن باعا ۇسىنىپ اۋرەلەنبەيسىڭ. بىراق، تاپقان پايداڭا جالعا بەرۋ ءۇشىن، ءۇي، عيمارات الا بەرمەي، نەمەسە جەر الىپ، ءۇي سوعىپ ساتىپ جىبەرىپ پايدا كورمەي-اق، ءبىر ءوندىرىس اشساڭ (شەگە، پلاستيك ونىمدەرى، نان ونىمدەرى، كيىم تسەحى ت.ب.), وندىرىستەن تۇسكەن پايدا ءپاسسيۆتى بيزنەسكە قاراعاندا كوپ قوي، كوبىرەك پايدا تابار ەدىڭ، قانشا ادامدى جۇمىسپەن قامتۋشى ەدىڭ، وسى جاعدايدى ساعان جاساپ وتىرعان مەملەكەت قوي، سەن دە بيۋدجەتكە سالىق تولەپ، ەل دامۋىنا ۇلەس قوسار ەدىڭ دەسە، دەسە...
تەندەر الۋشى ءوز كەزەگىندە، وسى ايتقان وتىنىشتەردى ورىنداسا، تۇراقتى تۇردە جۇمىس ىستەيتىن قانشاما جۇمىس ورىندارى اشىلار ەدى.
2. كاسىپ اشۋ ءۇشىن نەسيە الۋشىلارعا:
بۇل دا بارىمىزگە بەلگىلى، وسى كۇنگە دەيىن «اتامەكەن» ۇكپ مەن «دامۋ» ارقىلى كوپتەگەن ادامدار نەسيە الىپ، مال باسىن كوبەيتەمىن دەپ ءوز قوراسىندا تۇرعان مالعا سىرعا سالعىزىپ، ەسەپكە قويىپ مال الدىم دەپ، مال ساتىپ الۋعا العان قارجىسىنا كولىك نەمەسە باسقا قاجەتىن تۇگەندەپ جاتتى. تاعى ءبىر مىسال، تىگىن تسەحىن اشتىم نەمەسە ناۋبايحانا اشتىم دەپ، بىرەۋدىڭ ءوز قاراجاتىنا ساتىپ العان دۇنيەلەرىنىڭ چەگىن وتكىزە سالىپ، نەسيەنى تولەيتىن ءوزىم عوي دەپ قارجىنى باسقا ماقساتتارعا جۇمساپ جىبەردى.
بۇل جولى، ينۆەستيتسيالىق ماقساتتا بولىنەتىن 1 ترلن. (6%-بەن), كاسىپكەرلەرگە بولىنەتىن 600 ملرد. (8%-بەن) بويىنشا نەسيە العاندا، نەسيە الۋشىلار قانداي ماقساتتا الدى، سول ماقساتتا جۇمساسا، بۇل باعىتتا دا ءبىراز جۇمىس ورىندارى اشىلار ەدى.
ايتپەسە، ءبىر-ءبىرىن الداعان جۇرت ايتەۋىر. ەل اۋزىنان جىرىپ، سونشا اقشا ءبولىنىپ جاتقاندا، وسى ۋاقىتقا دەيىنگىلەر سياقتى ناتيجەسىز بولسا، وكىنىشتىسى سول ەمەس پە؟!
مەنىڭ ءوتىنىشىم وسى، بۇل جولى دا بۇرىنعىداي بولماسا ەكەن...

سەرىك قۇدايبەرگەنۇلى،

"ادىرنا" ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket