تەاتر تارلانى رايىمبەك سەيتمەتوۆ

644

1938 جىلى 2 ناۋرىزدا قازاقستاننىڭ حالىق ءارتىسى، قازاقستان مەن قىرعىزستاننىڭ ەڭبەك سىڭىرگەن ونەر قايراتكەرى، مەملەكەتتىك جانە جاستار سىيلىقتارىنىڭ جانە تاۋەلسىز «تارلان» سىيلىعىنىڭ لاۋرەاتى، پروفەسسور رايىمبەك نوعايبايۇلى سەيتمەتوۆ   دۇنيەگە كەلدى.

وڭتۇستىك قازاقستان وبلىسىنىڭ تۇركىستان قالاسىندا تۋعان. الماتى مەملەكەتتىك ونەر ينستيتۋتىن بىتىرگەن. 1970-1971 جىلدارى ماسكەۋدەگى مەملەكەتتىك تەاتر ونەرى ينستيتۋتى جانىنداعى جوعارى رەجيسسەرلەر كۋرسىندا وقىعان. 1959-1960 جىلدارى - «قازاقفيلم» كينوستۋدياسىنىڭ اكتەرى. 1960-1980 جىلدارى - قازاق مەملەكەتتىك اكادەميالىق دراما تەاترىنىڭ اكتەرى، ديرەكتورى. 1980-82 جىلدارى قازاق كسر مادەنيەت مينيسترلىگى ونەر ىستەرى باسقارماسىنىڭ باستىعى. 1982-1995 جىلدارى قازاق مەملەكەتتىك اكادەميالىق جاستار مەن بالالار تەاترىنىڭ باس رەجيسسەرى ءارى كوركەمدىك جەتەكشىسى بولعان. 1995 جىلدان ءومىرىنىڭ سوڭىنا دەيىن ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ «ونەر» كافەدراسىن باسقارعان. ساحنالىق ونەر جولىندا اۋباكىر (ق.بايسەيىتوۆ، ق.شاڭعىتباەۆ «بەۋ، قىزدار-اي»), ارىستان، سۇڭعات (ق.مۇحامەدجانوۆ «بولتىرىك بورىك استىندا»، «قۇداعي كەلىپتى»), قوزى (ع.مۇسىرەپوۆ «قوزى كورپەش - بايان سۇلۋ»), ءابىش (م.اۋەزوۆ، ل.سوبولەۆ «اباي»). شوقان (س.مۇقانوۆ «شوقان ءۋاليحانوۆ»), جايناق (ش.ايتماتوۆ انا - جەر-انا»), كوچكارەۆ (ن.گوگول «ۇيلەنۋ»), ليۋچەنتسيو، كاسسيو (ۋ.شەكسپير «اساۋعا تۇساۋ»، «وتەللو») سەكىلدى ءار الۋان رولدەردى ويناۋدا ورىنداۋشىلىق شەبەرلىگىمەن كوزگە ءتۇستى. ول رەجيسسەرلىك قىزمەتپەن دە شۇعىلدانىپ، قازاق مەملەكەتتىك اكادەميالىق دراما تەاترىندا ب.ءمايليننىڭ «نەكە قيار»، ءا.ءتارازيدىڭ «جولى بولعىش جىگىت»، قازاق مەملەكەتتىك اكادەميالىق جاستار مەن بالالار تەاترىندا اۋەزوۆتىڭ «الۋا»، ت.ابدىكوۆتىڭ «ءبىز ۇشەۋ ەدىك»، ع.مۇسىرەپوۆتىڭ «اقان سەرى - اقتوقتى»، ش.مۇرتازانىڭ «ستالينگە حات»، «بەسەۋدىڭ حاتى»، و.سۇلەيمەنوۆ پەن ب.مۇقايدىڭ «زاماناقىر»، ت.ب. تۋىندىلاردى قويعان.

تەاترعا ءومىرىن ارناعان تۇلعا 2007 جىلى قايتىس بولدى.

تۇركىستان قالاسىنداعى سازدى-دراما تەاترىنا 2017 جىلى رايىمبەك سەيتمەتوۆتىڭ ەسىمى بەرىلدى. تەاتر عيماراتىندا 250 ادامعا ارنالعان كورەرمەن زالى مەن مۇراجاي بار.

پىكىرلەر