تۋريزم سالاسىن دامىتۋدا جان-جاقتى جوبالار جۇزەگە اسىپ جاتقان تۇركىستان تۇركى الەمىنىڭ استاناسى رەتىندە الەمدىك ارەنادا قازاقستاننىڭ بەدەلىن بيىكتەتە بەرۋى ءتيىس دەپ حابارلايدى «ادىرنا» ۇلتتىق پورتالى تۇركىستان وبلىستىق ءباسپاسوز قىزمەتىنە سىلتەمە جاساپ.
يۋنەسكو-نىڭ قورعالۋ ايماعىنداعى عيماراتتار قوجا احمەت ياساۋي كەسەنەسىنىڭ بيىكتىگىنەن اسپايدى. جانە بارلىق جەردە ماۆزولەي كورىنىپ تۇرۋى قاجەت. بۇل اۋماقتاعى عيماراتتار مەن باسپانالار ورتاازيالىق ۇلگىدە سالىنۋدا. قازاقى ناقىشتا، ويۋ-ورنەكتەر قولدانىلادى. وبلىس اكىمى ومىرزاق شوكەەۆ كەزەكتى رەت شاھارداعى قۇرىلىس جۇمىستارىنىڭ بارىسىن باقىلادى. ءوڭىر باسشىسىنىڭ قاتاڭ قاداعالاۋىمەن جۇرگىزىلىپ جاتقان مادەني -رۋحاني ورتالىقتاعى حالىقارالىق دەڭگەيدەگى نىساندار الەم تۋريستەرىن قىزىقتىراتىن ءارى تاريحتان سىر شەرتەتىن عاجاپ ورتالىققا اينالۋدا.
تۇركىستان قالاسىندا شاھارعا ەرەكشە كورىك بەرەتىن اۋقىمدى جوبالاردىڭ قۇرىلىسى جالعاسۋدا. سولاردىڭ ءبىرى دە بىرەگەيى – «كەرۋەن-ساراي» كەشەنى.
جوسپار بويىنشا بۇل كەشەن كونە زاماننىڭ ەجەلگى ساۋدا الاڭدارىن ەسكە تۇسىرەتىن ۇلكەن شىعىس ۇلگىسىندەگى گراند-بازارعا اينالادى. «كەرۋەن-ساراي» اۋماعىندا قوناقۇيلەر، كينوتەاترلار، مەيرامحانالار، تاريحي-ساۋدا كوشەسى مەن جاساندى كولمەن قاتار، كەشەنگە جاقىن جەردە «كەرۋەن ساراي» تۇرعىن ءۇي كەشەنى ورنالاسادى. تۇرعىن ءۇي كەشەنىنىڭ كورىنىسى نەگىزگى كەشەن مەن كونە قالا ورتالىعىنىڭ جالپى كەلبەتىنە سايكەس، ەجەلگى قالانىڭ رۋحىن، قايتالانباس ۇلگىسى مەن بىرەگەي ساۋلەتىن ساقتايدى.
سونداي-اق تۇركىستان قالاسىنىڭ مادەني-رۋحاني ورتالىعىندا زاماناۋي باسپانالار بوي كوتەردى. كونە شاھاردىڭ ەڭ كورىكتى جەرىندە ورنالاسقان «Keruen Sarai» تۇرعىن ءۇي كەشەنىنەن پاتەر مەن تاۋنحاۋس ساتىپ الۋعا بولادى. شىعىستىڭ اسەم كەلبەتى مەن ەجەلگى شاھاردىڭ بىرەگەي بەينەسى ساقتالعان كەشەن ياساۋي كەسەنەسىنە جاقىن جەردە ورنالاسقان. تۇرعىن ءۇي كەشەنى ەكى جانە ءۇش قاباتتى 9 كەشەننەن تۇرادى. 1, 2 جانە 3 بولمەلى پاتەرلەر مەن تاۋنحاۋستاردان تۇراتىن 125 تۇرعىن ءۇي جايعاسقان.
تۇركىستانىڭ جاڭا كورىكتى اۋماعىنداعى قۇرىلىس بارىسىن وبلىس اكىمى ومىرزاق شوكەەۆ ارالاپ كوردى. قۇرىلىسشىلارمەن كەزدەسكەن ءوڭىر باسشىسى جاۋاپتى تۇلعالارعا دەمالىس ورىندارىنداعى بالالار الاڭقايلارىنىڭ ساپاسى مەن قاۋىپسىزدىگىن ءجىتى قاداعالاۋدى جۇكتەدى.
