ساۋد ارابيا كوروناۆيرۋسقا بايلانىستى جەتى مەملەكەتتىڭ ازاماتتارىنا ەلەكتروندى ۆيزا بەرۋدى ۋاقىتشا توقتاتتى. بۇل ءتىزىمنىڭ ىشىندە قازاقستان دا بار. بۇل تۋرالى ساۋد ارابياسىنىڭ SPA اقپارات اگەنتتىگى حابارلادى.
"كوروناۆيرۋستىڭ تارالۋىن الدىن الۋ ماقساتىندا قىتاي، جاپونيا، سينگاپۋر، مالايزيا، وڭتۇستىك كورەيا، يتاليا جانە قازاقستان ازاماتتارىنا ەلەكتروندى ۆيزا بەرۋ ۋاقىتشا توقتاتىلدى. سونىمەن قاتار اتالمىش ەل ازاماتتارى ساۋد ارابيانىڭ اۋەجايلارىنان تۋريستىك ۆيزا الا المايدى" دەپ جازىلعان SPA اقپارات اگەنتتىگى تاراتقان حابارلامادا.
قازاقستاننىڭ كوروناۆيرۋس ىندەتى جايلاعان ەلدەر قاتارىنا قالاي كىرگەنى ءالى بەلگىسىز. بۇگىنگى كۇنگە دەيىن قازاقستاندا كوروناۆيرۋس جۇقتىرعاندار تىركەلمەگەن. رەسمي دەرەك بويىنشا، ساۋد ارابياسىندا كوروناۆيرۋس تابىلماعان. الايدا ۆيرۋس تاياۋ شىعىس ەلدەرىندە، ونىڭ ىشىندە يراندا جىلدام تاراپ بارادى.
سوڭعى دەرەك بويىنشا، مۇندا COVID-19 ۆيرۋسىنان 26 ادام كوز جۇمعان. 27 اقپاندا ساۋد ارابياسى جىل سايىن الەمنىڭ تۇكپىر-تۇكپىرىنەن ميلليونداعان ادام قاجىلىق ساپار جاسايتىن مەككە مەن ماديناعا ۇشاتىن رەيستەردى توقتاتقان بولاتىن.
qamshy.kz
