تەولوگيالىق وڭالتۋ جۇمىسىن اتقارىپ ءجۇرىپ بايقاعانىم – جات اعىمداردىڭ جەتەگىنە ەرگەن ازاماتتاردىڭ كوپشىلىگىنە العاشقى ەستىگەن ءدىني مالىمەتتەرى قاتتى اسەر ەتەدى. وعان سول اقپارات اينىماس اقيقاتتاي بولىپ كورىنەدى. اقپاراتتى ايتۋشى ادامدى دا اقيقاتتىڭ العاداي ەلشىسىندەي مويىندايدى. ولارعا شاڭ جۋىتپاۋعا تىرىسادى. ماسەلەن، سالافيلەردىڭ: «اللا اسپاندا»، «ول ارشىنى مەكەن ەتەدى»، «ناماز وقىماعان ادام كاپىر»، «قۇران جانە سۇننەتپەن باسقارىلمايتىن ەل – كاپىر مەملەكەت» جانە ت.ب. ءدىني ۇعىمدارىن العاش بولىپ ەستىپ العان ادامنىڭ كوپشىلىگى بۇل تەرىس تۇجىرىمدارعا يمانداي سەنىپ-نانادى. تەولوگتار اتالعان ءدىني تۇجىرىمداردى تەرىسكە شىعاراتىن ءجۇز دالەل الىپ كەلسە دە، باسىم كوپشىلىگى رايىنان قايتا قويمايدى. شىن مانىندە اقيقاتتى ىزدەگەن ازاماتتار البەتتە بۇلتارتپاس دالەلدەر كەلتىرگەندە، وزدەرىنىڭ جاڭساق كەتكەنىن مويىنداپ، تاۋبەگە كەلەدى. بىراق، كوپشىلىگىنىڭ كوزقاراسى وزگەرە قويمايدى.
جات اعىم جەتەگىنە ەرۋشىنىڭ قاساڭ كوزقاراسىنىڭ وزگەرمەۋىنىڭ ارينە بىرنەشە سەبەبى بار دەپ ويلايمىز. ايتالىق، جات اعىمعا ەرۋشىنىڭ بۋكۆاليستىك تۇسىنىگى ايات-ءحاديستىڭ سىرتقى (زاحيري) ماعىناسىن قابىلداعانىنان ونىڭ كوزقاراسى وزگەرمەۋى بەك مۇمكىن. نەمەسە قاتايىپ الۋىنا ناداندىعى اسەر ەتۋى ىقتيمال. ءبارىن ءبىلۋشى – ءبىر اللا ەكەنىنە ءشۇبام جوق. دەسە دە، مەنىڭ ايتپاعىم بۇل ەمەس. ايتپاعىم – ءدىني ماسەلەلەر تۋىنداماس ءۇشىن اقپاراتتىق قاۋىپسىزدىككە وتە بەكەم بولۋىمىز شارت. جات اعىمداردىڭ تەرىس ءدىني كوزقاراستارىنىڭ تارالۋىنىڭ جولىن كەسپەدىك پە، وندا ونى تىڭداپ اداسقان باۋىرلارىمىزعا رەنجىمەۋىمىز كەرەك. ويتكەنى، ولاردىڭ اداسۋىنا ءوزىمىز جول بەرىپ قويدىق. ارانداتۋشى اقپاراتتاردى وتكىزىپ العاننان كەيىن كىمگە وكپەلەۋىمىز كەرەك؟ البەتتە، بەيقامدىق تانىتقانىمىز ءۇشىن وزىمىزگە ءوزىمىز زاپى بولۋعا ءتيىستىمىز. ءاسىلى، ولاي بولماس ءۇشىن اقپارات كوزدەرىن قاتاڭ باقىلاۋدا ۇستاپ، حابار تاراتاتىن جەلىلەرگە تاسقۇرساۋ ءتارتىپ ورناتۋىمىز قاجەت. ال، ءدىني قاجەتتىلىكتىڭ ورنىن ءداستۇرلى ءاھلى-سۇننەت باعىتىنداعى ۋاعىزشىلاردىڭ ناسيقاتىمەن تولتىرعانىمىز ابزال. ياعني، حالىققا الدىمەن ءدىني اقپاراتتى ءوزىمىز تاراتساق، سوندا اداسۋشىلىققا جول بەرىلمەيتىن بولادى.
مۇحان يساحان.
ءدىنتانۋشى. PHD دوكتورى.
قمدب جانىنداعى عۇلامالار كەڭەسىنىڭ مۇشەسى.
شقو ءدىن ماسەلەلەرىن زەرتتەۋ ورتالىعىنىڭ تاپسىرىسى بويىنشا.
