اباەۆ ەلباسىنىڭ نەمەرەسى تۋرالى ماقالالار ءۇشىن جازالاۋ تۋرالى: سۇراق New York Times-كە قاتىستى بولماۋى مۇمكىن
قر تۇڭعىش پرەزيدەنتى نۇرسۇلتان نازارباەۆتىڭ نەمەرەسى – ايسۇلتان نازارباەۆتىڭ جازبالارى تۋرالى اقپاراتتىڭ جاريالانۋى جازاسىز قالمايتىندىعى تۋرالى مالىمدەمە امەريكاندىق New York Times باسىلىمىنا قاتىستى بولماۋى دا مۇمكىن، دەپ مالىمدەدى قر اقپارات جانە قوعامدىق دامۋ ءمينيسترى داۋرەن اباەۆ.
«بۇل جەردەگى ماسەلە تەك قۇقىقتىق تۇرعىدان عانا ەمەس، سونىمەن بىرگە، مورالدىق تۇرعىدان دا دالەلدەۋمەن بايلانىستى. ياعني، جەكە ادامدار جەتكىزۋگە تىرىساپ جاتقان نارسەلەردەن گورى بۇل جاعدايعا الدەقايدا تەرەڭىرەك ءۇڭىلۋ كەرەك. ادەيى جالعان اقپارات تاراتۋ، ازاماتتاردىڭ ويىن مانيپۋلياتسيالاۋ – بۇنىڭ بارلىعى پرەسس-رەليزدە كورسەتىلگەن ماسەلەلەر بولىپ سانالادى»، - دەدى اباەۆ قازتاگ-ءتىڭ ەلباسىنىڭ نەمەرەسىنىڭ جەلىدەگى جازبالارىنا قاتىستى جاريالانعان اقپاراتتى قالاي «جازاسىز قالدىرماعانى» تۋرالى قويىلعان سۇراعىنا جاۋاپ بەرە وتىرىپ.
الايدا ول جازا قولدانىلاتىن نەگىزگە الىنعالى وتىرعان ناقتى باپ پەن نورماتيۆتىك اكتىنى اتاي المادى.
«ماماندار كومەگىنە جۇگىنۋ كەرەك. ەگەر ءسىز ماعان ناقتىلاپ ايتساڭىز، مەن ءسىزدىڭ سۇراعىڭىزعا جاۋاپ بەرەمىن. مۇنى زاڭ تۇرعىسىنان قاراستىرۋ كەرەك. ءبىز جانە ونى قاراستىرىپ جاتىرمىز. مەن قارادىم، بىراق مەن ءسىز سۇراپ وتىرعان ناقتى باپتىڭ سىلتەمەسىن كەيىنىرەك بەرە الامىن»، - دەدى مينيستر.
New York Times, The Times جانە باسقا دا ءىرى شەتەلدىك بۇقارالىق اقپارات قۇرالدارىندا وسى تاقىرىپتاعى جاريالانىمداردى قالاي «جازاسىز قالدىرمايتىنى» تۋرالى سۇراققا اباەۆ بۇل مالىمدەمەنىڭ ولارعا قولدانىلماۋى مۇمكىن دەپ جاۋاپ بەردى.
«مۇنى دا قاراۋ كەرەك شىعار. ءسىز بۇل ماسەلەنىڭ ناقتى New York Times گازەتىنە قاتىستى ايتىلماعان بولۋى مۇمكىن ەكەنىن دە ءتۇسىنىپ وتىرسىز»، - دەدى اباەۆ.
ەستەرڭىزدە بولسا، 13 اقپانداعى سوڭعى جازباسىندا ايسۇلتان نازارباەۆ ۇلىبريتانيادان ساياسي باسپانا سۇرادى. سونداي-اق، ول قولىندا «رەسەي مەن قازاقستان ۇكىمەتى اراسىنداعى اسا اۋقىمدى سىبايلاس جەمقورلىق تۋرالى اقپارات بار» ەكەندىگىن، تۇڭعىش پرەزيدەنت پەن ونىڭ قىزىن دا، ەلباسى وتباسىنىڭ باسقا دا مۇشەلەرىنىڭ تەرىس ارەكەتتەرىن اشكەرەلەيتىن باسقا دا مالىمەتتەردى جاريالادى. ايسۇلتان نازارباەۆتىڭ اشىق مالىمدەمەلەرى بۇقارالىق اقپارات قۇرالدارىندا كەڭىنەن اتاراتىلدى – اقدم توراعاسى اباەۆ بۇل باسىلىمدار جازاسىز قالمايدى دەپ سەس كورسەتتى. الايدا، قر اقپارات جانە كوممۋنيكاتسيالار ءمينيسترىنىڭ ەسكەرتۋىنە قاراماستان، تۇڭعىش پرەزيدەنتتىڭ نەمەرەسىنىڭ سوزدەرىن الەمنىڭ جەتەكشى باسىلىمدارى، سونىڭ ىشىندە The New York Times, The Times, Reuters, ربك، كوممەرسانت، ۋكراينالىق Unian, بەلارۋس، ۋكراين، يتاليان جانە باسقا الەمدىك بۇقارالىق اقپارات قۇرالدارى جارىسا جاريالاۋدا.
