ۇلتتىق قاۋىپسىزدىك كوميتەتى توراعاسىنىڭ ورىنباسارى نۇرعالي بىلىسبەكوۆ سالافيزمگە تىيىم سالۋعا قاتىستى پىكىر ءبىلدىردى، دەپ حابارلايدى Sputnik قازاقستان.
"سالافيزمگە تىيىم سالۋ ماسەلەسىنە كەلەر بولساق، ءبىز بۇعان دەيىن ونى جان-جاقتى زەردەلەدىك. قوعام اراسىندا پىكىرتالاستار دا بولىپ جاتادى. دەگەنمەن، ازىرشە وعان تىيىم سالۋ جاعى قاراستىرىلىپ وتىرعان جوق", - دەدى بىلىسبەكوۆ جۋرناليستەرگە بەرگەن سۇحباتىندا.
كوميتەت توراعاسىنىڭ ورىنباسارى سالافيزمگە تىيىم سالۋ ماسەلەسىن ءتۇسىندىردى.
"سالافيزم تەرروريستىك ۇيىم ەمەس، بۇل – وي-يدەولوگيا. ماسەلەن، "حيزبۋت-تاحرير" نەمەسە "تابلي جاماعات" – بۇل ۇيىمدار، ولاردىڭ ورتالىعى مەن قۇرىلىمدارى بار. ۇيىمداستىرۋ جۇمىستارى دا جۇرگىزىلەدى. ال سالافيزم – بۇل دىنگە دەگەن كوزقاراس، ءدىني اعىم", - دەپ اتاپ كورسەتتى بىلىسبەكوۆ.
ونىڭ ايتۋىنشا، بۇگىندە قاقتىعىس ايماقتارىنا باراتىن قازاقستاندىقتاردىڭ ىشىندە سالافيزمگە بەت بۇرعاندار دا، ءداستۇرلى ءدىندى ۇستايتىندار دا بار.
"وسى ۋاقىتقا دەيىن قاقتىعىس ايماقتارىنان قايتارىلعان 41 قازاقستان ازاماتى قىلمىستىق جازاعا تارتىلدى. ەشكىم ازاماتتىقتان ايىرىلعان جوق", - دەيدى بىلىسبەكوۆ.
