Ulttyq qaýipsizdik komıteti tóraǵasynyń orynbasary Nurǵalı Bilisbekov salafızmge tyıym salýǵa qatysty pikir bildirdi, dep habarlaıdy Sputnik Qazaqstan.
"Salafızmge tyıym salý máselesine keler bolsaq, biz buǵan deıin ony jan-jaqty zerdeledik. Qoǵam arasynda pikirtalastar da bolyp jatady. Degenmen, ázirshe oǵan tyıym salý jaǵy qarastyrylyp otyrǵan joq", - dedi Bilisbekov jýrnalısterge bergen suhbatynda.
Komıtet tóraǵasynyń orynbasary salafızmge tyıym salý máselesin túsindirdi.
"Salafızm terrorıstik uıym emes, bul – oı-ıdeologııa. Máselen, "Hızbýt-Tahrır" nemese "Tablıı Jamaǵat" – bul uıymdar, olardyń ortalyǵy men qurylymdary bar. Uıymdastyrý jumystary da júrgiziledi. Al salafızm – bul dinge degen kózqaras, dinı aǵym", - dep atap kórsetti Bilisbekov.
Onyń aıtýynsha, búginde qaqtyǵys aımaqtaryna baratyn qazaqstandyqtardyń ishinde salafızmge bet burǵandar da, dástúrli dindi ustaıtyndar da bar.
"Osy ýaqytqa deıin qaqtyǵys aımaqtarynan qaıtarylǵan 41 Qazaqstan azamaty qylmystyq jazaǵa tartyldy. Eshkim azamattyqtan aıyrylǵan joq", - deıdi Bilisbekov.
