انشىلەرگە ەندى اۆتورلار دا قوسىلماق. مەيرامبەك بەسپاەۆتىڭ شۋلى مالىمدەمەسى

2260
"قازاقتىڭ بوزتورعايى" اتانعان مەيرامبەك بەسپاەۆ نە جازسا دا الەم جەلىدە حيت بولىپ جاتادى. سەبەبى، مەيرامبەك تە بىلەدى نە جازۋ كەرەك ەكەنىن. باسقا انشىلەر سياقتى جەگەن تاماعىن، كيگەن كيىمىن سالۋ مەيرامبەكتىڭ ادەتىندە جوق. سول مەيرامبەك بۇگىن انشىلەردىڭ مۇددەسىن قورعاپ شىقتى.
كەشە عانا قازاقستان ورىنداۋشىلار وداعىنىڭ باسقارما توراعاسى بولىپ سايلانعان بەسپاەۆ ەشقاشان جوعارى قىزمەتكە ۇمتىلماعانىن دا جاسىرماعان بولاتىن.

"بۇگىن ونەردە جۇرگەن بارشا ارىپتەسىم ۇسىنىس جاساپ، ءبىراۋىزدان داۋىستارىن بەرىپ، مەنى قازاقستان ورىنداۋشىلار وداعىنىڭ (كوۋپيس) باسقارما توراعاسى ەتىپ سايلادى. ءبىراز جۇرت بىلەدى، قازىرگى تاڭدا بۇل قوعامدىق ۇيىمنىڭ قارجىلىق جاعدايى ناشار، ءبىراز قۇرىلىمداردىڭ الدىندا قارىزى بار، انشىلەر مەن ءان وڭدەۋشىلەردىڭ الدىندا بەدەلى دە تومەندەپ كەتكەن.  بىرلەستىك تاريحىنىڭ وسىنداي اۋىر كەزەڭىندە ارىپتەس-دوستارىم مەنى باسشى قىپ سايلاپ وتىرعانى - ماعان سەنگەنى دەپ قابىلداپ وتىرمىن. ارينە، مۇنداي ۇيىمعا جەتەكشىلىك ەتۋ ماعان ۇلكەن جاۋاپكەرشىلىك ارتاتىنىن جان-دۇنيەممەن جاقسى سەزىنىپ ءارى ءتۇسىنىپ وتىرمىن. مەن ەشقاشان باسشىلىق قىزمەتكە ۇمتىلعان ادام ەمەسپىن. مۇنى ءبىر ساحنادا جۇرگەن ارىپتەستەرىم مەن قادىرلى تىڭدارماندارىم دا جاقسى بىلەدى", - دەپ جازعان بولاتىن.

بۇگىن مەيرامبەك بەسپاەۆ ءوزىنىڭ ينستاگرامم پاراقشاسىندا بەلگىلى قوعام قايراتكەرى زاعيپا باليەۆاعا قاراتا مالىمدەمە جاسادى. ءانشىنىڭ ايتۋىنشا، باليەۆانىڭ ۇلى وسى وداقتى بۇرىن باسقارىپ، انشىلەردىڭ تيەسىلى اقشاسىن بەرمەي كەلگەن ەكەن. جاڭادان سايلانعان توراعاعا زاعيپا باليەۆا قۇقىق قورعاۋ ورگاندارى ارقىلى قىسىم كورسەتىپ جاتسا كەرەك. مەيرامبەكتىڭ ءسوزىن قاز قالپىندا بەرەيىك.

"قۇرمەتتى زاعيپا ياحياقىزى!
مەن 2020 جىلدىڭ 15 قاڭتار كۇنى قازاقستان ورىنداۋشىلار وداعىنىڭ باسقارما توراعاسى بوپ سايلاندىم. داۋىس بەرۋگە ۇيىمنىڭ ەڭ جوعارعى باسقارۋ ورگانى - قۇرىلتايشىلاردىڭ جالپى جيىنى جاساقتاعان باسقارما مۇشەلەرىنىڭ بارلىعى قاتىستى. سايلاۋ وتكىزۋگە قاجەتتى كۆورۋم بولدى. بارلىق رەگلامەنت پەن زاڭدىلىق تولىقتاي ساقتالدى. حاتتاما تولتىرىلىپ، مەنى باس ديرەكتور قىزمەتىنە كىرىسۋىم تۋرالى بۇيرىق تا شىعىپ قويدى. ەندى كەلىپ، بۇرىنعى باسشىلىق جاڭا باسشىلىققا قارسى قوقاڭ-لوققى كورسەتىپ، ءارتۇرلى جاعىمسىز ارەكەتتەر ارقىلى قارسىلىق كورسەتۋدە. بۇرىنعى باسشىلىقتىڭ ارتىندا ءسىزدىڭ ۇلىڭىز جانە ءوزىڭىز تۇر ەكەنسىز. ءسىز زاڭدى تۇردە سايلانعان ماعان، باسقارما مۇشەلەرىنە قىسىم كورسەتىپ، ءارتۇرلى مەملەكەتتىك جانە قۇقىق قورعاۋ ورگاندارىنا تەلەفون شالىپ جاتىر ەكەنسىز. مۇنىڭىز مۇلدە دۇرىس ەمەس دەپ بىلەمىز! نەگە ءسىز انشىلەردىڭ شارۋاسىنا ارالاسىپ، الاشاپقىن بوپ جاتىرسىز؟! ءبىز سونى تۇسىنبەي وتىرمىز. بۇل ارەكەت-قىلىعىڭىز سىزدەي ۇلكەن مەملەكەت قايراتكەرىنە جاراسپايتىن شارۋا. انشىلەرگە تيەسىلى اقشاعا تەك ءسىزدىڭ بالاڭىز يەلىك ەتۋ كەرەك دەگەن وي سىزگە قايدان كەلگەن؟! ءبىز ءوز شارۋامىزدى ءوزىمىز شەشۋىمىز كەرەك، وزىمىزگە تيەسىلى قاراجاتتى ءوزىمىز تيىسىنشە جۇمساۋىمىز قاجەت. ەڭبەكتەن تۇسكەن قاراجات ءبىر قالتاعا، ناقتىراق ايتقاندا ءسىزدىڭ بالاڭىزعا ەمەس، مىڭ قالتاعا ياعني ماڭداي تەرىمەن تاۋىپ جۇرگەن انشىلەر مەن ءان وندەۋشىلەردىڭ قالتاسىنا ءتۇسۋ كەرەك. سىزدەن وسىنداي ارەكەتتەرىڭىزدى توقتاتۋدى تالاپ ەتەمىز!" دەپ جازعان ءانشى ءوزىنىڭ ينستاگرامم پاراقشاسىنا.
قازاق قوعامىندا وتە زور ابىرويعا يە مەيرامبەكتىڭ بۇل مالىمدەمەسىنە قاتىستى زاعيپا باليەۆا ازىرگە جاۋاپ قاتپادى.
قىزىق ەندى باستالادى. بۇل ورىنداۋشىلار قوعامى عانا. انشىلەردىڭ ءانى مەن ءسوزىن جازىپ بەرىپ جۇرگەن قازاقستان اۆتورلار وداعى (قازاق)  دا اۆتورلاردىڭ اقشاسىن بەرمەي جاتىر دەپ، وداق مۇشەلەرى حابارلاسۋدا. ولار دا بولاشاق تا ءوز الدىنا توراعا سايلاماق كورىنەدى.
"ادىرنا" ۇلتتىق پورتالى 

 

پىكىرلەر