Ánshilerge endi avtorlar da qosylmaq. Meırambek Bespaevtyń shýly málimdemesi

2278
"Qazaqtyń boztorǵaıy" atanǵan Meırambek Bespaev ne jazsa da álem jelide hıt bolyp jatady. Sebebi, Meırambek te biledi ne jazý kerek ekenin. Basqa ánshiler sııaqty jegen tamaǵyn, kıgen kıimin salý Meırambektiń ádetinde joq. Sol Meırambek búgin ánshilerdiń múddesin qorǵap shyqty.
Keshe ǵana Qazaqstan oryndaýshylar odaǵynyń basqarma tóraǵasy bolyp saılanǵan Bespaev eshqashan joǵary qyzmetke umtylmaǵanyn da jasyrmaǵan bolatyn.

"Búgin ónerde júrgen barsha áriptesim usynys jasap, biraýyzdan daýystaryn berip, meni Qazaqstan oryndaýshylar odaǵynyń (KOÝPIS) basqarma tóraǵasy etip saılady. Biraz jurt biledi, qazirgi tańda bul qoǵamdyq uıymnyń qarjylyq jaǵdaıy nashar, biraz qurylymdardyń aldynda qaryzy bar, ánshiler men án óńdeýshilerdiń aldynda bedeli de tómendep ketken.  Birlestik tarıhynyń osyndaı aýyr kezeńinde áriptes-dostarym meni basshy qyp saılap otyrǵany - maǵan sengeni dep qabyldap otyrmyn. Árıne, mundaı uıymǵa jetekshilik etý maǵan úlken jaýapkershilik artatynyn jan-dúnıemmen jaqsy sezinip ári túsinip otyrmyn. Men eshqashan basshylyq qyzmetke umtylǵan adam emespin. Muny bir sahnada júrgen áriptesterim men qadirli tyńdarmandarym da jaqsy biledi", - dep jazǵan bolatyn.

Búgin Meırambek Bespaev óziniń ınstagramm paraqshasynda belgili qoǵam qaıratkeri Zaǵıpa Balıevaǵa qarata málimdeme jasady. Ánshiniń aıtýynsha, Balıevanyń uly osy odaqty buryn basqaryp, ánshilerdiń tıesili aqshasyn bermeı kelgen eken. Jańadan saılanǵan tóraǵaǵa Zaǵıpa Balıeva quqyq qorǵaý organdary arqyly qysym kórsetip jatsa kerek. Meırambektiń sózin qaz qalpynda bereıik.

"Qurmetti Zaǵıpa Iahııaqyzy!
Men 2020 jyldyń 15 qańtar kúni Qazaqstan oryndaýshylar odaǵynyń basqarma tóraǵasy bop saılandym. Daýys berýge uıymnyń eń joǵarǵy basqarý organy - quryltaıshylardyń jalpy jıyny jasaqtaǵan basqarma músheleriniń barlyǵy qatysty. Saılaý ótkizýge qajetti kvorým boldy. Barlyq reglament pen zańdylyq tolyqtaı saqtaldy. Hattama toltyrylyp, meni bas dırektor qyzmetine kirisýim týraly buıryq ta shyǵyp qoıdy. Endi kelip, burynǵy basshylyq jańa basshylyqqa qarsy qoqań-loqqy kórsetip, ártúrli jaǵymsyz áreketter arqyly qarsylyq kórsetýde. Burynǵy basshylyqtyń artynda Sizdiń ulyńyz jáne ózińiz tur ekensiz. Siz zańdy túrde saılanǵan maǵan, basqarma múshelerine qysym kórsetip, ártúrli memlekettik jáne quqyq qorǵaý organdaryna telefon shalyp jatyr ekensiz. Munyńyz múlde durys emes dep bilemiz! Nege siz ánshilerdiń sharýasyna aralasyp, alashapqyn bop jatyrsyz?! Biz sony túsinbeı otyrmyz. Bul áreket-qylyǵyńyz sizdeı úlken memleket qaıratkerine jaraspaıtyn sharýa. Ánshilerge tıesili aqshaǵa tek sizdiń balańyz ıelik etý kerek degen oı sizge qaıdan kelgen?! Biz óz sharýamyzdy ózimiz sheshýimiz kerek, ózimizge tıesili qarajatty ózimiz tıisinshe jumsaýymyz qajet. Eńbekten túsken qarajat bir qaltaǵa, naqtyraq aıtqanda sizdiń balańyzǵa emes, myń qaltaǵa ıaǵnı mańdaı terimen taýyp júrgen ánshiler men án óndeýshilerdiń qaltasyna túsý kerek. Sizden osyndaı áreketterińizdi toqtatýdy talap etemiz!" dep jazǵan ánshi óziniń ınstagramm paraqshasyna.
Qazaq qoǵamynda óte zor abyroıǵa ıe Meırambektiń bul málimdemesine qatysty Zaǵıpa Balıeva ázirge jaýap qatpady.
Qyzyq endi bastalady. Bul oryndaýshylar qoǵamy ǵana. Ánshilerdiń áni men sózin jazyp berip júrgen Qazaqstan avtorlar odaǵy (QazAQ)  da avtorlardyń aqshasyn bermeı jatyr dep, odaq músheleri habarlasýda. olar da bolashaq ta óz aldyna tóraǵa saılamaq kórinedi.
"Adyrna" ulttyq portaly 

 

Pikirler