گولليۆۋد پروديۋسەرلەرى امىرە قاشاۋباەۆتىڭ ءومىرى جايلى فيلم تۇسىرەدى

2220
Adyrna.kz Telegram

 

قازاقستاندىق Moviq كينوكومپانياسى گولليۆۋدتىق پروديۋسەرلەر كەري گرانات جانە ەد دجونسپەن بىرگە امىرە قاشاۋباەۆتىڭ ءومىرى جايلى فيلم تۇسىرەدى، - دەپ حابارلايدى Tengrinews.kzء تىلشىسى. 

كارتينادا بەلگىلى ءانشى ءارى اكتەر امىرە قاشاۋباەۆتىڭ شىعارماشىلىعىنىڭ شىڭىنا شىققان كەزەڭى باياندالادى. ونىڭ ەۋروپانى قازاق حالقىنىڭ ءان ونەرىمەن تانىستىرعان كەڭەس وداعىنىڭ تۇڭعىش ءانشىسى ەكەنى بەلگىلى. 1925 جىلى پاريجدە وتكەن EXPO-1925 كورمەسىندە ول قازاقتىڭ "اعاش اياق", "قاناپيا", "جالعىز ارشا", ء"ۇش دوس" اتتى ۇلتتىق اندەرىن ورىنداپ، كۇمىس جۇلدە العان ەدى. فيلمگە ءانشىنىڭ ورىنداۋىنداعى سەگىز ءان الىندى.

Moviq كينوكومپانياسىنىڭ وكىلى اندرەي ءراسپۋتيننىڭ ايتۋىنشا، ءفيلمنىڭ ءتۇسىرىلىم جۇمىستارى ءساۋىر ايىندا باستالادى. ءتۇسىرىلىم جۇمىستارىنىڭ كوبى ەۋروپا قالالارىندا، كەيبىرى الماتىدا وتەدى. كارتينا قازاقستاندىق، سونىمەن قاتار، شەتەلدىك پروكاتقا دا شىعادى. ءفيلمدى تۇسىرۋگە "قازاقفيلم" كينوستۋدياسى مەن قر مادەنيەت جانە سپورت مينيسترلىگى قولداۋ ءبىلدىردى.

Cast.kz ورتالىعى 1 جەلتوقساننان باستاپ باستى رولدە وينايتىن اكتەرگە كاستينگ جاريالادى. ايتا كەتەيىك، "امىرە قاشاۋباەۆ" كارتيناسى اعىلشىن تىلىندە شىعادى، سوندىقتان دا باستى رولە وينايتىن اكتەرگە اعىلشىن ءتىلىن ءبىلۋ تالابى قويىلىپ وتىر.

قاشاۋباەۆتىڭ ءرولىن وينايتىن اكتەرگە قويىلاتىن باستى تالاپتار: جاس شاماسى 25-40 ارالىعىندا بولۋ كەرەك، اعىلشىن ءتىلىن Upper Intermediate دەڭگەيىندە ءبىلۋ، اكتەرلىك شەبەرلىگى جوعارى، قازاق اندەرىن شەبەر ورىنداۋ جانە دومبىرادا ويناۋ.

باستى رولدەرگە: اعىلشىن، قازاق تىلدەرىن جاقسى بىلەتىن 55-65 جاس ارالىعىنداعى ەر ادام; مۇستافا شوقايدىڭ رولىنە 30-40 جاس ارالىعىنداعى، اعىلشىن ءتىلىن ءبىلۋ دەڭگەيى Intermediate دەڭگەيىنەن تومەن بولماۋى ءتيىس; 25-35 جاس ارالىعىنداعى، اعىلشىن ءتىلىن Intermediate دەڭگەيىنەن كەم بىلمەيتىن ايەل; 55-65 جاس ارالىعىنداعى اكتەرلىك قابىلەتى جوعارى، اعىلشىن ءتىلىن بىلەتىن ايەل ادام جانە 13-16 جاس ارالىعىنداعى اعىلشىن جانە قازاق تىلدەرىن جاقسى بىلەتىن ۇل بالا كەرەك. 

 

پىكىرلەر