Qazaqstandyq Moviq kınokompanııasy gollıvýdtyq prodıýserler Kerı Granat jáne Ed Djonspen birge Ámire Qashaýbaevtyń ómiri jaıly fılm túsiredi, - dep habarlaıdy Tengrinews.kz tilshisi.
Kartınada belgili ánshi ári akter Ámire Qashaýbaevtyń shyǵarmashylyǵynyń shyńyna shyqqan kezeńi baıandalady. Onyń Eýropany qazaq halqynyń án ónerimen tanystyrǵan Keńes odaǵynyń tuńǵysh ánshisi ekeni belgili. 1925 jyly Parıjde ótken EXPO-1925 kórmesinde ol qazaqtyń "Aǵash aıaq", "Qanapııa", "Jalǵyz arsha", "Úsh dos" atty ulttyq ánderin oryndap, kúmis júlde alǵan edi. Fılmge ánshiniń oryndaýyndaǵy segiz án alyndy.
Moviq kınokompanııasynyń ókili Andreı Raspýtınniń aıtýynsha, fılmniń túsirilim jumystary sáýir aıynda bastalady. Túsirilim jumystarynyń kóbi Eýropa qalalarynda, keıbiri Almatyda ótedi. Kartına qazaqstandyq, sonymen qatar, sheteldik prokatqa da shyǵady. Fılmdi túsirýge "Qazaqfılm" kınostýdııasy men QR Mádenıet jáne sport mınıstrligi qoldaý bildirdi.
Cast.kz ortalyǵy 1 jeltoqsannan bastap basty rolde oınaıtyn akterge kastıng jarııalady. Aıta keteıik, "Ámire Qashaýbaev" kartınasy aǵylshyn tilinde shyǵady, sondyqtan da basty role oınaıtyn akterge aǵylshyn tilin bilý talaby qoıylyp otyr.
Qashaýbaevtyń rolin oınaıtyn akterge qoıylatyn basty talaptar: jas shamasy 25-40 aralyǵynda bolý kerek, aǵylshyn tilin Upper Intermediate deńgeıinde bilý, akterlik sheberligi joǵary, qazaq ánderin sheber oryndaý jáne dombyrada oınaý.
Basty rolderge: aǵylshyn, qazaq tilderin jaqsy biletin 55-65 jas aralyǵyndaǵy er adam; Mustafa Shoqaıdyń roline 30-40 jas aralyǵyndaǵy, aǵylshyn tilin bilý deńgeıi Intermediate deńgeıinen tómen bolmaýy tıis; 25-35 jas aralyǵyndaǵy, aǵylshyn tilin Intermediate deńgeıinen kem bilmeıtin áıel; 55-65 jas aralyǵyndaǵy akterlik qabileti joǵary, aǵylshyn tilin biletin áıel adam jáne 13-16 jas aralyǵyndaǵy aǵylshyn jáne qazaq tilderin jaqsy biletin ul bala kerek.
