وسى اپتادا بارشا مۇسىلمان قاۋىممەن بىرگە مايقۇدىقتاعى بالا قاجى اتىنداعى مەشىتتە جۇما نامازعا قاتىستىق. ءداستۇرلى ۋاعىزدان كەيىن، الماتىداعى قايعىلى ۇشاق اپاتىنان وقىستا قۇربان بولعان جاندارعا دۇعا باعىشتالدى.
ايتايىن دەگەنىمىز، ناماز اراسىندا مەشىت يمامى كوپشىلىك جينالعاندارعا - « 5 قاڭتار، ساعات 19:00 دە قاراعاندى قالاسىنداعى سەرىك ساپيەۆ اتىنداعى بوكس ورتالىعىندا مۇحامەد ع.س. تۋعان كۇنى ءماۋلىت مەيرامى اتاپ وتىلەدى. پايعامبارىمىزدى ۇلىقتايتىن ايتۋلى شاراعا قاتىسۋ ءۇشىن مەشىتتەن 1000 تەڭگەگە بيلەت ساتىپ الىڭىزدار»-دەپ حابارلاندىرۋ جاسادى.
نەگە قاراعاندىدا باسقا - وڭىرلەردەن وزگەشە، جىلىنا ءبىر تويلاناتىن ءماۋلىت مەيرامىنا مۇسىلمان قاۋىم اقشا تولەپ كىرۋى كەرەك؟ اللا رازىلىعى ءۇشىن شارانى نەگە تەگىن ۇيىمداستىرماسقا؟ بۇل دەگەنىمىز قاراشا حالىقتى توناۋ عوي. سول اقشانى تولەۋگە كوپشىلىكتىڭ شاماسى كەلە بەرمەيدى. اسىرەسە، كۇنكورىسى تومەن، از قامتىلعان وتباسى مۇشەلەرى. وبلىستىڭ وكىل يمامى ومىرزاق قاجى بەكقوجا مىرزا بۇل تىرلىككە نە دەپ جاۋاپ بەرەسىز؟ ءماۋلىت مەيرامىن كورۋ ءۇشىن اقشا تولەگەننەن باسقا، مەشىتتەرىمىزگە اللاعا شۇكىر زەكەت، ساداقاسىن، قارجىلاي كومەگىن اياماي بەرىپ جاتاتىن جومارت جاندار جەتەرلىك. سول از بولدى ما؟ جاماعاتتى قاناۋدى قويسانىزدار؟ ءماۋلىت مەيرامى، حالىق مەيرامى سيپاتىندا ءوتۋى قاجەت، ال وعان قاتىسۋ ءاربىر مۇسىلمانعا قولجەتىمدى، تەگىن بولۋى ءتيىس.
دارحان ۋاليەۆ،
قر جۋرناليستەر وداعىنىڭ مۇشەسى،
قاراعاندى قالاسى.
