مەملەكەتتىك ورتالىق مۋزەيىندە شوقان ءۋاليحانوۆتىڭ تۋعانىنا 180 جىل تولۋىنا ارنالعان «شوقان اسۋلارى» اتتى كورمە اشىلادى، دەپ حابارلايدى kazmuseum.kz ءتىلشىسى.
كورمەگە مەن الماتى وبلىسى، كەربۇلاق اۋدانىنداعى ش.ءۋاليحانوۆتىڭ «التىنەمەل» مەموريالدىق مۋزەيى قورىنان، سونداي-اق مۇراعات قورىنان الىنعان ۇلى تۇلعانىڭ ءومىرى مەن قىزمەتىنە قاتىستى ەكسپوناتتار قويىلعان.كورمەدە قر مەملەكەتتىك ورتالىق مۋزەيى قورىندا ساقتاۋلى شوقاننىڭ جەكە بۇيىمدارى، قولجازبالارى جانە شىعارمالارى، سونداي-اق، ول تۋرالى جارىق كورگەن كىتاپتار مەن باسىلىمدار ناسيحاتتالادى. كورمەگە العاش رەت شوقاننىڭ بورىگى مەن مىلتىعىنىڭ ءدۇمى، قاشقار ساپارىنان اكەلگەن قىتاي قۇمىراسى، ساپاردا الىپ جۇرگەن جولتورسىعى جانە «التىنەمەل» مەموريالدىق مۋزەيىنەن اكەلىنگەن ۇلى تۇلعانىڭ تۇتىنعان مىس توستاعانى، كۇمىس قاسىعى، پارشا بەلبەۋى سياقتى ت.ب. زاتتارىمەن بىرگە شوقان ءۋاليحانوۆتى IV دارەجەلى اۋليە ۆلاديمير وردەنى، ورىس گەوگرافيالىق قوعامىنىڭ تولىق مۇشەسىنە سايلانعاندىعى تۋرالى ديپلومى (كوشىرمەسى) قويىلعان. سونداي-اق شوقاننىڭ ەكسپەديتسيا بارىسىندا اكەلىنگەن باعالى تاستارى دا قويىلدى.كورمەنىڭ ەلەۋلى بولىگىندە شوقاننىڭ تۋىسقاندىرىنا قاتىستى ەكسپوناتتار دا ورىن العان: قارىنداسى ءتاجىبايدىڭ اققۋ تەرىسىنەن تىگىلگەن بىرەگەي ىشىگى، اپكەسى ءاپيانىڭ كويلەگى، قارىنداستارى بادىعۇلدىڭ بەشپەنتى، نۇريلانىڭ ورامالى، ناعاشىسى يسا شورمانوۆتىڭ شەكپەنى سياقتى جادىگەرلەر ەرەكشە دەن قويدىرادى.كورمەنىڭ مازمۇنىن اشا تۇسۋگە قر موم قورىنداعى ن.يا. ترەتياكوۆ، ن.گ. حلۋدوۆ، پ.ي.دياكوۆ، ا.م.مارتوۆا سىندى سۋرەتشىلەر سالعان شوقاننىڭ پورترەتتەرى مەن سول زاماننىڭ كورىنىسىن بەينەلەيتىن سۋرەتتەر دە قويىلدى. سونىمەن بىرگە كورمەدە قر ورتالىق مەملەكەتتىك مۇراعاتى مەن قر كينوفوتوقۇجاتتار جانە دىبىسجازبالارىنىڭ مۇراعاتىندا ساقتالعان شوقاننىڭ قولجازبالارى، قۇجاتتارىنىڭ كوشىرمەلەرىمەن بىرگە دەرەكتى فيلمدەر كورسەتىلەدى. سونداي-اق، ورتالىق عىلىمي كىتاپحانانىڭ قورىنان الىنعان عالىمنىڭ ءومىر جولى مەن شىعارماشىلىعىنا ارنالعان ەڭبەكتەر كورمەسى دە ۇسىنىلادى.كورمە اياسىندا وتكىزىلەتىن «شوقاننىڭ عىلىمي ونەگەسى» اتتى دوڭگەلەك ۇستەلدە ۇلى عالىمنىڭ مۇراسىنىڭ ءمانى مەن ماڭىزى، ونىڭ يگەرىلۋى تۋرالى تاريحشى، ەتنوگراف، ونەرتانۋشى، فيلوسوف، گەوگراف، فيلولوگ، مۋزەيتانۋشى جانە ت.ب. ماماندار بايانداما جاساپ، ءوز ويلارىمەن بولىسەدى.
كورمە 2015 جىلعى جەلتوقساننىڭ 9-ى كۇنى ساعات 15. 00-دە اشىلادى.
KAZMUSEUM.KZ
