جاقىندا ءۇندىستاننىڭ چەنناي قالاسىندا بۇكىلالەمدىك قولونەرشىلەر ءسامميتى ءوتتى. ءتورت كۇنگە سوزىلعان شاراعا الەمنىڭ 39 مەملەكەتىنەن 700-گە جۋىق ونەر ساڭلاقتارى قاتىسىپ، ءار ۇلت ءوز ءتول تۋىندىلارىن ورتاعا سالدى. ءبىزدىڭ شەبەرلەر جاساعان قولونەر بۇيىمدارى، زەرگەرلىك دۇنيەلەر، توقىما كيىزدەن جاسالعان تۇرمىستىق زاتتار، مۋزىكالىق اسپاپتارىمىز كەلۋشىلەردىڭ قىزىعۋشىلىعىن ارتتىرىپ، جۇرتشىلىقتىڭ نازارىن اۋداردى. اۆتورلارىمىز ءوز ەڭبەكتەرى جايىندا اڭگىمەلەپ، ءار ەكسپوزيتسيانىڭ شىعۋ تاريحىن، تۇرمىستىق ماڭىزىن ءتۇسىندىرىپ، قالاي پايدالانىلاتىنىن كورسەتتى. قازاقتىڭ قارا دومبىراسىنان توگىلگەن كۇي دە ۇلتىمىزدىڭ ءسان-سالتاناتىن اسىرا ءتۇستى.
پىكىر الماسۋ، شەبەرلىك دارىستەرى ونەر تۋىندىلارىنىڭ ىشكى-سىرتقى كوركەمدىگىن تانىپ بىلۋگە، شىعارماشىلىق شابىتتىڭ قاناعاتتانۋىنا، تانىم-تالعامنىڭ بيىكتەۋىنە جول اشتى دەۋگە تولىق نەگىز بار. قولونەردىڭ كيەسى قونعان قاسيەتتى قازاق ونەرىنىڭ مارتەبەسى بيىك بولدى، بىزدەر سىننان سۇرىنبەي وتتىك دەپ ماقتانىشپەن ايتۋعا بولادى.
ەڭ باستىسى، ونەردىڭ ورەسى بيىكتەدى، وسى قاسيەتتى قولونەردى كيە تۇتقان ونەرپازدار ءبىرىن-بىرىمەن ەتەنە تانىستى، ۇلتىنا، ءتۇر-تۇسىنە قاراماي، باۋىرلاستىق سەزىمگە تولى ورتا پايدا بولدى. دوستىق قارىم-قاتىناس ورنادى، ونەردەگى ۇزەڭگىلەستىك، شىنايى سىرلاستىق ەلارالىق بەدەلدى نىعايتا ءتۇستى. بارىنەن بۇرىن قازاقستانداي جەر، ەل بار ەكەنىن مويىنداعانىن زور قۋانىشپەن جەتكىزگىم كەلەدى.
تورتكۇندىك ۇلكەن سامميت باعدارلاماسىنىڭ شەڭبەرىندە وتكەن ساريلەر شەرۋى بي قويىلىمى، ءۇندىنىڭ كلاسسيكالىق بي كورىنىسى، جوعارى مودا پوديۋمى، ءار مەملەكەتتىڭ وزىنە ءتان ونەر تۋىندىلارىنىڭ وزىق ۇلگىلەرى جانە ولاردىڭ كورسەتىلىمى بىزدەردى رۋحاني بايىتتى. قولونەر الىپتارىمەن تانىسۋ، ونەرىن تاماشالاۋ، تەك قانا تاماشالاپ قويماي، كوپتەگەن پايدالى جاقتارىن بويعا ءسىڭىرىپ قاناتتانىپ قايتۋىمىزدىڭ ءوزى بىزدەر ءۇشىن بولاشاقتاعى باعىتىمىزعا باعدار بەرەتىن جارىق سەكىلدى بولدى. ەندىگى ۇلكەن ءىس، قازاق قولونەرشىلەرىنىڭ جاۋاپكەرشىلىگىنە سەرت!
ءبىزدىڭ موينىمىزعا جۇكتەلەتىن اۋىر جۇك — ول حالقىمىزدىڭ ءتول ونەرى — قولونەرىن الەمگە الىپ شىعۋ، مادەنيەتى وزىق ەلدەرمەن يىق تىرەسە بيىك بەلەستەرگە كوتەرىلۋ. مىنە، چەنناي ءسامميتى بىزگە وسىنى مىندەتتەيدى. ءتورت جىلدان سوڭ قىتايدا وتەتىن ءدۇبىرلى قولونەرشىلەر اسسامبلەياسىنا شىعارماشىلىقتى، اۋماقتى، تاتىمدى جۇمىستارىمىزبەن قايتا ورالساق دەگەن ءۇمىتىمىز شىندىققا اينالعاي!
قورىتا ايتقاندا، ءۇندىستان ساپارى، چەننايداعى الەمدىك قولونەرشىلەر ءسامميتى بىزدەر ءۇشىن بەرگەنى مول، باعىت-باعدارى انىق ءساتتى فورۋم بولدى. ءبىز دە ۇلتىق قولونەرىمىزدىڭ جۇلدىزى جارقىرايدى دەگەن نىق سەنىممەن ەلگە ورالدىق.
اباي اتىنداعى قازاق پەداگوگيكالىق ۋنيۆەرسيتەتى كوركەمسۋرەت فاكۋلتەتى،
