Jaqynda Úndistannyń Chennaı qalasynda Búkilálemdik qolónershiler sammıti ótti. Tórt kúnge sozylǵan sharaǵa álemniń 39 memleketinen 700-ge jýyq óner sańlaqtary qatysyp, ár ult óz tól týyndylaryn ortaǵa saldy. Bizdiń sheberler jasaǵan qolóner buıymdary, zergerlik dúnıeler, toqyma kıizden jasalǵan turmystyq zattar, mýzykalyq aspaptarymyz kelýshilerdiń qyzyǵýshylyǵyn arttyryp, jurtshylyqtyń nazaryn aýdardy. Avtorlarymyz óz eńbekteri jaıynda áńgimelep, ár ekspozıııanyń shyǵý tarıhyn, turmystyq mańyzyn túsindirip, qalaı paıdalanylatynyn kórsetti. Qazaqtyń qara dombyrasynan tógilgen kúı de ultymyzdyń sán-saltanatyn asyra tústi.
Pikir almasý, sheberlik dáristeri óner týyndylarynyń ishki-syrtqy kórkemdigin tanyp bilýge, shyǵarmashylyq shabyttyń qanaǵattanýyna, tanym-talǵamnyń bıikteýine jol ashty deýge tolyq negiz bar. Qolónerdiń kıesi qonǵan qasıetti qazaq óneriniń mártebesi bıik boldy, bizder synnan súrinbeı óttik dep maqtanyshpen aıtýǵa bolady.
Eń bastysy, ónerdiń óresi bıiktedi, osy qasıetti qolónerdi kıe tutqan ónerpazdar birin-birimen etene tanysty, ultyna, túr-túsine qaramaı, baýyrlastyq sezimge toly orta paıda boldy. Dostyq qarym-qatynas ornady, ónerdegi úzeńgilestik, shynaıy syrlastyq elaralyq bedeldi nyǵaıta tústi. Bárinen buryn Qazaqstandaı jer, el bar ekenin moıyndaǵanyn zor qýanyshpen jetkizgim keledi.
Tórtkúndik úlken sammıt baǵdarlamasynyń sheńberinde ótken sarıler sherýi bı qoıylymy, úndiniń klassıkalyq bı kórinisi, joǵary moda podıýmy, ár memlekettiń ózine tán óner týyndylarynyń ozyq úlgileri jáne olardyń kórsetilimi bizderdi rýhanı baıytty. Qolóner alyptarymen tanysý, ónerin tamashalaý, tek qana tamashalap qoımaı, kóptegen paıdaly jaqtaryn boıǵa sińirip qanattanyp qaıtýymyzdyń ózi bizder úshin bolashaqtaǵy baǵytymyzǵa baǵdar beretin jaryq sekildi boldy. Endigi úlken is, qazaq qolónershileriniń jaýapkershiligine sert!
Bizdiń moınymyzǵa júkteletin aýyr júk — ol halqymyzdyń tól óneri — qolónerin álemge alyp shyǵý, mádenıeti ozyq eldermen ıyq tirese bıik belesterge kóterilý. Mine, Chennaı sammıti bizge osyny mindetteıdi. Tórt jyldan soń Qytaıda ótetin dúbirli qolónershiler assambleıasyna shyǵarmashylyqty, aýmaqty, tatymdy jumystarymyzben qaıta oralsaq degen úmitimiz shyndyqqa aınalǵaı!
Qoryta aıtqanda, Úndistan sapary, Chennaıdaǵy álemdik qolónershiler sammıti bizder úshin bergeni mol, baǵyt-baǵdary anyq sátti forým boldy. Biz de ultyq qolónerimizdiń juldyzy jarqyraıdy degen nyq senimmen elge oraldyq.
Abaı atyndaǵy Qazaq pedagogıkalyq ýnıversıteti kórkemsýret fakýlteti,
