№83 مەكتەپتىڭ 5 سىنىپ وقۋشىلارىنا قازاقتىڭ ۇلتتىق قولونەرى تۋرالى ساباق وتكىزىلدى. ساباقتى ۇيىمداستىرۋشى گۇلجانات احمەتقاليەۆا وقۋشىلارعا قولونەر جايىندا ءتۇرلى ماعلۇمات بەرىپ، شەبەرلىكتىڭ قىر-سىرىمەن تانىستىردى.
قازاقتىڭ ۇلتتىق قولونەرى حالقىمىزدىڭ اتا – بابادان ۇرپاققا جەتكەن شەبەرلىگى، ۇستالىعى، ىسمەرلىگى. قازاق قولونەرىنىڭ ءتۇرى، ساپاسى، ورنەگى، بوياۋىنىڭ ومىرگە كەلۋى كوشپەلى ومىرمەن تىعىز بايلانىستى. شەبەردىڭ قولىنان شىققان بۇيىمدار كۇندەلىكتى تىرشىلىكپەن قاتار سول زاماننىڭ ورتاق قولونەر مادەنيەتىنىڭ باعا جەتپەس ۇلگىسى. «شەبەردىڭ قولى ورتاق» دەگەن ماقال ەل ىشىندە بەكەر ايتىلماسا كەرەك. ناعىز شەبەرلىككە جەتۋ ءۇشىن تاباندىلىق، ىسكەرلىك، تالعامپازدىق، ءبىلىم قاجەت.
شىعارماشىلىق ىزدەنىس ۇستىندەگى حالىق شەبەرلەرى تۇرمىسقا قاجەتتى قولونەردىڭ الۋان تۇرلەرىن ويلاپ تاپتى. ءوز ۇرپاعىنىڭ “سەگىز قىرلى، ءبىر سىرلى”ونەگەلى، ونەرلى بولىپ ءوسۋىن ماقسات ەتكەن اتا-انامىز، ءوز بويىنداعى بار اسىل قاسيەتتەرىن ۇرپاقتان-ۇرپاققا ۇيرەتىپ كەلگەن.
ساباق بارىسىندا وقۋشىلار ەتنوگرافيا زالىنداعى ۇلتتىق قولونەر بۇيىمدارىن كورىپ، ولارمەن جەتە تانىستى. شارانى مۋزەي پەداگوگيكاسى جانە بالالار شىعارماشىلىعى ءبولىمى ۇيىمداستىردى.
قر ۇلتتىق مۋزەيى
