بۇگىندە جاس سۋرەتشى-مۇسىنشىلەرىمىز وزدەرىنىڭ وسال ەمەستىگىن ايقىن اڭعارتىپ كەلەدى. اسىقتان جاسالعان ات، حرۋستال تاستاردان قۇرالعان بارىس ءتارىزدى مۇسىندەردىڭ اۆتورلارى – نۇرلان ابىشەۆ، نۇرلان ءادىلحان، قۋانىش ماتەنوۆ. وسىعان دەيىن تاۋەلسىزدىكتىڭ 20 جىلدىعىنا وراي اسىقتان ارعىماق كوتەرىپ، الاش نازارىن وزىنە اۋدارعان ولاردىڭ تولىق اياقتالعان ەكىنشى جوباسى – تازا شىنى تاستاردان ورنەكتەلگەن بارىس ءمۇسىنى. بۇل ءمۇسىن قازىر الماتىداعى ويىن-ساۋىق ورتالىقتارىنىڭ بىرىندە كوپشىلىك نازارىنا ۇسىنىلىپ تۇر.
ارنايى مىسىردان جەتكىزىلگەن 12 مىڭ حرۋستال تاستان توقىلعان بارىستى جۇرتشىلىق الماتىنىڭ سيمۆولىنا بالاي باستاپتى. ەل ىشىندە بارىستىڭ مۇرتىن ۇستاپ تۇرىپ، تىلەك تىلەگەندەردىڭ ارمانى ورىندالادى ەكەن ءسوز دە جەلدەي ەسۋدە. «مەن بۇل جۇمىستارىمدى جالعىز ەمەس، نۇرلان ءادىلحان، قۋانىش ماتەنوۆ سياقتى ارىپتەستەرىممەن بىرلەسىپ جۇزەگە اسىردىم. ولاردىڭ جۇمىسقا سىڭىرگەن ەڭبەگى وراسان. بارىس ءمۇسىنىن اياقتاۋ ءۇشىن ءۇش اي تىنباي جۇمىس ىستەدىك. ونىڭ جالپى سالماعى – 35 كەلى»، – دەيدى سۋرەتشى نۇرلان ابىشەۆ.
نۇرلان ابىشەۆ، سۋرەتشى-ءمۇسىنشى:
– بىردە ءبىر اڭشى ءدۇربى ارقىلى ناعىز بارىستى كورىپتى. بارىس ساعىمدانىپ، جارتاستار اراسىندا مولدىرەپ كورىنگەندەي اسەر قالدىرىپتى. كوزدەرى عانا انىق بايقالادى دەيدى ساياتشى. ءبىز سول ءمولدىر بارىستىڭ بەينەسىن بەرۋگە بارىنشا تىرىسىپ باقتىق.
سۋرەتشىلەر بۇعان دەيىن 8 500 اسىقتان ات جاساپ، ەلدى تاڭ-تاماشا ەتكەن ەدى. ەندى اسىقتان جاسالعان ارعىماق دۋبايدا وتەتىن دۇنيەجۇزىلىك ونەر كورمەسىنە جول تارتپاق. بارىس ءمۇسىنىنىڭ دە باعى اشىلاتىن كۇن الىس ەمەس، – دەيدى سۋرەتشىلەر.
ارمان سەرىكۇلى
